periodicobanat (pebrero 03, 2011)

‘ABLI NA GYUD’--Makita dinhi sa taas nga hulagway si Tampakan Mayor, Leonardo Escobillo (pinakawala) kauban ang mga opisyales sa embahada sa Switzerland nga si HE Ambassador, Ivo Sieber, Australian Consul General, Hugh Wilson, New Zealand Deputy Head of Mission, Andrew White ug SMI Gen. Manager, Mark Williams (pinakatuo) samtang nagpreparar sa pagputol sa ribbon isip simbolo sa pag-abli sa Mobile Community Information Resource Center (mCIRC) samtang sa ubos nga hulagway, gitudlo dinhi ni SMI General Manager, Mark Williams kung unsaon pag-gamit ang mga himan nga hi-tech sulod sa mCIRC tent ngadto sa mga langyaw nga bisita.. (pbanat caption)

 

*88888

 KUNG WALA’Y TAMPAKAN PROJECT  MAYOR ESCOBILLO AMINADO
TAMPAKAN ‘WA-IL’ SA KALIBOTAN

TAMPAKAN, SOUTH COTABATO—Mismong ang amahan na mismo sa lungsod sa Tampakan, South Cotabato ang nagtug-an sa kadaghanan nga ‘wa-il’ o wala ilhi ang iyang lungsod kung wala mahidangat ang proyekto sa Tampakan Copper-Gold Project nga gipanag-iyahan sa higanteng kompanya sa mina nga Sagittarius Mines, Inc (SMI).

Kagahapong adlawa, atol sa pagbukas sa Mobile Community Information and Resource Center (MCIRC) sa lungsod diin gitambongan usab ug mga bisita gikan sa Embahada sa Switzerland, Australia ug New Zealand, mapasalamaton si Mayor Leonardo V. Escobillo tungod sa dakong epekto nga hatod sa proyekto sa SMI sa iyang dapit.

‘Kung wala ang Tampakan Project, dili gyud mailhan ang Tampakan sa tibuok kalibotan (If it we’re not for the Tampakan Project, Tampakan will not be known in the whole world),’ pintok nga pamahayag sa Amahan sa lungsod sa Tampakan.

Dugang pa ni Escobillo nga sukad nga misulod ang kompanya sa mina, mitaas usab ang kaledad sa kinabuhi sa mga taga-Tampakan ilabi na nga daghang mga oportunidad sa pangempleyo ug panginabuhian ang gihatod sa kompanya luyo saw ala pay todo nga operasyon niini.

Nahimong dinapit nga bisita sa Tampakan, sila si Hon. Ivo Sieber, His Excellency Ambassador sa nasod Switzerland, Hon. Hugh Wilson, Consul General sa nasod Australia, Hon, Andrew White, Deputy Head of Mission sa nasod New Zealand ug si Mark Williams, ang SMI General Manager.

Ang MCIRC usa ka proyekto sa SMI nga mohatod ug klarong pagpasabot ngadto sa katawhan may kalabotan sa lihok ug operasyon sa Tampakan Copper-Gold Project (TCGP) diin gigamitan ug mga hi-tech nga himan sama sa mga widescreen televisions, mga detalyadong mine life cycle, touch screen televisions ug uban pa.

Ang MCIRC sa Tampakan molungtad hangtod karong Pebrero 12 diin sukad pa kaniadtong Hunyo 2010, naglibot na sa mga dapit sama sa Kiblawan, Hagonoy, Malalag puro mga lungsod sa Davao del Sur ug mismong sa dakbayan sa General Santos ug Koronadal City. (pbanat news desk/jong gorgonio)

*888888

MGA SAMARON NGA REBELDE GIPATAHAN ARON PATAMBALAN

GENERAL SANTOS CITY—Gi-awhag karon sa mga sakop sa 73^rd Infanty Battalion sa Philippine Army ang mga samaron nga mga sakop sa rebeldeng New People’ Army (NPA) nga motahan na lamang ug mosurendir aron mapatambalan sila sa kagamhanan.

Matod ni Major Adolfo Espuelas, Jr., ang Commading Officer sa 73^rd IB nga katulo na kahigayon ang nahitabong engkuwentro sa mga sundalo ug sa mga rebelde sa kabukiran sa Malapan, Sarangani Province ug pinaka-ulahi niini mao ang sa Sitio Lagimit, Upper Suyan, Malapatan.

Sulti ni Espuelas nga daghang mga miyembro sa rebelde ang na-angol ug igo na lamang gidala sa mga kaubanan niini sa pag-ikyas.

Gipasalig pa ni Espuelas nga panahon nga mosurendir ang mga rebelde, dili sila hilabtan sa gobyerno ug igo lamang silang patambalan.

Matod pa sa labaw sa mga sundalo nga puwede silang mo-adto sa mga opisyales sa kabarangayan o dili ba kaha sa detatsment sa mga sundalo.

Dili pa lang dugay, niadtong milabay nga mga adlaw, usa ka kumander sa NPA Guerilla Front 71 ang nakabsan sa iyang kinabuhi human nga naigo sa engkuwentro sa mga tropa sa gobyerno ug NPA. Naila ang napatay nga mao si kumander Toklay. (pbanat news desk/vert castro)

*88888888

SA KIAMBA, SARANGANI

MAG-UUMA GIBUNALAN UG TUBO SA 15 KA MGA SUSPEK, PATAY

GENERAL SANTOS CITY—Gi-imbestigahan na karon sa mga sakop sa Kiamba PNP, sa maong lungsod ang usa ka panghitabo may kalabotan sa pagkamatay sa usa ka mag-uuma nga matod pa gibunal-bunalan ug tubo sa kinse ka mga armado nga naka-bonnet ug naka-jacket niadtong milabay nga mga adlaw.

Sa report nga nakuha sa Periodico-Banat, naila ang biktima nga usa ka Mario Ona, 37 anyos, minyo ug residente sa Lardizabal Farm, Kiamba, Sarangani Province.

Ang inisyal nga imbestigasyon nagbutyag pa nga kalit lamang nga gisulod sa lima ka lalaki ang panimalay sa biktima samtang kauban ang asawa niini ug puwersahang gikuha ang biktima.

Tungod sa maong insidente, gilayon mikuha ug usa ka mahait nga sundang ang biktima aron modipensa sa kaugalingon apan, gitabangan na kini sa mga suspek ug bunal ug tubo hangtod kini mamatay.

Samtang ang laing mga suspek maoy mikuha sa asawa ug gitali sa usa ka punoan ug giba-atan ang baba aron dili makasinggit.

Matod sa asawa nga si Celia Ona, hangtod karon wala pa nila masuta kung unsa gyud ang motibo sa mga suspek sa paghimo sa maong krimen. (pbanat news desk/vert castro)

*88888888

INTERNATIONAL YEAR OF THE FORESTS, GI-ANDAMAN NA SA DENR

GENERAL SANTOS CITY--Sa pakigtambayayong sa mga nangunang grupo sa nasud nga naay paghigugma sa kinaiyahan, giawhag ni Environment Secretary Ramon J.P. Paje ang tanang stakeholders nga suportahan ang nasudnong paglusad sa 2011 “International Year of the Forests,” dungan sa pagsaulog niini sa Estados Unidos karong Pebrero 2 ning tuiga.

Gusto lamang sigrohon sa DENR nga ang naasoyng kasaulogan mamahimong mahinungdanon sa kadaghanang pilipinhon ilabi na sa mga mas apektado sa pagkadaot sa kinaiyahan kon ang mokabat sa 25 milyones ka mga gitawag nga “upland dwellers” nga gikonsiderang pinakapobre sa mga pobre.

Sumala pa ni Paje ang pagsunod sa nasud sa selebrasyon niining “International Year of the Forest” dili lamang makapadangat ug kalibutanong kahibaloan nahanungod sa pag-amping sa kinaiyahan, apil na matud pa ang panginahanglanon sa reforestation ug pagpakubos sa gas emission samtang ginasuportahan sa katawhan ang “biodiversity” nga makabenepisyo ug daku sa mga Pilipino ilabi na ang mga lumulupyo sa kalasangan.

Ang nasangpit nga okasyon suportado sa University of the Philippine, Los Banos-College of Forestry; Society of Filipino Foresters (SFF); Philippine Wood Producers Association (PWPA); Philippine Tropical Forest Conservation Foundation (PTFC); Yakap Kalikasan; Women’s Initiative for Society, Culture and Environment (WISE); Bantay Kalikasan, Conservation International-Philippines (CI-Philippines); Foundation for Philippine Environment (FPE); World Wide Fund for Nature (WWF), Food and Agriculture Organization (FAO), the United States Agency for International Development (USAID); ug German International Cooperation (GTZ). (pgfruylan/PIA-SarGen)

*88888888

periodicobanat (pebrero 01-02, 2011)

‘DISGRASYA’--Makita dinhi ang usa ka sakop sa Malungon PNP samtang ginabantayan ang mga kahon sa softdrinks nga nayabo atol sa pagkatumba sa trak de karga didto sa Nagpan, Malungon Sarangani Province niadtong milabay nga adlaw. Ang dalan diin nahitabo ang aksidente ilado na kaayo nga usa ka delikadong dalan diin daghan ng kinabuhi ang nakalas. (pbanat caption/kuha sa malungon info office)

*88888888

MATOD SA BOARD MEMBER SA SOCOT

PAGDILI SA OPEN MINING ILLEGAL

KORONADAL CITY, SOUTH COTABATO---Mitingog na karon ang usa ka sakop sa Sangguniang Panlalawigan sa lalawigan sa South Cotabato may kalabotan sa kontrobersyal nga isyu sa Provincial Environment Code diin nagdumili sa pagpahigayon ug open pit mining sa probinsya.

Sa usa ka pamahayag, giklaro ni Sangguniang Panlalawigan Member, Attorney, Cecile Diel nga ang pagdumili sa Environment Code sa pagpahigayon sa open pit mining, usa gyud ka illegal nga gimbuhaton sanglit ang Kongreso lamang sa nasod ang adunay katakos nga mo-usab o mo-amyenda sa usa ka nasyunal nga balaodnon.

‘Ubos sa 1995 Mining Act ug sa Financial and Technical Assistance Agreement (FTAA), ang contractor adunay katungod nga modetermina kung unsa ang pinakahaum nga pamaagi sa pagmina base sa ilang gihimong technical study, (“Under the 1995 Mining Act and the Financial and Technical Assistance Agreement (FTAA), a contractor has the option to determine the most feasible mining method based on a technical study made”)’ batbat ni Diel sa gihimong committee hearing sa mga nagpabor sa Envi Code nga gilangkuban sa mga opisyales sa simbahang Katoliko dili pa lamang dugay.

Kahinumduman, si Diel mao ang kanhing SP Legal Committee Chairperson sa dihang napasa ang Envi Code niadtong milabay nga tuig. Sukad pa kaniadto, ginasulti na ni Diel nga ang Envi Code usa ka ‘ultra vires’ nga balaodnon tungod kay nisapaw na kini sa usa ka nasyunal nga balaod nga mao ang Republic Act 7942 o ang Philippine Mining Act of 1995—diin si kanhing South Cotabato Governor, Daisy Avance Fuentes ug karon kongresista na, usa sa mipirma kaniadto sa maong balaodnon sa Kongreso.

‘Kung ang usa ka ordinansang lokal nga gihimo mo-amyenda sa bisan unsa nga probisyon sa mas taas nga balaod, kana ‘ultra vires’ (“When you enact an ordinance which in effect amends any provision of a superior law, that’s ultra vires,”)’ dugang saysay ni Diel.

Gi-esplikar pa sa babayeng board member nga ang RA 7942 o Philippine Mining Act of 1995 wala nagdumili sa pagpahigayon ug open pit mining ug tungod nagdumili ang Envi Code sa pagpahigayon sa open pit, klaro kaayong gina-amyedahan niini ang usa ka nasyunal nga balaod—nga bisan unsaon dili gyud puwede ug illegal.

‘Bugtong ang kongreso lamang ang maka-amyenda sa balaod  (“Only Congress can amend a law”),’ dason pa sa board member.

Gi-igo pa ni board member Diel ang South Cotabato Environment Code nga nagkulang sa pagtuon ug dili kini komprehensibo. ‘Kulang sa research ug dili komprehinsibo (“It lacks research and it is not comprehensive”)’ pintok nga pamahayag ni Diel.

Niadtong milabay nga Nobyembre 2010, usa ka memorandum ang gipakanaug ni Department of Interior and Local Government (DILG) Secretary, Jesse Robredo nga nagmando sa mga opisyales sa South Cotabato nga i-rebyu ug amyendahan ang pag-ban sa open pit mining sanglit panglantaw sa maong ahensya nga sukwahi kini sa polisiya sa kagamhanan nga mopahigayon ug usa ka responsableng pagmina.

Bisan si kanhing Supreme Court Chief Justice, Reynato S. Puno mipadayag usab sa iyang opinion diin nagpasabot nga ang mga ‘kritikal nga industriya sama sa pagmina kinahanglan gyud nga bantayan sa nasyunal nga gobyerno ug mismong sa kongreso.’ Dugang pa ni Puno nga ang mga lokal nga panggamhanan, dili pa preparado ug walay kahanas sa pagdumala ug pagbantay sa mga kritikal nga industriya sama sa pagmina (Local governments are not prepared to take on the function of regulating critical industries such as mining,)’ si Puno nagkanayon. (pbanat news desk/popoy contreras)

*888888

HUBOG NALUMOS-PATAY

GENERAL SANTOS CITY---Wala nay kinabuhi ang usa ka 24 anyos nga lalaki human kini nga nalumos-patay samtang naligo sa Rajah Beach niadtong milabay nga adlaw nga hubog.

Sa report nga nakuha sa Periodico-Banat, naila ang biktima nga usas ka Raffy Fabroa, 24 anyos, ulitawo ug residente sa Octavio Village (Cannery), Polomolok, South Cotabato. Sa inisyal nga imbestigasyon sa Tambler PNP, ang pamilya sa biktima maayo ang paglipay-lipay sa maong beach resort apan, tungod sa mga gi-inom nahubog ang biktima ug naligo. Wala gilayon makit-an ang biktima ug sa ilang pagkadiskubre, igo na lamang kining naglutaw-lutaw nga wala na mag-ginhawa. Gidali pa ug hatod sa Labella Hospital sa barangay Calumpang si Fabroa apana, gideklarar na kining patay ni Dra. Anabelle Labella. Kasamtangan na karong gi-andam ang patay nga lawas ni Fabroa aron ihatod didtosa Polomolok. (pbanat news desk/vert castro)

*8888888

GIKARNAP NGA MOTORSIKLO NAREKOBER

GENERAL SANTOS CITY---Naka-iskor karon ang buhatan sa Lagao PNP, ubos ni PSI Aldrin Gonzales human usa ka motorsiklo nga gidudahang gikawat ug gipatay pa ang tag-iya niini ang malampusong na-rekober sa Malandag, Malungon Sarangani Province niadtong milabay nga adlaw.

Sa report gikan sa Lagao PNP, mi-adto ang grupo sa Lagao PNP sa Malandag, Malungon Sarangani aron kumpirmahon kung ag usa ka motorsiklo nga usa ka Jiashe Dagger, may kolor nga itom ug pula ug plakang IP-4555 gipanag-iyahan sa usa ka Mobarak Alonto Radia, kansang gibalitang gipatay sa mga karnaper niadtong milabay nga tuig.

Sa pagsusi sa mga pulis kuyog ang asawa ni Radia nga mao si Naimah Alonto, didto nakumpirma nga ang motorsiklong anaa sa kustodiya sa Malandag PNP, mao gyud ang motor sa bana niining gipatay.

Nasuta usab nga sukad pa niadtong Oktubre 30, 2010 nawala ang motor samtang gimaneho sa tag-iya nga si Mobarak apan gidagit sa wala mailhing mga suspek ug gipatay pa ang biktima. Pipila na ka adlaw diin gi-istambay ang maong motor sa usa ka tunghaan sa Malandag hinungdan nga kini gikustodiya sa kapulisan. Gi-andam na karon sa kapulisan sa Lagao ang kasong ipasaka batok sa mga suspek nga nailhan na usab sa mga awtoridad. (pbanat news desk/vert castro)

*88888888

3 KA MGA PUSHER SIKOP SA GENSAN

GENERAL SANTOS CITY---Nahimong malampuson ang gihimong operasyon kontra droga sa mga elemento sa Police Station 6 niadtong milabay nga adlaw human nga tulo ka mga suspetsadong drug pusher ang nadakpan.

Sa report nga nakuha sa Periodico-Banat, naila ang mga suspek nga sila si Rorado Dorado Dua, alyas Ding, 21 anyos, ulitawo, walay trabaho ug residente sa Purok San Vicente, Silway ning siyudad, samtang ang kauban niini nga nailang si Dan Albert Purok Kong, alyas Kim, 21 anyos, ulitawo ug residente sa Purok 5, New Society Apopong ug John Rey Tupingan, alyas Nog-nog, 22 anyos, usa ka habal-habal driver ug residente sa Lot 3, Yu Village, Apopong malampusong nakorner usab sa mga operatiba nga gipangunahan ni PSI Hoover Antonio ug PI Rodel Rosario.

Dugang sa pulis report, nadakpan ang grupo sa Zone-2 Bula ug nakuha gikan sa ilang mga posesyon ang upat ka mga plastic sachet nga may sulod nga shabu ug dili moubos sa 3 ka gramo nga gituohang nagkantidad ug P30,000.00. Nakuha usab sa ilang posesyon ang pipila ka mga paraphernalia sa illegal nga shabu ug kasamtangan na karong gina-andam ang kasong paglapas sa Republic Act 9165 o Dangerous Drugs Act samtang gibalhog sa selda sa Bula PNP. (pbanat news desk/vert castro)

*88888

PDEA 12 GUKDON ANG MGA ILADONG PERSONALIDAD NGA NALAMBIGIT SA DROGA

GENERAL SANTOS CITY---Gipasalig karon sa buhatan sa Philippine Drug Enforcement Agency Regional Office 12 nga mas todo pa ang ilang himuong pag-gukod sa mga iladong personalidad nga nalambigit sa illegal nga droga sa rehiyon12.

Matod ni PDEA-12 Regional Director, Yogi Filemon Ruiz, dili nila undangan hangtod nga dili mabutang sa selda ang mga nagpayuhot ug illegal nga droga.

Niadtong milabay nga tuig lamang, miabot ngadto sa P37 milyones ka pesos ang kantidad sa nakuha ug nakumpiskang mga illegal nga droga ug paraphernalia niini.

Niadtong milabay nga semana, tulo ka mga suspetsadong drug personalities ang gipasakahan na ug kasong kriminal human sa usa ka gihimong raid sa Silway, barangay Dadiangas West.

Samtang sa pikas bahin, gisulti ni Ruiz nga nahimong mas epektibo karon ang PDEA-12 sa operasyon niini batok sa illegal nga droga tungod usab sa kumpiyansa ug pagsalig sa katawhan sa rehiyon ngadto kanila. (pbanat news desk/jong gorgonio)

*8888888

SHABU LAB SA BOARDING HOUSE GIRONDA

GENERAL SANTOS CITY---Gironda sa mga sakop sa National Bureau of Investigation (NBI) ang usa ka boarding house nga matod pa gihimong usa ka laboratory sa illegal nga droga nga shabu.

Sa report nga nakuha sa Periodico-Banat, gironda sa mga sakop sa NBI ang usa ka panimalay nga gipanag-iyahan sa usa ka Melchor Yap sa may dalang Salazar St., barangay Dadiangas South pinaagi sa usa ka search warrant nga gi-isyu ni Judge Oscar Noel sa Branch 25 sa RTC.

Sa maong pagronda, nakumpirma gyud nga usa ka kitchen type laboratory sa shabu ang nadiskubrehan ug daghang mga paraphernalia sa illegal droga ang nakuha sa maong panimalay.

Gilayon nga gi-aresto si Yap ug ang asawa niini nga nailang si Love-Love Yap.

Nahimong malampuson ang pagronda sa panimalay ni Yap human matod pa aduay reklamo nga nakuha ang NBI nga usa ka suki niini ang nagreklamo nga nakapalit ug pait kaayo nga shabu. Gi-andam na ang kasong paglapas sa RA 9165 batok sa nadakpang si Yap. (pbanat news desk/crispen chavez)

*88888888

periodicobanat (enero 30, 2011)

‘MADAMO GID NGA SALAMAT’--Daw mao kini ang gisulti ni BFP-12 Outgoing Regional Director, FCSUPT, Samuel Perez (nagtindog) ngadto sa iyang ginsakpan sulod sa pito ka tuig niini isip labaw sa mga bumbero sa rehiyon 12. Gihulipan si Perez nga mao na karon ang Deputy Fire Chief for Administration sa tibuok nasod ni FSSUPT, Alejandro Cagampang (pinakatuo nga naglingkod) nga gikan pa sa Cagayan de Oro City. (pbanat caption/kuha ni philip chan)

*8888888

SA SOUTH COTABATO

12 ORAS NGA BROWN-OUT KARON!

KORONADAL CITY—Mo-abot ngadto sa dose ka oras ang mahitabo nga pagkapalong sa suplay sa kuryente karong adlawa sa lalawigan sa South Cotabato.

Matod sa report nga nakuha sa Periodico-Banat, nga mismong ang buhatan ni South Cotabato Electric Cooperative I (SOCOTECO I), General Manager, Santiago Tudio ang mipagawas sa anunsyo nga gikan sa National Grid Corporation of the Philippines (NGCP) nga ang mga dapit diin ginasuplayan ug kuryente sa SOCOTECO I, makatigayon gyud ug power interruption sugod karong alas sais sa buntag hangtod na sa alas sais sa gabii.

Dugang pa sa maong report, dapat nahitabo na ang maong pagkapalong sa suplay sa kuryente niadto pang Enero 16 apan gipahamtang na lamang karong adlawa tungod sa pipila ka mga rasong teknikal.

“The shutdown is for NGCP to commence the construction of the new General Santos –Tacurong 138kV transmission line and to facilitate the tapping of Koronadal/Surallah 69kV line at the section of General Santos-Tacurong 138kV line in Barangay Morales, Koronadal City,” matod ni Tudio.

Samtang magpahigayon sa ilang trabaho ang NGCP, mohimo usab ug mga preventive maintenance ang kawani sa SOCOTECO I, sugod alas sais sa buntag hangtod sa alas dos sa hapon.

Mawad-an ug mga kuryente ang mga lungsod sa Tupi, Tampakan, Tantangan, Surallah, Norala, Sto. Nino, Lake Sebu, T’boli ug Koronadal City, puro nahisakop sa SOCOTECO I. (pbanat news desk/jong gorgonio)

*8888888

KUMANDER SA NPA NGA PATAY SA GIYERA GIKUSTODIYA SA MAYOR SA MALAPATAN

GENERAL SANTOS CITY - Gitugyan na sa mga sundalo ang patayng lawas sa kumander sa New People's Army (NPA) nga napatay sa engkwentro ngadto kang Mayor Alfonso Singcoy sa Malapatan, Sarangani Province.

Sa pakighinabi gibutyag ni Major Adolfo Espuelas, commanding officer sa 73rd Infantry Batallion sa Philippine Army nga padayon pa nila nga giila karon ang pagkatawo ni Kumander Toklay sa Platoon Masda sa NPA nga napatay sa natigayong engkwentro sa Sityo Bukay, Barangay Kinam, Malapatan, Sarangani Province.

Sa pamahayag ni Espuelas nga si Kumander Toklay ang mipuli kang Kumander Yoyong nga gipapahawa sa pwesto gumikan walay accomplisments sa ilang area sa kabukirang bahin sa Sarangani og Davao del Sur. Natigayon ang engkwentro sa dihang gipangita sa mga sundalo ang mga rebelde nga mipatay sa usa ka barangay kapitan ug nakatagbo ang grupo ni Kumander Toklay hinungdan sa pagbinayluay og bala nga milungtad sa tulo ka oras. Upat ka rebelde ang gituohang samaron sa nasampit nga engkwentro. Ang grupo ni Kumander Toklay ang responsable sa pagpatay kang Barangay Captain Ramon Tanwata sa Barangay Datu Tanwata sa Malita, Davao del Sur.

*8888888

MGA BATA NASUDLAN UG ESPIRITU?

GENERAL SANTOS CITY---Kalit lamang nga nakugang ang mga residente sa Purok 2, Lanton Apopong, ning siyudad human matod pa duha ka mga bata sa maong dapit ang kalit na lamang nasudlan ug dautang espiritu.

Sa report nga nakuha, gitug-an nila Jessa Mae Basol ug Jerliza Sorabia, puro mga 14 anyos nga tulo matod pa ka mga dautang espiritu  nga nailang sila si ‘Carlo, James ug Maria’ ang mga misulod sa ilang mga kalawasan.

Matod sa inahan ni Jessa nga si Gemma, nagsugod pa niadtong nakalabay nga Lune sang pagsulod sa mga gituohang mga dautang espiritu sa duha ka mga menor de edad.

Dugang pa sa inahan ni Jessa nga ang iyang nakatug-an pa kaniya nga ang mga gikaingon nga dautang espiritu nakagusto matod pa kanila. Hangtod karon nagpabilin pa gihapon sa balay tambalanan ang anak niini samtang ginahulat ang tinuod nga rason sa pagkasakit sa maong menor de edad. (pbanat news desk/vert castro)

*88888888

MISIS KRITIKAL HUMAN NATUMBAHAN UG LUBI

GENERAL SANTOS CITY---Usa ka misis ang anaa karon sa balay tambalanan human kalit lamang nga natumbahan sa usa ka punoan sa lubi didto sa kaugalingong panimalay niini sa Kablakan, Maasim, Sarangani Province

Matod sa taho, ang biktima nailang usa ka Kimberly Iban Tano, ug igo na lamang nakita sa silingan niini nga si Gina Pinya nga wala nay panimuot ug nadat-ugan ang ulo niini sa kapin 40 ka tiil nga lubi. Hangtod karon nagpabilin pa gihapon sa Diagan’s Clinic and Hospital ang nasangpit nga ginang ug kritikal lamang gihapon ang kondisyon.

Dako ang pagtuo sa mga silingan niini nga tungod sa kusog nga hangin, natumba ang lubi didto mismo sa panimalay ni Tano. (pbanat news desk/crispen chavez)

*88888888

periodicobanat (enero 27, 2011)

 

‘BISITA SA MGA BUMBERO’---Gidawat dinhi ni Gensan City Mayor, Darlene Custodio sila si Bureau of Fire and Protection (BFP) outgoing Regional Director. FCSUPT, Samuel Perez, CESO VI ug umaabot nga bag-ong labaw sa BFP-12 nga si FSSUPT Alejandro Cagampang. Kuyog usab dinhi si Gensan Fire Marshall FCI Renel Belonio. (pbanat caption)

*88888888

BASAG KOTSE GANG MI-ATAKE NA POD

GENERAL SANTOS CITY---Mi-atake na pod ang Basag Kotse Gang sa dakbayan ug malampusong nakabiktima ug usa ka negosyante.

Sa report nga nakuha sa Periodico-Banat, usa ka Ramil Sioco, 38 anyos, minyo ug residente sa Rosario Village, barangay Lagao ning dakbayan ang mipatala nga ang iyang gimaneho nga usa itom nga Nissan Terano nga may plaka JBX-503 ug gipanag-iyahan sa usa ka Leonardo Sagales ang nahimong biktima sa mga kawatan.

Sa inisyal nga imbestigasyon sa kapulisan, igo lamang giparada ang sakyanan nga Terano sa may dalang Balimbing, barangay Dadiangas North ug pipila lamang ka minuto nabuak na ang walang bahin nga bintana.

Nakuha sa mga suspek ang usa ka bag nga gipanag-iyahan ni Sagales ug may mga sulod nga usa ka .45 nga Colt pistol, tulo ka mga magazines ug usa ka Nokia N73 dugang pa ang pipila ka mga tseke.

Hangtod karon padayon pa gihapon nga gina-imbestigahan sa kapulisan ang maong insidente. (pbanat news desk/vert castro)

*888888

BABAYE NAGHIKOG PATAY

GENERAL SANTOS CITY---Laing insidente na sab sa pagpakamatay ang nahitala sa kapulisan sa Police Station 3.

Sa report sa kapulisan, naila ang biktima nga usa ka Joy Diamante Inventado, 33 anyos, minyo, walay trabaho ug residente sa Diamante Compound, Purok San Isidro, Upper Baluan.

Ang inisyal nga imbestigasyon nagtug-an pa nga igo na lamang nakita sa usa ka Cristine Didal ang nagbitay na nga biktima sa kuwarto niini. Gilayon nga nangayo ug tabang ang nakakita ug gihatod sa balay tambalanan ang biktima apan, igo na lamang kining gideklarar nga patay na. Ginasuta pa karon ang tinuod nga motibo sa pagpakamatay sa biktima. (pbanat news desk/vert castro)

*8888888

PNP-12 ALERTADO HUMAN SA BOMBA SA MAKATI

GENERAL SANTOS CITY---Alertado karon ang tibuok puwersa sa PNP-12 human nga mibusikad ang usa ka bomba sulod sa usa ka bus de pasahero didto sa Makati niadtong milabay nga adlaw.

Sa usa ka pamahayag ni PNP-12 Regional Director, Atty. PCSUPT Gil Meneses, iyaha dayon gipanaug ang kamandoan sa todo nga pag-alerto sa tanang puwersa kapulisan sa tibuok rehiyon.

Tungod sa mando niini gipakatag ang tanan nga mga bomb squad units lakip ang mga K-9 dogs sa mga nag-unang dapit sa rehiyon sama sa mga siyudad ug dagko nga mga kalungsoran.

Gi-awhag pa ni Meneses ang tanan nga mga bus operators nga kinahanglan mohimo ug dugang nga mga pagsusi sa ilang mga sakyanan aron masiguro nga dili gyud makasulod ug makasakay ang mga dautang elemento nga adunay dautang mga bahad. (pbanat news desk/vert castro)

*88888888

DUGANG MGA SUNDALO GIN-DEPLOY SA SULTAN KUDARAT

KORONADAL CITY - Mas ginpahugtan pa sang mga suldado ang seguridad sa Columbio, Sultan Kudarat makaligad sang serye sang pag-atake sang mga rebelde nga New Peoples Army (NPA).

Suno kay Lt. Col. Joel Alejandro Nacnac, commanding officer sang 27th Infantry Battalion (IB) nga nagdeploy sila sang dugang nga tropa sa nabukid nga bahin sang Columbio agud maprotehiran ang mga residente batok sa harassment sang mga NPA nga ginapangunahan ni Kumander Joyjoy.

Sa subong, 10 ka pamilya ang nagbalakwit gikan sa Sitio Bantangan bangud sa kahadlok sa mga rebelde.

Gintawag naman sang opisyal nga "desperate retaliatory acts" ang ginhimo sang NPA, matapos nadulaan sang suporta gikan sa mga residente.

Humalin sang nagligad nga semana, tatlo ka pag-atake na ang ginhimo sang NPA sa Columbio, Sultan Kudarat.

Sa subong, nagapabilin nga naka-full alert ang 27th IB kag padayon man ang ila pursuit operation batok sa mga NPA nga naglunsar sang pag-atake.

*888888888

KAPIN 5 MIL KA MGA GUN PERMITS GINPAGAWAS NA

KORONADAL CITY-Ginpaguwa na sang Philippine National Police (PNP) ang masobra sa 5 mil ka mga provisional gun permits sa mga gun holders sa Rehiyon 12 nga nag-avail sang firearms amnesty program sang gobyerno.

Suno kay C/Insp. Romeo Galdo Jr., firearms, explosives, security agencies and guards section chief sang PNP-12 nga ila gin-isyu ang provisional ukon temporary licenses samtang ginahulat ang official registration sang tanan nga mga armas luthang nga sakop sang amnestiya.

Sa rehiyon 12, naglab-ot sa 5,867 ang nag-aplay sang amnestiya apang 5,107 lamang ang naaprobahan.

Ginpaathag pa ni Galdo nga sang nagligad nga Setyembre naaprobahan ang mga temporary license kag valid ini sa sulod sang isa ka tuig ukon tubtub sa tion nga mapaguwa na ang permanent licenses ukon registration. Sa subong, napadala na sa nagkalain-lain nga mga police units ang masobra sa 3 mil ka mga temporary licenses.

Sa pihak sini, wala gihapahanugutan sang provisional licenses ang pagdala sang armas luthang sa guwa sang ila sini mga puluy-an.

*88888888

LOKALISASYON SA PEACE TALKS SA MGA REBELDE NO PROBS SA MinDA

GENERAL SANTOS CITY---Gipadayag karon sa labaw sa Mindanao Development Authority (MinDA) nga walay problema alang kanila kung mamahimong lokal ang panag-istorya sa Kalinaw tali sa mga rebeldeng NPA ug sa gobyerno.

Sa pamahayag ni MinDA Chairperson, Lu Antonino, suportado niini ang pag-localize sa peace talks ngadto sa mga rebelde. Rason pa sa maong opisyal nga ang mga rebelde ug mga lokal nga mga opisyales dugay na nga magka-ila ug dali na lamang ang panaghisgut.

Dugang pa ni Antonino nga ang mga lokal nga lideres ug ang mga labaw sa rebelde ang mas nasayod sa tinuod nga sitwasyon sa ilang mga dapit ug dako ang posibilidad nga kini mamahimong malampuson. (pbanat news desk/popoy contreras)

*888888