periodicobanat (oktubre 9, 2008)

TASK FORCE MAKIMA- Makita dinhi si PNP-12 Director, PCSUPT Felizardo Serapio (naglingkod ug nagtudlo) kuyog ang mga alkalde nga sila si (gikan sa wala ug nagtindog) Rom Falgui sa Kiamba ug Jojo Lopez sa Maasim. Samtang si Sarangani Vice Governor, Steve Solon (sunod ni Lopez) ug Maitum Mayor Elsie Perret (naglingkod) lakip na si Sarangani Province Governor, Migs Dominguez (nag-atubang kang Serapio) naminaw ug ensakto human nga pormal nga gimugna ang Task Force MAKIMA (Maasim-Kiamba-Maitum). (sarpio photo/pbanat caption) *888888888 HEADLINER: Human nga nasamdan sa engkwentro 2 ka MILF nga mi-atake sa Kiamba, mingsurender Duha ka mga lider ug kumander sa rebeldeng Moro Islamic Liberation Front (MILF) nga maoy responsable sa pagpangatake sa Barangay Gasi ug Kling Plantation sa Kiamba, Sarangani Province ang mitahan sa ilang kaugalingon kagahapong adlawa human kini nagsamdan sa pinakabag-ong engkwentro sa mga sundalo ug MILF sa Barangay Daut Dani, sa Kiamba gihapon kagahapon. Sa report nga naka-abot sa Periodico-Banat, naila ang duha ka mga MILF members nga sila Rico Watamama, deputy brigade commander sa 107th Base Command sa MILF ug Nasser Bagsil nga usa pod ka taas nga opisyal sa maong hugpong. Nakuha gikan sa posesyon ni Watamama ang usa ka Garand Rifle ug ubay-ubay nga kilo sa Ammonium Nitrate, usa sa mga sangkap sa pag-gama ug bomba. Dugang sa report nasamdan gyud ang duha ka mga sakop sa MILF tungod sa gihimong hot pursuit operations sa mga sundalo sa 73rd Infantry Battalion ug didto nagka-abot gyud sa Barangay Datu Dani diin nakuha ang duha ka mga suspetsado. Tungod sa nahiaguman nga samad, dali nga gihatod sa usa ka balay tambalanan dinhi sa dakbayan ang duha ka mga rebelde ug dako ang paglaum sa mga awtoridad nga daghan gyud nga mga impormasyon ang ilang mahipos panahon nga puwede ng imbestigahan ang duha ka mga suspek. Matod ni 73rd IB Commander, Lt. Col. Boogie de Leon, mismong kay Kiamba Mayor, Rom Falgui pa mihatod ug mga surrender feelers and duha ka mga suspek hinungdan nga nakuha gyud kini sa mga awtoridad. Hangtod karon nagpabilin pa gihapon sa taas kaayo nga alerto ang Maasim-Kiamba-Maitum (MAKIMA) tungod sa padayong engkuwentro sa gobyerno ug mga Lawless MILF Groups (LMG). (pbanat news desk) *88888888 2 ka mga sundalo, angol sa giyera sa Kiamba Gidali ug dala karon sa balay tambalanan ang duha ka mga sakop sa 73rd Infantry Battalion sa AFP human kini nasamdan sa engkuwentro tali sa mga grupo sa Lawless MILF Group (LMG) didto sa Sitio Kuwago, Barangay Datu Dani, Kiamba Sarangani Province niadtong milabay nga adlaw. Sa report nga nakuha sa Periodico-Banat, maayo gyud nga pagka-igo sa tuong kamot niini si Private First Class Ebeneser Libres ug Private First Class Judy Galvez nga naigo sa iyang wala nga abaga human nga nagbinaylo-ay ug bala ang duha ka mga grupo. Dugang sa report, ang grupo sa mga sundalo padulong na unta sa balay nga ginatago-an base sa usa ka impormasyon sa mga suspek nga misunog ug mi-atake sa Barangay Gasi ug Kling Plantation sayo ning semanaha apan ang misugat ngadto kanila mao ang mga bala sa kalaban nga puwersa. Pagkahuman sa taas-taas nga giyera, nasayran sa mga sundalo nga ang duha ka mga tag-as nga opisyal sa 107TH Base Command sa MILF nga sila Nasser Bagsil ug Rico Watamama nagpadala na ug senyales nga mo-surender human nga nasamdan usab sila atol sa engkuwentro. Gidali dayon ug dala sa balay tambalanan ang duha ka mga sundalo nga bisan pa man nga nagkalisod pa tungod sa nahiaguman nga samad, nagpasalig gyud kini nga magpa-paspas ug rekober aron makabalik sa ilang kampo alang sa sunod nila nga operasyon. GIbutyag usab sa duha ka mga sundalo nga todo suporta gyud ang kasundalohan ug lokal nga panggamhanan sa Sarangani ug Kiamba hinungdan nga pursigido sila nga makabalik gilayon sa ilang mga tropa. Matod ni Galvez, nadawat na niini ang iyang kahimtang isip tigpanalipod sa katawhan sanglt usa siya ka sundalo. ‘Ganun talaga sir, weather-weather lang yan’ dason pa sa nasamdan nga sundalo. Panahon nga mauli-an na, nag-atang na usab sa duha ka mga sundalo ang ganti sa ilang kaisog pinaagi sa usa ka medalya ug insentibo. (pbanat news desk) *88888888 Kapitan sa Datu Dani, posibleng imbestigahan Gisulti karon sa labaw sa 73RD Infantry Battalion sa Philippine Army nga posibleng ma-imbestigahan ug ipatawag gyud ang kapitan sa Barangay Datu Dani sa Kiamba, Sarangani human nga nadiskubrehan nga sa maong barangay nagtago-tago lamang ang duha ka mga suspek sa pagpangatake ug pagpangsunog sa Barangay Gasi ug Kling Plantation sayo ning semanaha. Matod ni Lt. Col. Boogie de Leon, ang labaw sa 73rd IB, kuwestiyonable kaayo nganong wala masayod si Kapitan Moner Wata nga may mga taong gawas nga nakasulod na sa iyang barangay. ‘Hindi ko po masabi categorically na he is coddling but isang bagay po ang puwedeng masabi natin dito na mukhang questionable kung kaya ba niya kontrolin yung barangay niya at hindi niya nalalaman kung talagang sinsabi niya na nung panahon na yun ay walang armadong grupo sa barangay niya,’ pamahayag pa ni Colonel de Leon. Abtik dayon nga midepensa si Wata may kalabotan sa gipamahayag sa mga sundalo ngadto kaniya. Matod ni Wata dili tanang mga lihok sa iyangmga residente iyang masayran ilabi na kadtong nanimuyo sa taas nga mga kabukiran. ‘Hindi mo makokontrol yan, kaya sinabi ko doon kay Colonel de Leon we only rely information from IP’s. So, ang IP’s naman pag sinabi sa amin na paganun yun din ang sasabihin namin,’ depensa pa ni Wata. Sa nakalabay nga Peace and Order Council Meeting sa Kiamba, una ng nagbahad ang lokal nga mga opisyales ngadto sa tanang mga kapitanes nga manubag gyud kini panahon nga masayran nga may mga dautang elemento ang manimuyo ug magtago-tago sa ilang mga barangay. Gisugyot karon sa mga sundalo ug sa mga opisyales sa Kiamba nga angayan gyud nga tubagon ni Wata ang maong insidente. Gikumpirma usab sa kapitan nga bisan unsang orasa andam siyang mo-atubang ug motubag sa imbestigasyon nga ipahinungod ngadto kaniya. (pbanat news desk) *88888888 Kumander Bukay, nanawagan nga pasaylo-on na lamang si Teehankee Nanawagan karon si Norberto Manero alyas Kumander Bukay ngadto sa pamilya sa mga Hultman ug Chapman nga pasaylo-on na lamang ang kaubanan nga preso niini didto sa Muntinlupa nga si Claudio Teehankee, Jr., anak sa kanhing Chief Justice sa Supreme Court nga si Claudio Teehankee, Sr. Sa usa ka pamahayag sa ABSCBN, gisulti gyud ni Manero nga iyang nakita si Teehankee nga nagbasol ug nagbag-o na human nga siya nasentensyahan tungod sa pagpusil-patay sa duha ka mga batan-on pipila ka dekada na ang milabay didto sa Manila. Matod ni Manero, ang tanan nga mga preso dapat gyud hatagan ug tsansa nga ipakita sa katilingban nga may katungod sila nga dawaton pag-usab ug mamahimong prodaktibong miyembro sa sosyedad. Si Manero nga anaa na karon nanimuyo sa usa ka barangay sa lungsod sa Malungon, Sarangani Province, kuntento na gyud sa iyang kinabuhi kuyog ang iyang asawa ug pamilya. Bisan si Malungon Mayor, Reynaldo Constantino nanghinaut nga magpadayon na gyud ang pagbag-o sa iladong lider sa vigilante group nga ILAGA sa dekada 80. Si Manero na sentensyahan ug pagkabilanggo sa iyang tibuok kinabuhi human nga gipatay niini ang Italyanong pari. Pagkahuman sa kapin 25 anyos nga pagka-preso nahatagan kini ug executive clemency ug pardon ni Presidente Gloria Arroyo. (pbanat news desk) *88888888 Drayber sa habal-habal gidunggab ug icepick, luwas gihapon Naluwas gyud sa kamatayon ang usa ka ulitawo nga drayber ug usa ka habal-habal human kini nga gidunggab ug ice pick sa duha ka mga gidudahang mga carnapper didto sa Barangay Apopong, niadtong milabay nga adlaw. Ang report sa kapulisan nag-ila sa biktima nga usa ka Joselito Dimas, alyas Litoy ug residente sa Apopong Gensan. Matod sa inisyal nga imbestigasyon duha ka mga batan-on ang mikontrata ngadto sa biktima nga magpahatod sa Barangay Apopong, alas-dose sa udto niadtong milabay nga adlaw apan pag-abot nila sa sagbuton nga bahin sa maong barangay kalit lamang kini mipara ug dayon hansak kaniya ug ice pick. Maayo na lamang nga nakasinggit kini ug nakapangayo ug tabang apan ang motorsiklo niini nadagit gyud sa mga suspetsado. Pero, maayo na lamang ka yang motorsiklo sa biktima na-rekober dayon didto sa Purok Lanton, Barangay Apopong lang gihapon human kini nahulog sa usa ka creek ug gi-abandona na lamang sa mga suspetsado. Sa usa ka pakighinabi sa biktima gisulti gyud niini nga dili na kini mo-usab sa iyang trabaho isip habal-habal drayber sanglit bisan udtong tutok, dili gyud makumpiyansahan ang mga kriminal. Mangita na lamang si Dimas ug laing trabaho nga layo sa peligro aron masalbar ang kinabuhi niini. Padayon pang gipangita sa kapulisan ang mga responsable sa maong krimen samtang si Dimas padayon pang nagpa-ayo sa dinunggaban sa ice pick. (pbanat news desk) *88888888

Task Force MAKIMA, gimugna! Usa gyud ka Task Force ang gimugna karon sa lalawigan sa Sarangani ug sa Regional PNP Office 12 aron tubagon ug mahatagan ug igong solusyon ang padayong problema nga gisag-ubang sa mga lungsod sa Maasim, Kiamba ug Maitum tungod sa padayong pagpanghasi sa rebeldeng grupo sa Moro Islamic Liberation Front (MILF). Pormal na gyud nga mihimo ang PNP-12 kuyog ang tulo ka mga mayores sa tulo ka mga lungsod ug sa amahan sa lalawigan nga si Gobernador Miguel Rene Dominguez ug bise gobernador Steve Solon. Matod ni PNP-12 Chief, General Felizardo Serapio, Jr., ang TASK FORCE MAKIMA maoy mag-una sa tactical operations, legal offensives ug rehabilitasyon sa mga dapit nga naapektuhan sa kagubot. Nahimong pangulo sa Task Force si Sarangani PNP Provincial Director, PSSUPT Danilo Peralta nga gi-abagahan sa mga opisyal sa armadong kusog sa Pilipinas, mga alkalde u gang mga Municipal Chiefs of Police sa tulo ka mga lungsod. Isip parte sa kagamhanang probinsyal, nagpasalig gyud si Gobernador Dominguez ug si bise gobernador Steve Solon nga maoy magpondo sa maong Task Force aron mamahimo kining mas epektibo. Sa pagkamugna sa Task Force MAKIMA, nadiskusyonan gyud ang mga depensa nga bag-o sa mga kabukiran ug kabay-bayonan sa tulo ka mga apektadong lungsod. Ang mga ahensya sa Department of Health, Regional Disaster Coordinating Council ug Department of Social Welfare and Development sa Rehiyon 12, aduna usab dako nga papel sa gihimong task force. Tungod kay ang tulo ka lungsod daplin man sa dagat, ang PRO-12 Seaborne Patrol mao ang manguna sa operasyon sa tubig ug mao usab ang mohatod sa mga search warrants sa mga panimalay nila Victor Wataman, M E Malanatas ug Tawasin Sulani. Pinaagi kang PCSUPT Felizardo Serapio, Jr., daghang mga taktika ang namugna u gang bahin sa legal nga pamaagi gisagop usab ni PCSUPT Felicisimo Khu, ang Deputy Regional Director nga usa usab ka abogado. (pbanat news desk) *88888888888 Pulis versus pulis, 1 patay! Usa gyud ang nakabsan ug kinabuhi niadtong milabay nga adlaw sa syudad sa Cotabato City human nag-unay lang ug pinusilay ang duha ka mga sakop sa Philippine National Police didto sa buhatan sa Department of Environment and Natural Resources (DENR) sa Autonomous Region in Muslim Mindanao compound. Sa report nga gipaabot ni Cotabato City PNP Director, PSSUPT Wille Dangane, naila ang suspek nga usa ka PO1 Shamer Emblawa ug ang iyang biktima mao ang usa ka PO1 Naroh Kamaong. Ang inisyal nga imbestigasyon sa Cotabato City PNP nagbutyag nga adunay nahitabo nga grabeng panaglalis tali sa biktima ug sa suspek nga pulis nga mao usab ang anak ni DENR Regional Secretary Datu Kabuntalan Emblawa. Ang pulis nga napatay nahibaw-an usab nga mao ang escort ug bodyguard sa amahan sa suspek nga mao ang opisyal sa DENR. Si Emblawa ug Kamaong matod ni Dangane magparyente lamang. Kagahapong adlawa, pormal nga misurender sa mga opisyales sa kapulisan ang nakapusil nga si PO1 Emblawa ug gisulti niini nga andam nga mosumitir sa iyang kaugalingon sa usa ka imbestigasyon. Sa iyang bahin mihatag usab sa iyang pamahayag ang opisyal sa DENR nga amahan usab sa suspek ug namahayag nga igo lamang nagprotekta ang iyang anak ngadto kaniya. Matod ni Secretary Emblawa, ang biktimang si Kamaong matod pa suspetsyoso kaayo ang nilihokan sulod sa buhatan sa DENR-ARMM. Dugang sa tigulang nga si Emblawa, nagbitbit na sa iyang pusil si Kamaong sulod sa maong buhatan bisan pa nga adunay mando na nga bawal ang mag-display ug mga armas de fuego ang mga security escorts sulod sa ganghaan sa Regional Center. Tungod matod pa nga adunay nahitabo nga wala pagsinabtanay tali kang Kamaong ug sa amahan nga Emblawa, igo lamang nga miprotekta ang iyang anak ug gipusil si Kamaong sa paghuna-huna nga kalit lamang kining mamusil sa mga tawo nga anaa sa sulod sa DENR-ARMM. Matod ni Colonel Dangane, aduna nay gihimong amicable settlement sa duha ka mga partido tungod kay magparyente lamang kini. Wala pa hinuon resulta sa sabot-sabot sa duha ka pamilya apan malaumon ang kapulisan nga masulbad gilayon ang maong insidente sa dili madugay nga panahon. (pbanat news desk) *8888888 Turismo sa Rehiyon 12, mikunhod tungod sa kagubot Aminado karon ang pipila ka mga opisyales sa rehiyon 12 nga ang nag-unang rason sa kalit nga pagkunhod sa pagdagsa sa mga turista sa tibuok rehiyon mao ang padayong kagubot tali sa Armadong Kusog sa Pilipinas ug sa rebeldeng grupo sa Moro Islamic Liberation Front. Sa usa ka report sa National Economic and Development Authority (NEDA) nga nahipatik sa Mindanews, karong tuiga lamang sugod sa Enero ngadto sa Hunyo, anaa sa 293,937 ka mga turista ang mibisita sa rehiyon. Apan, ang maong ihap hamubo ug otso porsiyento sa 319, 508 nga tourist arrivals niadtong milabay nga tuig sa susama nga mga petsa. Sa ihap karong tuiga, 292,675 niini mga domestic o lokal nga turista ug aduna lamang 1,262 ka mga langyaw nga turista ang nahidangat sa Rehiyon 12. Miagingtuig, adunay 317,277 ka mga lokal nga turista ang nahidangat ug 2,231 ang mga langyaw o foreigners. Ang rehiyon 12 gilangkuban sa mga lalawigan sa South Cotabato, North Cotabato, Sultan Kudarat ug Sarangani samtang ang mga syudad niini mao ang General Santos, Koronadal, Kidapawan, Tacurong ug Cotabato. “The armed conflict in parts of the region is largely to blame for the decline in tourist arrivals. Publicity for the region has been bad,” matod ni Ma. Lourdes D. Lim, acting chair sa Regional Development Council. Ang pagbalik sa kagubot ug mga pagpamomba sa nagkalain-laing dapit susama sa Kalamansig, Sultan Kudarat sa katapusan sa Abril ug sa Maitum, Sarangani sa katapusan sa Hunyo maoy nakatuklod sa mga foreign embassies nga mopakanaug ug travel advisories dinhi sa Mindanao. “Advisories of embassies banning the travel of constituents to areas in Mindanao, including Region 12, because of unstable peace and order situation, caused the drop in foreign tourists to about 43%,” dugang sa regional NEDA report. Si Lim nga mao usab ang NEDA Regional Director nag-awhag karon sa mga miyembro sa RDC nga gilangkuban sa mga labaw sa government line agencies, mga alkalde sa mga lungsod, ug private sektor nga kinahanglan makigkumbate gyud sa negatibong publisidad aron ma-engganyo ug balik ang mga turista. Nahibaloan usab sa pinakabag-ong RDC Meeting nga usa ka sugyot nga maghimo ug tourism summit sa dili pa matapos ang tuig aron mabawi ang nagkagidlay na nga turismo sa rehiyon 12. Gitan-aw usab karon sa NEDA ang usa ka rason nganong mihinay ang dagan sa turismo sa rehiyon ug ilang nahibaloan nga tungod usab kini sa nagkataas nga transportation cost tungod usab sa pag-usbaw sa presyo sa lana. Matod ni Cesar Sulit, Jr., ang bise presidente sa Mindanao sa Association of Tourism Officers of the Philippines, Inc. nga bisan tuod nga ang kagubot anaa lamang sa mga hilit nga dapit sa Mindanao, apan ang tibuok isla gyud ang apektado. “The conflict is limited to certain areas but the whole of Mindanao is affected,” sulti ni Sulit. Midason pa si Sulit, nga mao usab ang Tourism Officer sa lalawigan sa South Cotabato nga kinahanglan gyud ug hiningusgang promotional activities sa matag lungsod sa Rehiyon 12. “The conflict has been in North Cotabato but South Cotabato, which is peaceful, has been dragged. In our case, we promote our province by ourselves,” panapos pa niini. (pbanat news desk) *8888888888 Our Lady of Peace & Good Voyage sa Gensan, 50 anyos na! Singkuwenta anyos na gyud ang Our Lady of Peace and Good Voyage Parish karong bulan sa Oktubre. Karong umaabot nga Oktubre 13, mamahimo na gyud kining 50 anyos ug daghang mga aktibidades ang nakalinya na alang sa dakong selebrasyon. Gibitbit nga tema ang OLPGV at 50! Journeying with Mary. Nahimong chairman sa anibersaryo si Fr. Edward Loberiano., CP. Ang OLPGV nga mas naila usab nga Dadiangas Parish gidumala sa Passionist Congregation. Pipila sa mga Passionist nga mga pari nga nag-alagad sa OLPGV Parish mao sila Fr. Paul Plaza, CP, Fr. Leo Acierto, CP, Fr. Brando Recaña, CP, Fr. Ramon Ramos, CP, Fr. Henry Free, CP, Fr. Deo Sustiguer, CP, Fr. Nonoy Plaza, CP, Fr. Gabriel Baldostamon, CP, Fr. Nonito Adorable, CP, Fr. Manny Gellez, CP, Fr. James Oclarit, CP. Sukad pa niadtong Oktubre 1, may mga aktibidades na alang sa kasumaran niini ang gipasi-ugdahan. May mga Trade Fair, Novena Masses, Kasalan sa Parokya, Children’s Fun Day, Tree Growing, Variety Show, Panulo sa Kadalanan, Motorcade, Pontifical Maas a piyesta mismo nga i-selebrar ni Bishop Dinualdo Gutierrez. (gikan sa report ni bariles republic/pbanat news desk) *8888888888

periodicobanat (oktubre 8, 2008)

PANAGTIGOM- Si PNP-12 Director, Chief Supt. Felizardo Serapio (naglingkod sa tuo)mihatag ug katin-awan atol sa gipahigayon nga Joint Philippine National Police-Armed Forces of the Philippines-Local Chief Executives meeting kagahapong adlawa sa lungsod sa Kiamba, Sarangani Province may kalabotan sa operasyon sa kapulisan ngadto sa hugpong sa 105th base command sa Moro Islamic Liberation Front nga bag-ohay lamang misunog sa barangay hall, day care center ug laing tulo pa ka mga edipisyo sa barangay Gasi. Usa na ka search ug manhunt operation ang gihimo karon sa mga pulis batok sa mga rebelde nga gituohang anaa lamang sa palibot. (kuha ni Russtum Pelima/sarpio/pbanat caption) HEADLINER: Ex-mayor Reganit, mobalik sa pulitika sa Maitum! Kumpirmado na gyud nga ang kanhing mayor ug maoy gitudlong suspek sa kamatayon ni anhing Maitum, Sarangani Mayor, George Yabes nga si Felix Reganit mobalik na gyud sa renda sa panggamhanan karong umaabot nga 2010 elections human nakadesisyon kini nga mopapili pag-usab isip alkalde sa maong lungsod. Sa usa ka pamahayag ni Reganit sa ABSCBN, giklaro niini nga buot lamang niining mahimong campaign manager sa panahon sa eleksyon apan, aron mapamatud-an nga inosente siya sa mga pasangil nga matod pa siya ang nagpasi-ugda sa kamatayon ni ex-mayor George Yabes, kinahanglan gyud niini nga mobalik sa natad sa pulitika. Kung sa mga milabay nga adlaw, nagtago-tago si Reganit tungod sa kabalaka nga adunay dautang mahitabo kaniya human nga gibawi sa korte sa Sarangani ang Warrant of Arrest sa kasong murder ngadto kaniya, mipatim-aw na gyud kini sa publiko partikular na sa Maitum. Si Reganit kuyog ang pipila ka mga iladong pulitiko sa Sarangani nanghatag ug mga gamit sa eskwelahan sama sa bag ug uban pa sa usa ka tunghaan didto. Gipanghatag ni Reganit ang mga school bags nga may pangalan ni WBC Lightweight Champion, Manny Pacquiao nga una ng nagdeklarar nga mag-kongresman sa nag-inusarang distrito sa lalawigan sa Sarangani. Hinuon, gitin-aw ni Reganit nga panahon nga iyang makita nga maayo ang pagpadagan sa kasamtangang administrasyon sa Maitum, dili na lamang siya modagan ug dili na niya ‘katalohin’ ang renda sa panggamhanan ni Mayor Elsie Perret. Kahinumduman nga halos duha pod ka tuig nga nagtago-tago si ex-mayor Reganit human nga siya ang gitudlo nga mastermind sa kamatayon ni Yabes. Apan ang usa sa mga suspek nga anaa pa gihapon sa Sarangani Provincial Jail nagtudlo usab ngadto sa pamilyang Perret nga maoy financier sa paglikida kang Yabes. Paspas hinuon nga mitubag ug gipanghimakak ni Maitum Mayor, Elsie Perret ang maong pasangil sa nadakpang suspetsado. Matod ni Perret, dugay na nga na-istoryahan sa pamilyang Yabes ug Perret ang kabahin sa maong kaso ug nag-establisar gyud nga wala sila’y kalambigitan sa pagpusil-patay sa iladong alkalde sa Maitum. *8888888 166 ka mga kaso gisang-at batok Umbra Kato Moabot gyud ngadto sa 166 ka mga kasong kriminal ang gipasaka sa Task Force Palma-PB sa PNP-12 ngadto kang Kumander Ameril Umbra Kato ug mga sakop niini sa 105th Base Command sa MILF. Sa usa ka report nga gipaabot sa Periodico-Banat sa PNP-12, gibutyag gyud sa kapulisan nga tungod sa pagpanghasi sa grupo ni Kato miabot na gyud karon sa 16,855 ka mga biktima ang anaa karon sa mga evacuation centers ug may laing 10,100 pa ang anaa sa gawas sa mga evacuation sites. Ang TF PALMA-PB nga nagkahulogan nga Task Force Pigcawayan-Aleosan-Libungan-Midsayap-Alamada-Pikit-Banisilan mao gyud ang pinakasentro sa kagubot human nga midesisyon ang korte suprema nga ibasura ang sabot-sabot sa Gobyerno ug sa hugpong sa MILF nga Memorandum on Agreement-on Ancestral Domain (MOA-AD). Sa talaan sa TF PALMA-PB Legal Offensives nga gipangunahan ni PCSUPT, Attorney, Felicisimo Khu, Jr., ang 166 ka mga kason gilangkuban sa 68 ka mga arson cases, 62 ka robbery in band cases, 4 murder, 18 attempted murder, 2 serious illegal detention,2 grave coercion, 4 malicious mischief, 3 qualified thefts, 2 anti-cattlerustling ug usa ka frustrated murder. 125 sa mga kaso nga gisang-at sa grupo ni Kato nahitabo sa lungsod sa Aleosan, Cotabato. Sa iyang pamahayag, giklaro gyud ni TF-PALMA-PB Overall Commander, PCSUPT Felizardo Serapio, Jr., nga ang kasabotan sa kalinaw kinahanglan gyud nga nakabase sa hustisya ug aron mapamatud-an nga sinsero ang MILF, dapat gyud nga ila ng ihatag ngadto sa kagamhanan ang mga kumander niini nga sila si Umbra Kato, Bravo ug Pangalian aron atubangon ang mga akusasyon ngadto kanila. “The accused were historically the recalcitrant MILF members. We have enough troops to address the situation, protect the people and prevent the LMGs from further terrorizing the people. PNP Regional Mobile Groups from regions 6, 8, and 11 augmented the 8th PNP SAC, RMG 12 and the local police. The troops regularly conduct police visibility, especially prophylactic patrols, one kilometer radius from the established strongpoint detachments,” dugang saysay pa ni Serapio. (pbanat news desk) *888888 DTI-Sarangani, milihok na batok ‘milk scare’ Wala gyud magpa-ulahi ang buhatan sa Department of Trade and Industry sa Sarangani Province ug mihimo usab kini ug mga pagpangsusi ngadto sa mga nag-unang establisyemento sa tibuok lalawigan. Niadtong milabay nga adlaw, ginagunahan mismo ni DTI Provincial Director Nenita Barroso kuyog ang mga representante sa Bureau of Food and Drugs ug Provincial Agriculture Office ang pag-inspeksyon sa mga tindahan sa sentro sa lalawigan, ang lungsod sa Alabel. Mihimo gilayon ang grupo ni Barroso ug mga inventory sa mga baligyang pagkaon ilabi na kadtong mga produkto nga gihimo gikan sa nasod Tsina partikular na ang mga gatas ug may mga gatas nga sangkap. Ang kalihokan usab sa DTI gisubay sa kasaulogan sa Consumer Welfare Month nga gisaulog sa tibuok nasod. (pbanat news desk) *88888888 2 ka taga-LTO, sikop sa kotong! Wala na gyud mahimo ang duha ka mga empleyado ug traffic enforcers sa buhatan sa Land Transportation Office (LTO) didto sa syudad sa Koronadal, South Cotabato human nadakpan sa akto sa mga pulis pinaagi sa usa ka entrapment operation nga nangotong sa mga motorista niadtong milabay nga adlaw. Sa report nga gipaabot sa PNP-12, nadakpan gyud sa akto ang mga suspek nga nailang sila Salipuna Kanibpal Mangudadatu, 41 anyos, organic personnel sa LTO Koronadal District ug Denzer Perez, 33 anyos ug usa ka LTO Deptized Agent. Matod ni South Cotabato PNP Provincial Director, PSSUPT Robert Kiunisala, usa ka team sa Intelligence Office ang mipahigayon ug entrapment operations human nga daghang mga reklamo ang nadawat sa iyang buhatan gikan sa mga motorista tungod sa grabeng pagpangotong nga gihimo sa duha ka mga nadakpan. Malampusong nakuha gyud sa duha ka mga taga-LTO ang kuwarta nga nagkantidad ug P1,280.00, usa ka kalibre .45 Colt MKIV pistol, lima ka mga buhing balas a .45, 2 ka magazine assembly, 2 ka botelya sa White Castle Whisky u gang P500 nga marked money. Gi-andam na karon ang kasong bayolasyon sa anti-graft and corrupt practices act, illegal possession of firearms and ammunitions ug uban pang mga administratibong kalapasan. Tungod sa malampusong pagpakgang sa duha ka mga kotong boys sa LTO nahimuot gyud ug maayo si Central Mindanao PNP Chief, PCSUPT Felizardo Serapio, Jr. “The problem (on kotong) is not prevalent in our region, but we want to have a pro-active approach on the matter. Anybody who might forget the policy will be reminded,” pamahayag ni Serapio. Tumong lamang sa kapulisan nga mahatagan ug igong proteksyon ang mga motorista, tindera, negosyante ug mga biyahedor gikan sa mga kurakot nga pulis ug empleyado sa gobyerno. “We are encouraging them to give information para masugpo natin ang problema sa kotong. Sabi nga nila pagka nagpapapatuloy ang kotong, tataas ang presyo ng mga bilihin dahil babawiin din ng mga negosyante ang cost o pera na kanilang ibinibigay sa mga nagko-kotong,” panapos pa ni PCSUPT SERAPIO.(pbanat news desk) *888888 Taga-Maitum, dismayado sa pagbawi sa Warrant of Arrest ni Reganit Dismayado karon ang pipila ka mga residente sa lungsod sa Maitum, Sarangani Province human nga gibawi sa korte ang orden de aresto nga gipakanaug niini batok sa nag-unang suspek sa kamatayon sa anhing mayor sa maong lungsod nga si George Yabes. Sa usa ka pamahayag, mismong si Maitum Mayor, Elsie Perret nagpatin-aw gyud kung unsa ka dismayado ang katawhan sa nahitabong pagbawi sa korte sa orden de aresto sa kanhing mayor nga si Felix Reganit. ‘Nangyari nga naman, dismayado masyado ang mga tao dito,’ hamubo nga pamahayag ni Perret. Sa pagkakaron nahibaloan nga plano na sa pamilyang Yabes nga mohimo ug petisyon ngadto sa korte nga ibalik ang warrant of arrest ni Reganit. Hinuon, wala pa mohatag sa ilang opisyal nga pamahayag ang pamilya sa gipusil nga alkalde apan, daghan gyud ang nadismaya ilabi na ang mga die-hard supporters sa napatay nga mayor. Sa iyang bahin, buot usab ni ex-mayor Felix Reganit nga mapamatud-an nga wala gyud siya’y sala ug inosente siya sa kasong pagpatay ngadto kang Yabes hinungdan nga nagplano na kini karon ug pagbalik sa natad sa pulitika karong umaabot nga 2010 elections. (pbanat news desk) *8888888

Sakop sa CIDG, gipusil-patay

Wala na gyud kinabuhi nga miabot sa balay-tambalanan ang usa ka sakop sa Criminal Investigation and Detection Group (CIDG-XI) nga nadestino didto sa Rehiyon XI, human kini gipusil-patay sa dakbayan sa Cotabato niadtong milabay nga adlaw. Sa report ni Cotabato City PNP Director, PSSUPT Willie Dangane, gibutyag niini nga usa ka SPO1 Bonifacio Sales, sakop sa CIDG-XI ang kalit lamang nga gipusil samtang nagsakay sa iyang motorsiklo sa may Notre Dame Avenue sa maong dapit. Dugang ni Dangane nga ang duha ka mga suspek nagsakay usab ug motorsiklo human mipusil sa biktima gamit ang usa ka M-16 Armalite rifle. Pagka-igo sa biktima, mikanaug pa ang usa sa mga wala mailhing suspetsado ug gikuha ang .45 nga pistola sa biktima ug gipusil pa ngadto kaniya hinungdan sa iyang hinanaling kamatayon. Padayon pang gigukod karon sa Cotabato City PNP ang mga responsable nga yano lamang misibat pagkahuman sa insidente. (pbanat news desk) *888888 Babaye, naglaslas ug pulso tungod sa selos Grabe gyud diay ang gugma nga gibati sa usa ka alyas Inday nga taga-Lagao ning dakbayan ngadto sa iyang uyab sanglit mikalit lamang kini ug hukom nga maglaslas sa iyang pulso tungod sa grabeng selos. Ang report nga nakuha sa Periodico-Banat kagahapon sa General Santos City Emergency Hospital nagbutyag nga gidali ug dala sa mga kabanay si alyas Inday human nga nasuta niini nga grabe na kaayo kadako ang hiwa sa pulso niini tungod sa matod pa grabeng pagpanelos ngadto sa iyang uyab. Matod sa Lagao PNP, naghilak-hilak pa si alyas Inday tungod gidudahan niini nga ang iyang uyab aduna nay lain nga gimahal hinungdan nga gihimo niini ang pagpakamatay apan napakyas tungod kay gidali ug dala sa balay-tambalanan. Padayon pa karon nga gi-obserbahan ang kahimtang sa biktimang naglaslas ang pulso tungod sa sobrang gugma ug selos. Hangtod karon nagpabilin pa sa General Santos City Emergency Hospital ang biktima. (pbanat news desk) *8888888 AFP Chief, mibisita sa SOCSKSARGEN Mibisita niadtong milabay nga adlaw ang labaw sa Armadong Kusog sa Pilipinas aron pormal nga kamustahon ug hatagan ug moral ang mga sundalo sa SOCSKSARGEN Region nga padayon sa pakigbisog batok sa mga rebeldeng moro sa Moro Islamic Liberation Front (MILF). Si AFP Chief of Staff, General Alexander Yano sa pagbisita niini sa mga kampo sa militar sa Sultan Kudarat nanghatag pa ug mga cellphone loads aron may magamit ang mga sundalo sa pagkontak sa ilang tagsa-tagsa ka mga pamilya. Si Yano nga ilado kaayong personalidad dinhi sa SOCSKSARGEN sa wala pa mahimong pinakataas nga opisyal sa AFP, mao ang kanhing brigade commander sa 601st Infantry Brigade nga nakabase sa Pulutana, Malungon, Sarangani Provice. Namahayag pa si Yano nga nalipay gyud kini sa gipakitang lihok sa mga sundalo sa SOCSKSARGEN ilabi na sa pagkontrolar ug pagpakgang sa mga pagpangatake sa mga rebeldeng Moro. ‘Napakaganda ng pinakita nila and they did not just react to situation but pre-empted and have been proactive sa kanilang mga desisyon,’ pamahayag pa ni Yano ngadto sa iyang mga sundalo. Usa ka panagtigom sa kampo sa mga sundalo sa Pulutana, Sarangani Province ang gihimo sa pag-abot ni Yano aron lamang mahibaw-an sa AFP Chief of Staff kung unsa pa ang gikinahanglan sa mga tropa sa gobyerno ning bahin sa Mindanao. (pbanat news desk) *88888888 General Yano, gikantiyawan si Kumander Kato Human nga mipagawas ug pamahayag nga gisundayag sa Youtube, usa ka internet website si Kumander Ameril Umbra Kato may kalabotan sa tinguha niini nga makigiyera sa kagamhanan aron lamang ma-angkon ang kalinaw, gitubag ug daw gikantiyawan pa kini sa pinakataas nga opisyal sa armadong kusog sa Pilipinas nga si Four-Star General Alexander Yano, atol sa pagbisita niini sa SOCSKSARGEN niadtong milabay nga adlaw. Matod ni Yano usa ka ‘cheap’ nga propaganda ang gipakatag karon ni Kato nga nagpamatuod lamang nga huyang na kini ug wala nay kontrol sa iyang liderato sa puwersa niini. ‘Napakamura na propaganda. Very cheap propaganda stand na ginagawa. Hindi na nga kailangang pansinin because alam mo pag lalabas ka na ganun trying to show that you are strong but it only shows that you are weak,’ pamahayag pa ni Yano. Hinuon nabalaka si Yano sa mga padayon nga black propaganda nga gipakatag sa pipila ka mga kontra sa militar may kalabotan sa matod pa pagpanunog ug pagpangawat sa mga sundalo sa pipila ka mga dapit diin gihimo ang padayon nga opensiba sa sundalo partikular na sa lungsod sa Shariff Aguak, Maguindanao Province. ‘Have they proven na ganun? Ano naman ang rason na ang military magsusunog. Ano naman ang rason na ang military magnanakaw,’ tubag ni Yano. Gitin-aw pa sa opisyal sa AFP nga magpadayon gihapon ang ilang operasyon batok sa mga rebeldeng Moro nga padayon nga nagsabwag ug kadaut ug kalisang sa mga komunidad sa SOCSSKSARGEN Region. (pbanat news desk) *8888888 Opisina sa Caltex nasunog sa Polomolok Naugdaw gyud ang buhatan sa higanteng kompanya sa lana nga Caltex Philippines didto sa lungsod sa Polomolok, South Cotabato niadtong milabay nga adlaw. Sa report nga nakuha sa Periodico-Banat, kalit lamang nga adunay nadungog nga pagbuto sa buhatan sa Caltex ug mikuyanap ang kalayo tungod usab sa mga nakapondo nga lubricant oil sulod sa buhatan. Matod ni Chona Dalguntas, ang bookkeeper sa Caltex Polomolok, igo lamang siya nakagawas sa opisina aron motabang sa mga laing empleyado nga nagtubil sa mga sakyanan apan kalit na lamang nga mi-ulbo ang ilang opisina. Maayo na lamang kay paspas nga miabot ang mga bumbero sa Polomolok ug gidali ug patay ang kalayo nga malagmit maoy mahimong mitsa aron ang gasolinahan nga tapad niini nga iya gihapon sa Caltex madamay. Maayo gyud ang pagka-ugdaw sa mga computer, aircon, furnitures ug uban pang mga kagamitan sa opisina lakip na ang mga stocks niini nga lubricant oils. Tungod kay fire proof ang kaha sa buhatan, wala hinuon maapektuhi ang kuwarta nga nakatago sulod sa kaha de yero. Gibana-banaang moabot gyud sa kapin P1.5 milyones ang nahimong danyos sa maong insidente. Sa pagkakaron, padayon pang gi-imbestigahan sa Bureau of Fire and Protection and maong insidente sanglit may mga testigos ang nag-ingon nga nagsugod ang pagdilaab sa kalayo sa dapit diin nahimutang ang computer set sa Caltex. (pbanat news desk) *888888888

periodicobanat (oktubre 7, 2008)

MAITUM TRIPLETS- Mao kini ang mga bag-ong residente sa lungsod sa Maitum, Sarangani Province. Ang triplets nga sila Gary (2.1 libras), George (2 libras) ug Greg (1.6 libras) Adam nga gipanganak sa Barangay New La Union niadtong Oktubre 3, nanginahanglan gyud ug suporta ug tabang gikan sa mga malumo ug kasing-kasing tungod yano ug anaa sa kawad-on ang mga ginikanan sa tulo ka mga batang anghel. Sa kasamtangan, ang DIAGAN COOPERATIVE HOSPITAL sa Gensan ang naghatag ug ayuda sa mga bata. Alang sa inyong mga donasyon mamahimo kamo mokontak sa MAITUM MUNICIPAL HALL, pinaagi ni MAYOR ELSIE PERRET. (kuha ni afren de Guzman/maitum info office/pbanat caption) *8888888 Mga coop sa SOCSARGEN, i-boycott ang National Coop Summit Nagpadayag karon sa ilang dakong kadismaya ug kapungot ang kinatibuk-ang mga sakop sa mga kooperatiba nga naka-rehistro sa Cooperative Development Authority (CDA) dinhi sa SOCSARGEN human nga kalit lamang gi-usab ang venue sa umaabot nga National Coop Summit karong Oktubre 24 nga unta dinhi man sa Gensan himuon. Tungod sa kalit nga desisyon sa mga nagpaluyo sa National Coop Summit, mismong ang kapin sa 20,000 ka mga miyembro sa nagkalain-lain nga mga kooperatiba sa SOCSARGEN Region ang nanganti nga ilang i-boycott ug dili motambong sa National Coop Summit sa Pili, Camarines Sur, ang bag-ong lugar nga gihulip sa Gensan isip host city. Kagahapong adlawa, gipadayag gyud sa mga miyembro sa kooperatiba sa SOCSARGEN pinaagi sa usa ka motorcade ug programa ang ilang kapungot ug kalagot human nga wala’y konsultasyon nga nahitabo sa pagbalhin sa dapit nga himuon ang National Coop Summit. Bisan ang Assistant Regional Director sa Cooperative Development Authority sa rehiyon (CDA-12) nga si Watanabe Ruales, mihatag usab sa iyang suporta sa mga miyembro sa kooperatiba nga mi-alkontra gyud sa kalit-kalit nga desisyon sa mga organizers. “Malaking sampal ito sa taga Socsargen dahil nakaprepara na sila para paghandaan nila itong malaking activities subalit biglang iniba ang venue at walang konsultasyong nangyari sa kanila”, sulti ni Ruales. Gi-awhag pa ni Ruales ang mga kaubanan niini nga mga director sa CDA sa tibuok nasod nga suportahan ug i-boycott usab ang umaabot nga National Coop Summit sa Camarines Sur. Nag-unang rason sa mga nagpaluyo sa maong kalihokan mao ang bahad sa kalinaw hinungdan nga ilang gi-usab ang venue ug didto na sa Luzon nasabotan nga ipadayon ang karong tuig nga panagtigom sa tanang mga kooperatiba sa nasod. Ang orihinal nga plano mao ang dakbayan sa Heneral Santos ang mamahimong host sanglit ang syudad man ang nakadaug sa gihimong bidding alang sa host city. Namahayag usab si Art Aller, ang presidente sa Federation of Coperatives sa rehiyon nga usa gyud ka dako nga insulto sa mga taga-SOCSARGEN ang gihimo sa ma organizers ug nasayod gyud ang tanan nga ang dakbayan sa Gensan, layo ra kaayo sa mga nahitabong kagubot ug wala’y angay kabalak-an sa seguridad tungod kay sa wala pa ang gitakda nga National Coop Summit, daghan ng preparasyon ang gihimo sa mga opisyales sa dakbayan. “Kaya nga nababahala kami dito dahil halos handa na ang lahat ng mga importanteng bagay para sa National Summit subalit bigla itong na-transfer na walang pasabi-sabi sa aming mga opisyal kaya nabigla kami at nagreact ang lahat na mga cooperative members” pamahayag ni Aller. Ang kinatibuk-ang mga miyembro sa kooperatiba sa SOCSARGEN nagkasabot usab nga mohimo ug susama sa National Coop Summit nga gitawag ug 1st Philippine Cooperative Team Shop nga magbukas usab karong Oktubre 24-25, 2008. ‘The whole members of the cooperatives in the SOCSARGEN Area have agreed to hold the 1st Philippine Cooperative Team shop on October 24-25 para hindi masayang ang pawis ng mga miyembro kaya nagsimpatiya na rin sa amin ang ibang director ng kooperatiba at sasama sila sa gagawing aktibidades,’ pagtin-aw ni Aller. Sa laing pamahayag usab ni Assistant Regional Director, Watanabe Ruales gikumpirma niini nga daghang mga kooperatiba sa nasod ang naniguro na ug mihatag sa ilang kumpirmasyon nga motambong sa 1st Philippine Cooperative Team Shop dinhi sa dakbayan ug dili sila motambong sa National Cooperative Summit sa Pili, Camarines Sur. Si Gensan City Mayor, Jun Acharon usab mihatag sa iyang todo nga suporta ngadto sa mga kooperatiba alang sa pagpahigayon sa 1st Philippine Cooperative Team Shop. (report gikan kang poldo bernaldez/pbanat news desk) *888888888 Libreng ligation, gipahigayon sa Maitum Usa gyud ka libre nga tubal ligation ngadto sa mga babaye sa lungsod sa Maitum, Sarangani Province ang gipahigayon sa Diagan Cooperative Hospital nga nakabase sa syudad sa Gensan kagahapong adlawa. Sa report nga naka-abot sa Periodico-Banat, mismo si Dr. Renato Diagan ang tag-iya sa maong balay-tambalanan kuyog ang iyang mga staff ang mipahigayon sa libre nga tubal ligation ngadto sa 18 ka mga babaye sa George Y. Yabes Maternity Home. Ang ligation program usa ka prayoridad nga programa sa lokal nga kagamhanan sa Maitum ug anaa sa ikaduhang tuig sa kasamtangan. Kahinumduman, ang lungsod sa Maitum pinaagi sa George Y. Yabes Maternity Home naka-ani gyud ug mga pasidungog dili lamang sa Rehiyon 12 kundili didto mismo sa Malacanang isip child-friendly maternity clinic. Ang Maitum nahimong Hall of Famer na usab sa Most Child-Friendly Municipality sa tibuok nasod. (pbanat news desk) *88888888 HEADLINER: Mga residente sa Kiamba ug Maitum, mosukol na sa mga rebeldeng Moro Namahayag karon ang kadaghanang mga residente sa duha ka mga lungsod sa Kiamba ug Maitum sa lalawigan sa Sarangani nga naapektuhan sa pagpangatake sa mga Lawless MILF Groups (MLG) nga andam na silang mosukol ug modepensa sa ilang mga puy-anan panahon nga mobalik na usab ug atake ang mga rebeldeng Moro nga sakop sa 105th Base Command sa Moro Islamic Liberation Front (MILF). Sa report nga nakaabot sa Periodico-Banat, adunay pagbahad nga gihimo ang mga misulong nga rebeldeng Moro ngadto sa mga residente sa Barangay Gasi, Kiamba nga ilang sunogon ang ilang mga panimalay kung dili sila mopahawa sa ilang barangay. Apan, ang mga lokal nga opisyales sa Kiamba pinaagi ni Mayor Rommel Falgui nagdumili kanila nga mopahawa. “Talagang lalaban na rin sila yung mga tao natin sa Gasi,” butyag pa ni Mayor Falgui sa usa ka interview kaniya sa ABSCBN. Dili lamang ang mga residente sa Gasi ang nagpadayag sa ilang pagsukol sa mga rebeldeng mga Moro apan lakip na usab ang silingan nga lungsod sa Maitum. Matod ni Mayor Elsie Perret grabe na karon ang ilang gihimong pagpangandam panahon nga mobalik ug sabwag ug terorismo ang mga dautang elemento. Gibutyag pa ni Perret nga aduna nay gihimong hiningusgang community defense system luyo sa mga presensya sa mga sundalo sa tulo ka mga lungsod sa MAKIMA area. “We just make sure that we are prepared for it if they decide to attack our place, sigurado kami na prepared ang mga tao naming dito,’ paniguro nga pamahayag sa babayeng mayor sa Maitum nga si Elsie Perret. Kagahapong adlawa, usa ka Peace and Order Council Meeting ang gipahigayon aron hisgutan ang angay nga buhaton panahon nga mobalik ang mga dautang elemento. Matod sa report ang mga miyembro sa Peace and Order Council nagsulti na nga andam na silang mosukol kung gikinahanglan ug gitawag na sa panahon. Tungod sa pinakabag-ong insidente sa Barangay Gasi ug sa Kling Plantation sa Kiamba diin duha ka mga sibilyan ang na-angol tungod sa pag-atake sa mga sakop sa 105th Base Command sa MILF, gidugangan karon ang puwersa sa mga sundalo sa MAKIMA Area nga nagpadayon usab sa ilang hot pursuit operations batok sa mga misulong sa Gasi ug Kling. (pbanat news desk) *88888888 State of Calamity gideklarar sa Maasim Gibutang na karon ubos sa State of Calamity ang lungsod sa Maasim sa Sarangani Province tungod sa sunod-sunod nga pagpangatake sa mga terorista nga hinimuan sa mga rebeldeng Moro nga sakop sa Moro Islamic Liberation Front (MILF). Sa pinakaulahi nga sesyon sa Sangguniang Bayan sa Maasim, ang mga konsehal sa lungsod mideklarar ug State of Calamity human nga gisulong ug giransak ang mga tindahan sa Maasim nga naka-angin pa gyud ug duha ka mga kinabuhi sa sibilyan. Gisulong usab ang munisipyo ug ang police station niini nga nauna ng gilabayan ug granada duha ka bulan na ang milabay. Apan, matod ni Provincial Board Member Nicanor Ballan, dili na kinahanglan nga modekalarar ug State of Calamity sa Maasim tungod kay una ng nagdeklarar ang mga sakop sa Sangguniang Panlalawigan nga ibutang sa State of Calamity ang tibuok probinsya niadto pang bulan sa Hunyo. “The province declare under the State of Calamity and all the municipalities that constitute the province need not pass a resolution declaring their municipality under the State of Calamity,’ matod ni Board Member Ballan nga gibase usab sa iyang committee report. Nakauna ug deklarar ug State of Calamity ang probinsya niadtong Hunyo tungod usab sa danyos nga nahiaguman niini sa bagyong Frank nga mihatod ug kusog nga ulan ug mga pagbaha sa halos tanang dapit sa Sarangani. “Ang main purpose of stating this State of Calamity is for the purpose of utilizing the five percent calamity fund” dugang ni Ballan. Hinuon wala mikontra ang mga board members sa sugyot ug hangyo sa mga taga-Maasim ug walay nga kabalak-an tungod kay anaa naman sa State of Calamity ang lalawigan makatagamtam gihapon ug ayuda ang Maasim gikan sa five percent calamity fund. Dugang pa sa board members nga panahon nga magkulang ang pondo alang sa rehabilitasyon sa mga dapit diin may dakong epekto ang pagpangatake sa Maasim, puwedeng mohimo ug Supplemental Budget aron lamang mapondohan ang mga proyekto ug programa sa Maasim. (pbanat news desk) *8888888888

Info Command Center, ania na sa Gensan! Aron mas mahimong epektibo pa gyud ang kampanya batok sa pagpakgang ug mga pagpamomba sa dakbayan, nagkahiusa karon ang nagkalain-lain nga sangay sa kagamhanan ug nagmugna ug Information Command Center. Sa usa ka press conference niadtong milabay nga adlaw, pormal nga gi-anunsyo sa General Santos City PNP, kuyog ang Philippine Information Agency, Joint Task Force Gensan ug ang media sa bag-ong grupo nga maoy magtutok sa mga insidente sa pagpamomba. Matod ni Gensan City PNP Director, PSSUPT Robert Po, gikinahanglan gyud karon sa dakbayan ang todo nga suporta sa katawhan ug gilayon nga mohimo ug paspas nga paghatag ug impormasyon sa mga awtoridad. Rason nga ang Philippine Information Agency, ang nag-unang ahensya sa gobyerno sa paghatag ug impormasyon ang gilangkub sa maong proyekto. Sa bahin sa mga pulis, giklaro ni Po nga dili gyud mamahimong epektibo ang bisan unsa man nga mga plano sa kapulisan ug kasundalohan sa pagsumpo sa krimen kung mismo ang katawhan wala masayon sa angay nga buhaton tungod sa kakulang sa impormasyon. Sa nahisgutang forum, giyagyag usab ang nagkalain-laing klase sa mga bomba nga nadiskubrehan sa mga awtoridad sa mga nakalabay nga insidente diin daghang mga biktima ang naihap. Pinaagi sa pag-ila sa mga bomba, makasiguro gyud ang mga pulis ug sundalo kung kinsa ang angayon nga basulon ug gukdon sanglit ang mga nagkadaiyang grupo sa mga terorista may ginatawag nga signature bombs. Nanghinaut pa si Po nga ihatag gyud sa katawhan sa syudad ilabi na ang media ang sakto nga impormasyon aron dili magkaguliyang sa umaabot nga panahon. (pbanat news desk) *8888888 Taga-Gensan, labing unang Grand Little Dreamer Malipayon ug napuno gyud sa pagmaya ang mga taga-Gensan human ang usa ka bata nga anak sa Gensan ang nahimong mananaug sa pinaka-unang Pinoy Dream Academy Grand Little Dreamer, usa ka pakontes sa higanteng network nga ABSCBN. Kagabii, gideklarang mananaug sa Pinoy Dream Academy Little Dreamers si Philip Ceasar Nadela, 9 anyos ug usa ka estudyante sa SDA Elementary School sa Barangay Calumpang ning dakbayan. Nakakuha ug kapin sa 190,000 ka mga text votes si Nadela gikan sa iyang mga supporters nga kadaghanan mga kababayan niini nga mga Generals. Gikanta ni Philip ang You Raise Me Up niJosh Groban. Sa wala pa nahitabo ang botohan mismo ang Sangguniang Panlungsod mipasa ug usa ka resolusyon nga nagpadayag sa todo nga suporta sa mga Generals ngadto sa batang si Nadela. Bisan si Gensan City Mayor Pedro Acharon, Jr., mihatag ug mando ngadto sa tanang mga kapitanes nga awhagon ang mga tawo sa kabarangayan nga ihatag ang ilang suporta ngadto kang Nadela pinaagi sa pagboto sa text. Ang hugpong usab sa PNP-12 ubos ni PCSUPT Felizardo Serapio grabe usab ang gihimong text brigade aron lamang makakuha ug boto si Philip. Ang amahan ni Philip usa ka sakop sa Gensan City PNP nga anaa sa Barangay Fatima. Ang kadaugan sa batang si Philip naghatag kaniya ug P1 milyones nga cash, kaugalingong house and lot sa Manila, ug video ug audio showcase. Tungod sa kagaugan ni Philip, nabutang na usab sa mapa sa mga banggi-itan ang dakbayan nga posibleng mamahimong sumbanan ug inspirasyon sa mga Generals. Ginahulat na lamang sa dakbayan ang pag-abot sa bag-ong mananaug nga si Philip Nadela aron hatagan kini ug pasindugog. (pbanat news desk) *8888888 Multi-milyon nga pondo alang sa Gen. Santos Park Multi-milyon ka pesos na usab ang gigahin nga pondo sa city hall alang sa renobasyon ug pag-ayo sa General Santos Park o mas ilado nga Carlos P. Garcia Park. Sa usa ka report nga nakuha sa Periodico-Banat nahibalo-an nga P22.5 milyones gyud ang gitagana sa Bids and Awards Committee sa city hall alang sa maong proyekto. Ang Dellosa Design Build Services ang nahimong mananaug ug pormal nga sugdan ang maong proyekto karong Oktubre 8, 2008 ug gilauman nga matapos sulod sa 120 diyas o hangtod sa Pebrero 5, 2009. Ang bag-ong hitsura sa General Santos Park langkuban sa mga bag-ong lampposts, cobbled pathways, plant boxes ug landscapes nga haum kaayo sa pamilya. (pbanat news desk)

*8888888888

Mga negosyante, mi-angal sa CCTV Ordinance Mi-ani karon ug pagsaway ang bag-ohay pa lamang nga napasar nga City Ordinance may kalabotan sa pagmuntar ug mga Closed Circuit Television (CCTV) cameras sa tanang mga establisyemento nga buot magnegosyo sa dakbayan. Tungod sa maong pag-angal, nagdesisyon karon ang mayorya sa konseho sa Gensan nga estudyohan pag-usab ug mohimo ug laing committee hearing aron mahashasan ug maayo ang na-aprubahan na nga ordinansa. Sa CCTV Ordinance, ang mga negosyante nga buot mag-abli ug mag-renew sa ilang mga negosyo sa syudad kinahanglan gyud nga makabaton ug mga Closed Circuit Television (CCTV) cameras aron mamahimong depensa sa mga krimen nga posibleng mahitabo sama sa hold-up, pinusilay, kidnapping ug uban pa. Tungod sa maayong tumong niini, miuyon gyud ang mga konsehales ug nahimo kining ordinansa apan, halos usa pa ka bulan lamang, may mga pag-angal na gikan sa mga negosyante. Matod sa mga negosyante, dili sila babag sa maong balaodnon sanglit ang ilang kaluwasan ug kasegurohan sa ilang patigayon mao ang nag-unang tumong apan tungod sa grabe kaayo kabug-at ug kamahal sa usa ka set lamang nga CCTV Camera, maglisod gyud ang yano nga negosyante partikular na ang usa ka carenderia. Sa pagkakaron, anaa sa tag-P10 mil ang usa lamang ka CCTV camera wala pay labot ang mga monitors ug bayronon sa koryente niini. Apan, luyo sa mga pag-angal, midepensa gihapon ang naghimo sa maong balaodnon nga si Konsehal Menardo Avila. Matod ni Avila dili na kinipuwedeng ibalik sa komitiba sanglit aprubado na kini ug adunay mga CCTV cameras nga nagkantindad lamang ug tag-usa ka libo ka pesos. Pero, si Konsehal Jong Gonzales nga iladong ka-alyado ni Avila, mihatag usab sa iyang pamahayag ug nag-ingon nga puwede gyud ang mga CCTV cameras pero kinahanglan siguro nga angayan nga pili-on ang mga negosyante nga maka-kaya sa dakong galastoson sa pagpalit sa maong mga ekipo. Misegunda usab si Konsehal Eduardo Leyson III nga mas labing maayo nga tan-awon na lamang ang capital ug ibutang sa bracket system ang mga negosyante aron masayran kung kaya ba gyud niini ang magpalit ug CCTV Camera. Ang ordinansa sa CCTV nagmando gyud nga dili puwedeng mahatagan ug business permit ang usa ka establisyemento panahon nga dili kini makabaton ug CCTV Cameras. Sa kadugayan nga debate hinuon, mi-uyon na lamang si konsehal Avila nga estudyohan una sa komite ang maong ordinansa. (pbanat news desk) *88888888

periodicobanat (oktubre 6, 2008)

PANAMASTAMAS—Makita dinhi ang usa ka sunog nga bandera sa Pilipinas nga na-apil sa pagsunog sa mga rebeldeng sakop sa 105TH Base Command human nga gisulong niini ang barangay Gasi sa Kiamba, Sarangani Province tungang gabii sa Oktubre 4. Si Sarangani Vice Governor, Steve Solon milakaw palayo sa daycare center nga gi-apil pod sa pagsunog sa mga rebelde. Wala nay nahimo ang mga residente sa Gasi kundili mao na lamang ang paglantaw sa mga edipisyo nga gipangsunog sa mga rebeldeng Moro. Si Kapitan Mariano Fado kuyog ang usa ka guwardiya nga igo na lamang nagtindog sa kanhing barangay hall, barangay stage, daycare center ug waiting shed nga maayong pagpanamastamas sa mga sakop sa 105th Base Command sa MILF. (mga kuha nila Jun Ramos,Allan de Lima,Ariel Decena/sarpio/pbanat caption) *88888888 PAGE 3 HEADLINER: Day Care center, Brgy. Hall sa Kiamba, gisunog sa MILF! Mipakita na usab sa ilang kabangis ang rebeldeng grupo sa Moro Islamic Liberation Front (MILF) sa lungsod sa Kiamba, Sarangani Province human nga ilang gisunog ang usa ka day care center, ang usa ka barangay hall, barangay stage, waiting shed ug tindahan sa Barangay Gasi, tungang gabii sa Oktubre 4. Sa inisyal nga imbestigasyon, kalit na lamang nga mi-abot bandang alas dose beinte ang kapin mga 30 ka gidudahang mga sakop sa 105TH Base Command sa MILF. Matod ni Barangay Gasi Chairman, Mariano Fado, duha ka mga lalaki ang misulod na lamang sa kural sa barangay hall, nga nahimutangan usab sa daycare center, barangay stage, waiting shed ug Tindahan sa Kalinaw (Store for Peace). Ang uban nga mga kaubanan, hinuon mao ang nagpalibot sa mga ganghaan. "Siguro gasolina ang ginamit nila kasi bigla man nag apoy," matod ni kapitan Fado. Pagkahuman nga nakita na nga nagdilaab ang mga edipisyo sa barangay yano lamang nga nanghawa ang mga suspek ug nagpabuto. Wala hinuon gikareport nga nahimong biktima o na-angol sa maong insidente. Sa report sa Sarangani Information Office, mismong si 1002nd Brigade Commander, Colonel Rainer Cruz ang mingkumpirma nga ang mga sakop sa 105th Base Command ni Kumander Ali Binago ang misulong sa Gasi. Wala usab mapugngi angkaligotgot ug kasakit nga gisinati karon sa mga residente sa Barangay Gasi ilabi na sa ilang kapitan nga si Mariano Fado. Hugot nga gipangayo karon sa kapitan ang todo nga suporta sa kagamhanan aron gukdon ang mga suspetsado ug i-atubang sa korte aron maangkon ang hustisya. "Justice for what happened to our barangay..Unsa pud among kasalanan. Wala man ko kalaban na Muslim. Open man ko sa ila bakit ganun? Kung sino ang may kasalanan hanapin natin, i-file natin ng kaso," pamahayag ni Fado. Si Fado mi-angkon pa nga pipila na gyud ka mga beses nga gibalik-balikan ang ilang barangay sa mga rebeldeng Moro aron mang-recruit ug himuon nilang mga kaubanan apan, napakyas gyud kini sanglit wala’y bisan usa ka residente sa barangay Gasi ang nagpadala ug mituo sa idelohiya sa 105th Base Command sa MILF. Samtang sa pikas bahin ning maong balita, mipagawas karon sa ilang sentiyemento ang hugpong sa mga Lumad sa Sarangani pinaagi ni Pastor Nonie Sambuan. Matod ni Sambuan klaro kaayo nga pagpang-insulto ang gihimo sa mga rebeldeng Moro nga mi-atake ug nanghasi sa Gasi. "Insulto din yan sa amin, sa mga Lumads" sulti ni Pastor Nonie Sambuan. Gi-aghat karon ni Sambuan ang gobyerno ug ang mga awtoridad nga mohimo gilayon ug hinanaling aksyon pinaagi sa pag-gukod sa mga responsable. "Thus the perpetrators must be hunted down and brought to justice because they inflicted heavy damage to our barangay," dugang sugyot ni Sambuan. Pagkabuntag gyud human sa insidente, mismo ang gobernador sa lalawigan nga si Migs Dominguez ug bise gobernador niini nga si Steve Solon personal nga miduaw ug mibisita sa naapektuhang mga residente. Sa mga nahiunang pamahayag sa gobernador, giklaro gyud niini nga dili magpanuko ang iyang administrasyon nga gukdon ang si bisan kinsa nga magsabwag ug kagubot sa iyang lalawigan. Nagpaniguro usab si Dominguez ug Solon nga ipadayon gyud ang operasyon batok sa rebeldeng mga Moro aron sa hingpit dili na gyud kini makahatag ug puwersiyo sa mga Sarangan. (pbanat news desk) *8888888 Labaw sa PWD, gireklamo ang PNP-RMG 12 Nagpadayag ug mi-atubang sa hawanan sa konseho sa dakbayan ang labaw ug presidente sa Persons With Disablities (PWD) atol sa nahimong sesyon niadtong mga milabay nga adlaw human nga matod pa, wala kini girespeto sa mga sakop sa Regional Mobile Group 12 sa PNP nga maoy nakadestino sa tugpahanan sa dakbayan. Sa usa ka pamahayag, gipunting gyud ni Dante Alim, ang presidente sa PWD nga daw wala gyud makabalo ug nasayod sa balaod ang mga pulis nga RMG nga nadestino sa Gensan International Airport. Matod ni Alim, padulong na unta kini sa Manila niadtong Septembre 26 ug nagsakay kini sa usa ka tricycle. Pag-abot sa checkpoint sa mga pulis, wala gipasulod ang tricycle nga gisakyan ni Alim tungod kay mao manang order ug mando sa pamunuan sa Gensan Airport ngadto kanila. Wala gyud nahimo si Alim kundili mokanaug na lamang sa gisakyang tricycle ug magbaktos ug hapit duha ka kilometro padulong sa airport mismo. Buot lamang unta mahitabo ni Alim nga bisan pa man nga mao gyud ang polisiya sa Gensan Airport nga nagdumili sa mga tricycle nga mosulod, mihatag na lamang ug konsiderasyon ang mga pulis ngadto kaniya tungod usab sa iyang kahimtang nga maglisod gyud ug lakaw hinungdan sa iyang diperensya sa ti-il. Sa pagpadayon sa pamahayag ni Alim, gisulti pa niini nga maayo na lamang nga adunay usa ka sakyanan ang mihunong ug mipasakay ngadto kaniya tungod sa kalouy. Si Alim mipasibaw sa iyang kahiubos sa mga pulis nga RMG didto sa konseho ug nagpakitabang nga unta mahatagan ug aksyon ang problema nga iyang nasinati sa mga sakop sa RMG. Dugang pa ni Alim nga nagpa-ila na kini sa mga pulis sa checkpoint nga usa siya ka opisyal sa mga PWD sa Gensan apan wala gihapon paminawa ug wala mohatag sa ilang konsiderasyon. Sa pagkahuman sa pamahayag ni Alim ngadto sa konseho, gilayon midesisyon si konsehal Boyet Leyson, ang chairman sa peace and order committee nga ipatawag ang liderato sa RMG sa airport ug mohatag sa ilang eksplinasyon sa maong panghitabo. Buot usab ni Leyson nga ma-istorya ang mga pulis nga mismong nadestino sa airport sa panahon sa pagbara kang Alim. (pbanat news desk) *88888888 Mga timbangan sa Gensan Market, gironda sa City Hall Milihok karon ang city hall partikular na ang buhatan sa City Treasurer’s Office duyog ang Office of the Market Administrator ug mipahigayon ug pagronda ug inspeksyon ngadto sa mga timbangan sa merkado publiko sa dakbayan. Sa paglibot sa mga kawani sa city hall, nasayran gyud nga daghang mga timbangan ang paso na sa ilang rehistrasyon ug wala na magbayad sa ilang mga obligasyon ngadto sa kagamhanan. Daghan usab ang nasakpan nga mga may tikas ang timbang hinungdan nga gipangkumpiska ang dul-an sa singkuwenta ka mga timbangan. Nag-unang bayolasyon gyud nga gilantaw sa city hall ang pagkakulang sa timbang sa mga gipamalit sa mga mamalitay ug ikaduha mao ang expire o paso na nga mga rehistrasyon. Sa paglibot sa mga taga-city hall wala hinuon gibati ug kasauko ug kahiubos ang mga tindero ug negosyante nga nadakpang may bayolasyon. Dako pa ang ilang pasalamat nga pinaagi sa maong lakang, may proteksyon gyud ngadto sa mga mamalitay ug sa nagnegosyo. Ang ubang mga negosyante nga wala madakpi ug nasayod nga paso na ang ilang rehistro, boluntaryong misaka sa buhatan sa Market Administrator ug gisurender ang ilang mga timbangan. Matod ni OIC City Treasurer, Rodillon Lacap, tungod kay naka-angkon ug bayolasyon ang mga nadakpan, magmulta gyud kini sa city hall. Nag-abiso na lamang kini nga dapat dili gyud kalimtan ang obligasyon sa mga negosyante ngadto sa kagamhanang lokal aron magpadayon ang maayong dagan sa ilang patigayon. (pbanat news desk) *88888888

HEADLINER PAGE 2… Plantasyon sa mga Chiongbian, gisulong pod sa MILF Dili lamang ang barangay Gasi sa Kiamba Sarangani Province ang nakatilaw sa pagpanghasi ug pagpangatake sa mga rebeldeng Moro nga gikan sa 105TH Base Command sa MILF. Sa wala pa gisulong ang barangay Gasi, una ng gisulong sa mga rebeldeng Moro ang Kling Plantation nga gipanag-iyahan sa ilado ug sikat nga mga pulitiko ang pamilyang Chiongbian. Sa report nga naka-abot sa Periodico Banat, pipila ka oras sa bag-o pa mahitabo ang pagsulong sa Barangay Gasi, mipalupad na ug mga Rocket Propelled Grenades (RPG) ang mga rebeldeng Moro sa plantasyon sa Kling, nga nahimutang lamang gihapon sa lungsod sa Kiamba. Matod sa guwardiya sa maong plantasyon nga si Jupiter Pequiro nga nasamdan pod sa pagpangatake sa mga suspek, laing usa pa ka biktima ang nasamdan sa iyang tiyan nga nailang si Gloria Lyn Barrientos. Pagsugilon ni Pequiro, pagkahuman gyud dayon sa pagpalupad sa mga RPG, nasundan kini ug mga buto-buto padulong sa iyang guardpost. Tungod niini, mibalos ang guwardiya ug mi-abot dayon ang mga kaubanan niini nga nakigbaylo-ay ug mga bala sa kalaban, sulod sa lima ka minuto. Matod ni Kiamba PNP Chief, PCI Alex Joe Orcajada, tungod sa maayong plastada sa security sa plantasyon ug sa paspas nga responde sa mga pulis, mingresulta gyud sa pag-atras sa kalaban. Dugang sa opisyal nga pulis nga usa ka testigo ang nakaila sa usa sa mga mi-atake apan wala kini mibutyag kung kinsa ang maong suspek sanglit padayon pa gihapon hangtod karon ang operasyon ug imbestigasyon. Nasayran ngadto kang Vice Governor Steve Solon, usa sa mga sakop sa pamilyang Chiongbian nga ang Kling ug barangay Gasi adunay gimugna nga community defense system nga mao usab ang nakaparot sa mga nangatake. "We will support the PNP and military to stop the terrorist acts of the armed groups," sulti pa sa bise gobernador. Niadtong mga milabay nga bulan, gipurwesyo usab sa mga rebeldeng MILF ang mga lungsod sa Maitum diin angmga residente sa barangay Ticulab gihimong hostage ug mihimo usab ug pagpang-ransak luyo sa pagpusil-patay sa duha ka mga sibilyan ang mga morong rebelde sa silingan nga lungsod sa Maasim. Misulay usab sa pag-atake ang mga rebelde sa munisipyo sa Maasim ug sa police station niini apan napakyas tungod sa pagdepensa nga gihimo sa kapulisan. Aduna nay mga kasong murder, destructive arson, arson, robbery with violence against/or intimidation of persons ang gisang-at sa Regional Trial Court Branch 38 sa Alabel, Sarangani Province batok sa kapin 50 ka mga gidudahang sakop sa MILF nga responsable sa maong mga insidente. (pbanat news desk) *888888888 SOCOTECO II, nagpasalig bayran gyud ang NAPOCOR Mipasalig karon ang South Cotabato Electric Cooperative II (SOCOTECO II) nga andam gyud sila nga bayran ang National Power Corporation (NAPOCOR) ug ang National Transmission Corporation (TRANSCO) sa kapin P100 milyones nga utang niini sa dili pa makaabot ang gitakdang deadline sa pagputol sa supply sa koryente sa SOCSARGEN. Mao kini ang gipaniguro karon sa General Manager sa SOCOTECO II nga si Engineer Rodolfo Ocat sa lokal nga media niadtong milabay nga adlaw. Sa pamahayag ni Ocat, gipunting niini nga panahon nga mahuman ug makumpleto na sa dakbayan ang bayronon niini nga gisgudan na ug bayad, gamay na lamang ang hulamon sa SOCOTECO II ngadto sa bangko. Dugang ni Ocat, dili susama kaniadto nga P90 milyones ang planong hulamon sa SOCOTECO II aron lamang masalbar ang supply sa koryente tungod kay mas mogamay gyud ang interes sa pila ka milyon na lamang nga ilang ipangdugang sa bayronon sa ilang utang. Ang opisyal sa SOCOTECO II nagtin-aw usab nga mohimo usab sila ug pamaagi nga mahatagan ug dugang ekstensyon sa NAPOCOR ang ilang obligasyon aron mabayran gyud kini. Ang balay dakbayan pinaagi ni OIC City Treasurer Rodillon Lacap naniguro usab nga karong semanaha, mahuman gyud ug makumpleto na sa syudad ang ilang bayronon ngadto sa SOCOTECO II. Nanghinaut usab si Lacap nga maplantsa na sa SOCOTECO II ang ilang utang niini ngadto sa NAPOCOR. Sa iyang bahin, bisan si Konsehal Jose Marie ‘Jong’ Gonzales nagtin-aw nga dapat gyud nga mahatagan ug igong pagtagad sa SOCOTECO II ang obligasyon niini sa NAPOCOR-TRANSCO kay dili lamang gyud ang Gensan ang mamahimong apektado panahon nga mawad-an ug supply sa koryente kundili ang lalawigan sa Sarangani ug pipila ka mga lungsod sa South Cotabato nga Polomolok, Tupi ug Tampakan. (pbanat news desk) *8888888 Vice Gov. Solon, gikondena ang pag-atake sa Kiamba Gikondena karon sa bise gobernador sa lalawigan sa Sarangani ang pinakabag-ong insidente sa pagpangatake sa rebeldeng grupo sa MILF pinaagi sa 105th Base Command diin usa ka barangay hall, barangay stage, daycare center, waiting shed ug Tindahan sa Kalinaw (Store for Peace) ang gisunog sa Barangay Gasi, Kiamba ug ang pag-atake sa plantasyon sa Kling sa maong lungsod lang gihapon nga gipanag-iyahan sa pamilya sa Chiongbian. Sa usa ka mensahe ni bise gobernador, Steve Solon nganhi sa Periodico-Banat kagabii, gitin-aw gyud niini nga magpadayon gyud ang kampanya sa kagamhanan sa pag-gukod sa mga dautang elemento aron sa hingpit mahatod ang tanan nga mga responsable sa hawanan sa hustisya ug mapasakaan ug mga kasong kriminal. “The government condemns the acts of these armed groups. Nagtanum sila ug terror sa komunidad sa Kling ug Gasi. Apil na pod ang mga silingan nga barangay nga nakuyawan sa pag-atake sa maong duha ka barangay. Gisunog nila ang daycare center, brgy. Hall, brgy. Stage u gang Tindahan sa Kalinaw sa probinsya,’ matod sa mensahe ni Solon. Si Solon nga ilado kaayong usa sa nanawagan alang sa kalinaw kuyog ang gobernador sa Sarangani nga si Migs Dominguez nagpunting pa nga wala nay laing masakit alang sa usa ka lider kundili ang makita nga ang iyang mga katawhan nasakitan ug nag-antos tungod sa pagsabwag ug terorismo. ‘Ang pinakadako nga damage ay ang pag sakit nila saduha ka inosenteng civilian sa ilahang pagpabuto ug rocket grenade. Ang gobyerno sa Sarangani mobarog sa mga elemento nga mobuhat ug kadautan sa mga Sarangan,’pintok nga mensahe sa bise gobernador. Una ng namahayag ang 1002nd Brigade sa Philippine Army ubos sa liderato ni Colonel Rainer Cruz nga ang mi-atake sa Kling Plantation ug sa Barangay Gasi sa Kiamba mao ang grupo sa 105th Base Command sa Moro Islamic Liberation Front (MILF). (pbanat news desk) *888888888 Balay sa board member sa Sarangani gi-ronda sa CIDG Dako na lamang ang katingala sa usa ka board member sa lalawigan sa Sarangani human nga gikalit na lamang ug sulod ug ronda sa mga elemento sa Criminal Investigation and Detection Group (CIDG-12) ang panimalay ug manukan niini niadtong milabay nga adlaw sa lungsod sa Glan, Sarangani Province. Ang report nga nakuha sa Periodico-Banat nagbutyag nga usa ka Saturnino Estita, 40 anyos, caretaker sa mga manok panabong ni Board Member Tata Yap ug residente sa Glan mao ang target sa Oplan Pagtugis sa CIDG-12 tungod sa kasong Robbery with violence against or intimidation of persons nga gipakanaug sa sala ni Judge Andres Lorenzo sa Branch 23 sa RTC-Gensan. Matod ni PSI Francis Sonza, ang Chief Operations Officer sa CIDG-12, si Estita maoy gitudlong suspek sa tulis nga nahitabo sa Apopong Gensan ug nahimong biktima ang usa ka Thelma Emnace. Usa ka gatos ka libo ka pesos ang gitakdang piyansa sa korte aron makagawas ang caretaker ni Board Member Victor James ‘Tata’ Yap. Apan sa usa ka report sa TV Patrol Gensan, gisulti ni Board Member Yap nga may kolor sa pulitika ang gihimong pagronda sa iyang panimalay ug sa manukan niini. Matod ni Yap nasayod na siya kung kinsa ang nagpaluyo sa maong insidente apan wala niya kini panganli. Sa pag-sulod sa CIDG-12 sa propreyad ni Board Member Yap, may mga pusil usab nga nakita apan wala kini gibitbit tungod kumpleto kini ug mga papeles. Palampason na lamang matod pa ni Yap ang gihimo sa CIDG-12 ngadto sa iyang panimalay ug manukan human nga nagka-istorya na ang duha ka mga partido. Hugot nga gitin-aw ni Yap nga dili gyud niya kinaiya ang magtago ug mga tawong gipangita sa balaod ilabi na ang dunay kasong kriminal. Mensahe pa ni Yap nga kung ilang target ang iyang caretaker dali lamang kaayo sa pag-abiso kaniya ug siya mismo ang mohatod sa iyang tawo ngadto sa buhatan sa CIDG-12. Sa pagkakaron, nagtingkagol sa selda sa CIDG-12 ang nadakpang caretaker ni Board Member Yap. (pbanat news desk) *888888888

periodicobanat (oktubre 5, 2008)

GITAN-AW dinhi nila Sangani Governor Migs DOminguez ug lokal nga mga opisyales ang nagkagidlay nga BANDERA sa Pilipinas nga salin sa pagpangusog sa gituohang sakop sa 105th base command sa Moro Islamic Liberation Front (MILF) ngadto sa 5 ka mga government buildings niadtong tungang gabii saOktubre 4, 2008. (kuha ni ariel decena/sarangani information office)

Kumander Kato, 3 ka lungsod na lang ang ginatago-an! Gibutyag karon sa 601st Infantry Brigade sa Philippine Army nga anaa na lamang sa tulo ka mga lungsod ang ginatago-an ug ginatabok-tabokan sa iladong lider sa rebeldeng kumande sa MILF nga si Ameril Umbra Kato. Niadtong milabay nga adlaw sa gihimong regular nga press conference, mismong si 601st Deputy Brigade Commander, Colonel Pablo Jamisola ang namahayag sa lokal nga media nga anaa na lamang sa mga lungsod sa Datu Pian, Datu Saudi Ampatuan ug Mamasapano sa lalawigan sa Maguindanao ang ginatuyo-tuyokan ni Kumander Kato. “Sa ngayon tatlong bayan nalang ang inikot-ikutan ni Kumander Umbra Kato. Ito ang municipality of Datu Piang, Datu Saudi Ampatuan, tsaka itong Mamasapano,” pamahayag ni Col. Pablo Jamisola sa press conference nga gipahigayon sa National Food Authority Conference Hall. Matod sa maong opisyal gipalihok na karon ug sakto ang mga puwersa sa gobyerno sa tulo ka mga dapit ug posibleng sirad-an nila ang exit points ni Kato. Usa sa mga lig-on nga ebidensya nga magpamatuod nga si Kumander Kato anaa sa tulo ka mga dapit mao ang bag-ohay pa lamang nahuman nga giyera sa Lawless MILF Group (LMG) sa Datu Piang. “Kung inyo pong nababasa sa mga dyaryo at nabro-broadcast sa radyo, sunod sunod na po ang engkwentro dito lalo na sa Datu Piang,” dugang ni Jamisola. Naniguro pa ang Koronel nga mao usab ang nagrepresentar sa labaw sa 601st nga si Commander Marlou Salazar nga ang mga sundalo anaa gyud sa eksakto nga direksyon sa ginatago-an ni Kato. Kahinumduman, mibuhi na ang kagamhanan ug tag P10 milyones nga patong sa ulo ni Kumander Kato ug Kumander Bravo patay man o buhi. Si Kato ug Bravo nag-atubang karon ug daghang mga kasong kriminal sa North Cotabato ug Lanao del Norte. Nanghinaut pa si Jamisola nga ang sibilyan magpadayon sa ilang suporta ngadto sa mga sundalo ug pulis aron mahingpit na gyud ang kalinaw sa mga dapit nga gihasi sa rebeldeng mga Moro. Gipasalig pa ni Jamisola nga padayon usab nga ihatag sa sundalo ang ilang suporta ngadto sa mga pulis sa pag-gukod sa mga Lawless MILF Groups (LMG). “Hayaan nyo po kmi magpatuloy ang aming paglilingkod sa bayan at kami hindi hihinto tulungan ang ating pulisya na ma-implement ang kanilang police operations sa kasalukuyan,” dason ni Jamisola. Sa iyang bahin, namahayag usab ang Executive Officer sa 602nd Brigade nga si Lt. Colonel Rolando Huqueriza nga ang nag-unang tahas sa ilang puwersa mao ang pag-protekta sa katawhan partikular na sa Carmen, North Cotabato. Gipasiatab pa ni Huqueriza nga bisan unsang orasa ug bisan asa nga dapit, andam gyud silang makig-giyera sa mga rebeldeng Moro. Nagpabilin gihapon nga anaa sa ‘defensive position’ ang tropa sa 602nd Brigade. “Handa kaming humabol at lumaban ano mang oras kahit saan,” panapos ni Huqueriza. Si Huqueriza mao ang representante ni 602nd Brigade Commander Col. Alejandro Estomo. (pbanat news desk) *88888888 HEADLINER

SM, magtukod usab sa Gensan sunod tuig? Human nga pormal na nga nagtukod ug kasamtangan pang anaa sa construction process ang sikat ug dako usab kaayo nga shopping mall nga Robinson’s dinhi sa dakbayan, migawas na pod ang mga report nga karong sunod tuig ang labing dakong shopping mall sa Pilipinas nga SM maoy mosunod ug magmuntar usab dinhi sa Gensan. Sa usa ka report sa Mindanews, gibutyag na ang SM Mall nagplano na sa pagpatukod sa ilang estabisyemento dinhi sa dakbayan karong tuig 2009 sa maydalang Santiago Boulevard. Amg report nagtug-an pa nga aduna nay ginahimong negosasyon karon sa SM ug sa sikat nga pamilya sa Gensan nga Salazar alang sa singkuwenta anyos nga abang sa mga propreyadad sa maong dapit. Ang report nagtug-an usab nga bisan ang city hall sa dakbayan wala mokumpirma kung aduna nay gi-aplayan nga business ug construction permits ang SM. Ang halapad nga propreyedad sa mga Salazar sa Santiago Boulevard nga maoy gi-ugbokan sa usa ka bowling alley ug sa sikat nga Dunkin Donuts mao ang posibleng tukoran sa SM. Sa kasamtangan, gisugdan na ug guba ang bowling lanes sa may Santiago Boulevard ug ang mga machine ug auto shops sa maong lona. Bugtong ang Dunkin Donuts lamang ang wala pa maapektuhi sanglit mahuman ang kontrata niini sa Salazar Family karong tuig 2010 pa. Ang pagsulod sa SM nahimong dako nga isyu human ang Robinson’s Mall sa pamilyang Gokongwei, nga mao usab ang tag-iya sa Cebu Pacific nagsugod na sa ilang konstruksyon alang sa Robinsons’ Gensan karong tuiga lamang sa usa ka 8.5 ektarya nga propreyedad sa may dalang J. Catolico Avenue. Nahimong sikat ang mga malls sa Gensan human gi-unahan kini sa Gaisano niadtong katapusang bahin sa 1980 ug gisundan sa Kimball Plaza ug KCC Mall nga parehong nangasunog ug gituohan hinungdan mao ang arson. Ang KCC Mall hangtod karon nagpabilin lamang gihapon ug mas nidako, mas nindot ug kumpleto apan ang Kimball Plaza nga gipanag-iyahan sa Teng family midason nga wala na sila’y interes sa pag-abli sa ilang department stores. Bugtong ang Gaisano ug KCC Malls na lamang nga kasamtangang nag-renovate ang mga dagkong suroyanan sa Gensan. (pbanat news desk) *8888888 SOCOTECO II, gidepensahan ni Konsehal Santos Gidepensahan karon sa kanhing empleyado ug trabahante sa South Cotabato Electric Cooperative II (SOCOTECO II) ug karon sakop na sa Sangguniang Panlungsod ang kooperatiba sa koryente nga sunod-sunod karong gibanatan sa mga kaubanang konsehal niini tungod sa problemang gi-atubang ngadto sa TRANSCO-NAPOCOR. Matod ni konsehala Margareth Santos, angayan lamang usab nga paninglon sa SOCOTECO II ang obligasyon sa city hall ngadto kanila sanglit susama gihapon sa mga yano nga konsumante, angayan gyud nga bayran sa syudad ang mga obligasyon niini sa koryente. Usa usab ka proseso sa SOCOTECO II ang paghatag ug mga disconnection notices sa mga konsumante niini ug dili ‘exempted’ ang city hall sanglit konsumante usab kini. Si Santos nagsulti usab nga kung aduna man mga benepisyo nga gihatag sa mga empleyado sa SOCOTECO II, legal gihapon kini tungod kay aprubado ang tanan nga mga lakang sa ilang board of directors. Niadtong milabay nga adlaw, msimong si SOCOTECO II, General Manager, Engineer Rodolfo Ocat ang nagsulti sa lokal nga media nga ang tanan nga mga notice of disconnections nga parasa city hall ilang gi-recall ug gisuspend tungod sa nahitabong neogsasyon tali sa SOCOTECO II ug sa LGU-Gensan. Nagpasalig pa si Ocat nga andam ang SOCOTECO II nga mobayad sa ilang obligasyon sa kagamhanang lokal panahon nga mahuman na sa buhatan sa City Assessor’s Office ang ilang assessment sa tanang propreyedad ug buluhisan sa SOCOTECO II. (pbanat news desk) *88888888 Coast Guard nag-rescue operation sa dagat tungod sa ispiritista Naunsa na nga pagka-unsaa.. Ang Philippine Coast Guard nga nakabase dinhi sa dakbayan mihimo ug usa ka search and retrieval operation tungod sa usa ka impormasyon nga adunay patay nga lawas ang gilabay sa kadagatan sa Queen Tuna Park. Sa report nga nakuha sa PERIODICO-Banat, mihimo sa ilang operasyon ang Coast Guard human ang pamilya sa usa ka batang babaye nga nailang si Donnabelle Reyes miduol ug nagpakitabang ngadto kanila tungod matod pa adunay nakasulti kanila nga ang ilang anak nga usa ka semana na ang pagkawala gilabay sa dagat ug gisulod sa sako. Tungod sa maong report, ang Coast Guard wala gyud dayon magsayang-sayang ug panahon ug mihimo sa ilang gimbuhaton apan wala gyud sila’y nakit-an sa duha ka adlaw nga retrieval operations. Nahibalo-an sa Coast Guard nga ang gibasehan sa pamilya sa batang biktima mao ang ispiritu matod pa nga nagpailang si Bea Alonto nga misulod sa usa ka estudyante sa Bawing. Matod ni Bea Alonto, iyang nakita ang batang si Donnabelle nga nagkaway-kaway sa tunga sa dagat sa Queen Tuna Park. Bisan sa grabeng pagpangita sa mga taga-Coast Guard wala gyud kini magmalampuson ug nahurot na lamang ang mgasulod sa ilang oxygen tank. Hangtod karon bisan ang mga awtoridad ug pamilya sa biktima blangko gihapon sa tinuod nga gidangatan ni Donnabelle nga kalit lamang nawala niadto pang milabay nga Biyernes. Padayon lamang gihapon ang imbestigasyon sa kaso ni Donnabelle. (pbanat news desk) *888888 Engineer, gitigbas sulod sa DPWH-Gensan Usa ka engineer sa Department of Public Works and Highways (DPWH) District Office dinhi sa dakbayan ang anaa karon sa balay-tambalanan human kini nga gikalitan na lamang ug tigbas sa usa ka empleyado sa maong buhatan niadtong milabay nga adlaw. Ang report nga naka-abot sa Periodico Banat nagbutyag nga usa ka contractual employee nga nailang usa ka alyas Alfredo ang kalit na lamang nga mitigbas ngadto kang Engineer Norma Escalante human nga gibalibaran kini nga dili na makabalik sa iyang trabaho tungod kay may nakapuli na sa iyang posisyon. Tungod sa pagbalibad sa maong engineer kalit na lamang nga nasuko ang suspek ug gikalitan ug tigbas sulod sa opisina niini si Escalante. Ubay-ubay gyud nga samad-tinigbisan ang nahiaguman sa babayeng engineer ug kasamtangan pa karong gitambalan sa General Santos Doctor’s Hospital. Si Alfredo usa ka kanhing maintenance sa DPWH-Gensan. Sa dugang pagsusi sa Periodico ngadto sa suspek misulti kini nga morag kalit lamang nga adunay misulod kaniya ug wala niya kini mapugngi hinungdan nga nahimo niya ang maong salaod. ‘Sala man gyud na,’ dason pa sa suspek nga nadawat na ang iyang kahimtan. Dali hinuon nga nadakpan ang suspek nga si Alfredo ug gibalhog karon sa Bula PNP. Gipasakaan ug kasong frustrated murder ang suspek. (pbanat news desk) *8888888

periodicobanat (oktubre 4, 2008)

TABLU HIGH SCHOOL TURN-OVER AND INAUGURATION. Sagittarius Mines, Inc. (SMI) Resident Manager Gerry P. Laviste (tunga) pormal nga nagturn-over sa ceremonial key alang sa bag-ong tukod nga 2-classroom buildings sa Tablu National Highschool ngadto kang Tablu National High School to the school’s Teacher-in-charge Donna S. Panes (pinakatuo), Department of Education – South Cotabato Schools Division Superintendent Dr. Raphael Fontanilla (ikaduha sa tuo) niadtong Septembre 25. Ang mga bag-ong classroom natukod pinaagi sa paghi-usa sa DepEd ug SMI. Tumong sa SMI nga mahatagan ug de kaledad nga edukasyon ang mga batan-on sa Tablu, usa ka barangay sa lungsod sa Tampakan nga mao usab ang host municipality sa SMI-Copper Project. Nahimutang ang proyekto sa SMI sa mga dapit sa South Cotabato , Columbio, Sultan Kudarat, ug Kiblawan Davao del Sur. Kuyog ni Laviste sila (gikan sa wala) SMI Corporate Communications Manager John B. Arnaldo, ug Community Relations and Development Superintendent Bella D. Lechonsito. (contributed photo/pbanat caption) *8888888 HEADLINER: Orden de aresto kang Mayor Reganit gibawi sa korte Gibawi karon sa Regional Trial Court Branch 38 sa lalawigan sa Sarangani Province ang orden de aresto (warrant of arrest) nga gipakanaug niini ngadto sa kanhing mayor ug bise mayor sa lungsod sa Maitum Sarangani Province nga si ex-mayor Felix Reganit nga maoy gipasanginlan ug gitudlo nga responsable sa pagkamatay sa anhing mayor usab nga si George Yabes. Sa usa ka pamahayag ni Reganit nga gipagawas sa ABSCBN-Gensan, gipakita gyud niini ang usa ka mando sa korte nga mohimo ug re-investigation sa kasong gi-atubang niini human nga siya ang matod pa gitudlong mastermind sa pagkamatay sa anhing alkalde nga si Yabes. Matod ni Reganit niadtong petsa 10 pa lamang sa Septembre migawas na ang maong order ug nagpakahilom lamang kini ug padayon nga nagtago-tago sa wala pa matino nga dapit tungod usab sa kahadlok nga may mahitabo nga dautan ngadto kaniya. ‘Katakot-takot na yung nangyayari sa akin…Kaya hindi ako nag-surrender,’ punting pa sa kanhing mayor sa Maitum. Saysay pa ni Reganit nga bisan tuod nga nagtago-tago kini, ang iyang mga abogado nagpadayon gyud sa paglihok sa iyang kaso ug nangita ug mga legal nga pamaagi aron mahatod ang ginahangyo nila nga usbn ang imbestigasyon sa kamatayon ni Yabes. Aminado usab si Reganit nga ang nahitabo ngadto kaniya usa gyud ka demolition job sa iyang mga kaatbang sa pulitika ug aduna na kini suspek kung kinsa ang nagpaluyo sa maong binuhatan. Nagdumili hinuon si Reganit sa pagsulti kung kinsa ang iyang ginatudlo nga nagpalikod sa pagdaut ngadto kaniya. ‘Dito po talaga nasira ang political career ko,’ hamubo nga saysay ni Reganit. Si Reganit midason pa nga tungod sa kasong gipasaka ngadto kaniya ug pagpakanaug ug orden de aresto, naapektuhan dili lamang ang iyang panginabuhian kundili lakip na gyud ang relasyon niini sa iyang pamilya. Kahinumduman niadtong Nobyembre 2006, gipusil-patay si former mayor George Yabes didto sa Maitum sa nakamotorsiklo nga mga suspek samtang nagsakay kini sa iyang sakyanan. Ang kamatayon ni Reganit nahimong dakong sumsuman dili lamang sa mga taga-Maitum kundili sa tibuok lalawigan sa Sarangani ug mga kasikbit nga dapit sa SOCSARGEN. Ang mga lokal nga kagamhanan sa nagkalain-lain nga mga lungsod sa Sarangani lakip na ang kapitolyo nag amot-amot pa gyud ug kuwarta aron maoy ihatag isip reward sa bisan kinsa nga makatudlo sa mga responsable sa kamatayon ni George Yabes. Sa pagkakaron, padayon lamang gihapon nga nagtago-tago si Reganit samtang ginahulat ang abiso sa iyang mga abogado ug matod niini aron maprotektahan ang iyang kaugalingon sa mga gustong mopatay kaniya. (pbanat news desk) *88888888 Kapin 50 ka mga van sa Polomolok, sikop sa LTFRB Milihok gilayon ang buhatan sa Land Transportation Franchising and Regulatory Board (LTFRB-Gensan) sa mga gipadangat nga reklamo sa daghang mga motorista nga nagsakayan sa ruta nga General Santos City-Polomolok, South Cotabato ug pabalik tungod sa kalit nga pagpamahal ug singil sa plitehan sa mga passenger vans nga nagbiyahe-an. Sa usa ka ekslusibong pakighinabi ngadto kang Rasul Rachman, ang labaw sa LTFRB-Gensan, gibutyag niini niadtong milabay nga adlaw lamang usa ka hiniusang operasyon ang gihimo sa ilang buhatan kuyog ang LTO, Highway Patrol Group ug uban pang mga ahensya nga naglangkub sa Anti-Colorum Task Force. Saysay pa ni Rachman nga tungod sa grabeng mga reklamo nga nadawat sa ilang buhatan, paspas dayon nilang gi-aksyunan ang maong mga reklamo. ‘Nagreklamo kasi ang mga commuters natin na masyadong mahal ang singil sa kanila kung pupunta sila dito sa Gensan galing Polomolok,’ sulti ni Rachman. Gibutyag sa maong opisyal nga naningil ug tag-P27 matag pasahero ang mga passenger vans nga unta tag-P22 lamang ang ilang angayan nga bayaran. Gireport usab sa LTFRB nga sa mga nadakpan nila nga mga passenger vans, halos magkapareho lamang gyud ang ilang tubag nganong mikalit lamang sa pagsaka ug singko pesos ang plitehan sa pasahero. Matod sa mga driver ug operator, mao man ang gitakda sa ilang mga fare matrix nga gikan sa LTFRB, hinungdan nga ila kining gipatuman. Apan, sa pagsusi sa LTFRB, klaro kaayo gyud nga ang gigamit nga fare matrix o taripa sa mga passenger vans mao diay ang mga taripa sa mga dyip de pasahero nga nagbiyahe-an sa susamang ruta. ‘This is illegal because LTFRB never issued any fare matrix to passenger vans that would result to adjusted fare of commuters,’ pamahayag ni Rachman. Gitin-aw pa sa opisyal nga dili gyud puwede maningil ang mga vans gamit ang fare matrix sa PUJ tungod kay dili magkapareho ang singil sa duha ka mga natad sa transportasyon. Kahinumduman, una ng nahatagan sa adjusted fare matrix ang mga dyip de pasahero apan ang mga passenger vans wala mahatagi. Sa mga nahinabi sa Periodico-Banat nga mga drayber ug operators sa POLMARGEN, ang kooperatiba sa mga drayber ug operator sa ruta nga Polomolok-Gensan, gitin-aw niini nga kung dili sila mogamit ug mga taripa, pandakpon sila sa mga sakop sa LTO hinungdan nga mingresulta sila sa pagtaod sa taripa sa mga dyip. Tungod sa hinimuang illegal sa mga passenger vans nga gikan sa Polomolok, kapin sa singkuwenta ang nadakpan ug gipamulta tungod sa maong bayolasyon. ‘I hope this would serve as a warning to all na, dapat hindi abusuhin an gating mga pasahero na nagbibigay naman ng maayos nang kanilang mga pamasahe,’ hinapos pa ni Rachman. (pbanat news desk) *8888888 Umbra Kato, wala sa Maasim!-Phil. Army Gitin-aw karon sa Armed Forces of the Philippines (AFP) partikular na ang 1002nd Brigade nga nakadestino sa Sarangani Province nga wala gyud magtago-tago sa ilang Area of Responsibility (AOR) ang iladong kumander sa MILF nga si Ameril Umbra Kato. Sa usa ka pamahayag, gibutyag karon ni Colonel Ranier Cruz III, ang Brigade Commander sa 1002nd Brigade sa Philippine Army nga wala gyud sa lalawwigan sa Sarangani ug sa lungsod sa Maasim ang iladong lider sa MILF break-away group. Saysay pa ni Cruz nga bisan tuod nga wala kini sa Maasim, tinuod gyud nga kusog kaayo ang impluwensya niini ngadto sa mga sakop sa Lawless MILF Groups (MLG) nga gipangulohan ni kumander Alou Binugao, ang suspek sa pagsulong sa lungsod sa Maasim ug mipatay ug duha ka mga sibilyan sanglit iya kining sakop ug sinaligan. Si Cruz nagsulti usab nga wala gyud magpasagad ang kasundalohan u gang kagamhanang probinsyal sa Sarangani ubos kang Gobernador Migs Dominguez ug Vice Governor, Steve Solon sa paghatag ug ayuda ug suporta ngadto sa mga sibilyan nga naapektuhan sa mga pagpangatake sa mga LMG. Kahinumduman, sayo ning semanaha lamang, kapin sa 300 ka mga residente sa mga barangay sa Pananag ug Lumasal ang namakwit ug midagan sa daplin sa dagat human nga nahadlok ug nakadungog ug mga balita nga matod pa, mo-atake pag-usab ang mga rebeldeng mga Moro. Gikumpirma usab ni Cruz nga angmga tawong namakwit niadtong mga milabay nga adlaw, gi-ayudahan gyud sa kagamhanang lokal ug nakabalik na ngadto sa ilang mga puy-anan. Ang nasaksihan sa mga residente nga pagsaka sa daghang mga sundalo sa taas nga bahin sa Pananag ug Lumasal usa lamang ka routinary patrol sa mga awtoridad ug walay angay kabalak-an paniguro ni Cruz. (pbanat news desk) *88888888 Sugal nga Last Two sa Gensan, kuyanap gihapon! Bisan ang kapulisan sa dakbayan aminado gyud nga ang illegal nga sugal sa Last Two ug uban pang mga numbers game nagpadyaon lamang gihapon. Kagahapong adlawa, atol sa usa ka regular nga press conference sa balay-dakbayan sa syudad, gi-angkon mismo sa bag-ong Deputy City Director nga si PSUPT Anongos nga dili gyud sa tanan nga mga panahon, mabantayan sa mga pulis ang mga gika-ingon nga betting outlet o tayaanan sa mga illegal nga sugal. ‘Hindi naman po sa lahat ng oras puwedeng mabantayan ng mga pulis natin yung illegal gambling dahil madami ding trabaho ang mga pulis..Pero sisikapin natin at gagawin natin ang lahat,’ sulti pa ni Anongos. Sa maong panagtigom usab, naghangyo ang bag-ong opisyal nga suportahan sa katawhan ang kampanya sa mga pulis batok sa mga illegal nga binuhatan ug pagbantay sa sitwasyon sa syudad. Mensahe pa ni Anongos nga aron mamahimong luwas ug protektado sa bisan unsa man nga dautang bahad sa terorismo, kinahanglan gyud ang maayong relasyon sa mga pulis ug residente sa usa ka dapit. (pbanat news desk) *8888888 11 ka mga dagkong tindahan sa Gensan, gironda sa DTI ug BFAD Isip tubag sa kontrobersya sa Milk Scare nga gikan sa nasod Tsina, mi-aksyon niadtong milabay nga adlaw ang mga buhatan sa Department of Trade and Industry (DTI) ug Bureau of Food and Drugs (BFAD) dinhi sa dakbayan. Sa usa ka pakighinabi ngadto kang Arnel Sayco, ang opisyal sa DTI-Gensan gibutyag niini sa Periodico-Banat nga onse gyud ka mga dagkong tindahan sa Gensan ang ilang gi-inspeksyon ug gisusi kung nagpadayon pa ba gihapon kini sa pagpamaligya ugmga produkto nga may gatas nga gigama ug gikan sa nasod Tsina. Matod ni Sayco, tanang mga establisyemento nga ilang gironda aduna gyud bayolasyon nga nahimo ilabi na sa balaod sa Consumer Act of the Philippines o ang Republic Act 7394. Kadaghanan sa mga nasakmit sa hinusang puwersa sa DTI ug BFAD mao ang mga gatas ug skimmed milk nga walay sakto nga label ug dili mahibaw-an kung asa nga dapit kini nag-gikan. Nakakuha usab ang duha ka mga ahensya ug mga kendi nga gigama gikan sa Tsina ug gi-apil nila kini ug bitbit aron masuta kung aduna ba kini sagol nga Melamine nga hinungdan sa pagkasakit ug pagka-ospital sa daghang mga tawo didto sa Tsina. Sa opisyal nga listahan sa DTI-Gensan, miabot gyud ug 282 ka mga pakete sa skimmed milk nga wala label ang ilang nakumpiska ug unom ka mga carton sa kendi wala pay labot ang 19 nga nakapakete na nga gidudahan usab nga gikan sa nasod Tsina. Pipila sa mga establisyemento nga nakuhaan sa maong mga produkto mao ang Dadiangas Plastic Center & General Merchandise, Rebecca Suobiron Quiao Store, Claudio Store, Jhun Khun Store, Roy and Leah General Merchandise, Joena’s Plastic and General Merchandise, Lapco Enterprises, VN Enterprises, Gaisano Mall ug Romynel’s Store. (pbanat news desk) *88888888

PERIODICO-Banat Oktubre 4, 2008 Top Stories