pbanat news stories and pics (may0 12, 2008)

P130 Milyones nakolekta sa BIR! Kapin gyud sa P130.5 milyones ang nahimong koleksyon sa Bureau of Internal Revenue (BIR) District Office dinhi sa dakbayan. Mao kini ang gibutyag ni Noel Gonzales, ang Revenue District Officer niadtong milabay nga adlaw. Matod ni Gonzales, ang ilang nakolekta nga P130.5 milyones nilampas gyud sa ilang orihinal nga target nga kapin sa P124.5 milyones lamang. Kalit lamang misaka ang koleksyon sa BIR-Gensan human gipatuman sa maong ahensya ang todo nga kampanya niini batok ngadto sa mga establisyemento ug dagkong negosyante nga angayan mobayad gyud sa ilang mga buhis ngadto sa kagamhanan. Si Gonzales nagbutyag pa nga ang ilang nakuha karong unang quarter sa tuig, mao na ang pinakataas nga koleksyon sa BIR-Gensan sukad kini nahimugso sa dakbayan. Kahinumduman nga niadtong milabay nga mga bulan lamang, ang dakong kumpanya sa RD Group of Companies nga gipanag-iyahan ni Rudy Rivera, mibulgar nga pipila sa ilang mga kumpanya mobalhin na lamang sa ilang mga remittances didto sa dakbayan sa Subgo human matod pa ni Rivera, daw naabuso ug grabeng pag-ipit ang gihimo sa BIR ngadto kanila. Tungod sa desisyon sa RD Group, mismong ang BIR-Gensan ang midason nga posibleng mwad-an ug kapin sa P100 milyones ang buluhisan sa maong ahensya apan, lahi naman hinuon ang nahitabo. Misaka ug kapin sa P6 milyones ang nahimong abot sa BIR-Gensan human sa April 15 deadline sa income tax filing. Gipahibalo usab sa BIR-Gensan nga karong sunod bulan ila ng i-implementar ang ilang computerization program diin maoy mo-detect sa mga taxpayers nga wala nagbayad sa ilang mga buluhisan sa ilang ahensya. Ang maong computerization program usab nagtumong nga mas mahimong paspas ug epektibo ang tanan nga mga transaksyon sa BIR-Gensan. (jong gorgonio/pbanat) *888888 MSU-Gensan, nanguna sa Mechanical Engineering exams Kalipay gyud ug garbo ang nabati karon sa mga estudyante ug opisyales sa Mindanao State University-General Santos City College of Engineering human ang ilang tulo ka mga estudyante sa Mechanical Engineering ug ang laing kinse pa nga mga kaubanan niini, nakakuha gyud ug tag-as nga grado.

Tulo usab maoy nahimong mga topnotchers. Sa pinakaulahi nga Mechanical Engineering board exams, nakuha gyud nila Engineer, Ronald Hidalgo and pinaka-unang puwesto, Engineer Benjer Acosta, ikaduhang puwesto ug Engineer Chanly Callano ikatulo nga puwesto. Matod ni Dean Virgilio Ramos, ang labaw sa College of Engineering dili lamang dungog sa MSU-Gensan ang gihatod sa tulo nila ka mga estudyante kundili dungog usab sa tanang mga Generals. Sa kapin usa ka libo nga mikuha sa maong eksam, 667 lamang ang nakapasar ug 100 porsiyento gyud nga nakapasar ang mga estudyante sa MSU-Gensan. Gipahibalo pa ni Ramos nga usa ka motorcade ang ilang himuon karon nga semana alang ngadto sa tulo ka mga topnotchers isip pagsaludo sa ilang mga naangkon. Si Engineer Hidalgo mao nay ikalima nga taga-MSU Gensan nga nahimong top notcher sa Mechanical Engineering sukad pa niadtong tuig 1998. (jong gorgonio/pbanat) *888888