periodico banat socsksargen

PANAGBULAG?--Si Bise Mayora Flor Congson (wala) ug Kongresista Darlene Antonino-Custodio (tuo) parehong nagpadayag nga mopapili gyud isip alkalde sa dakbayan sa Gensan karong umaabot nga 2010 elections..Ang problema pareho sila ug partido ug ilado na kaayo nga dugay na nga suod nga maghigala ug kapamilya sa partidong Achievement With Integrity Movement (AIM)..Unsa kaha ang mahitabo? Adunay PANAGBULAG ba o adunay nangluod lang? (pbanat file photo) *888888888

BISE MAYOR CONGSON MODAGAN GYUD UG MAYOR, ANDAM ATBANGAN SI DARLENE

Bisan tuod nga halayo pa ang eleksyon, daghang mga pulitiko dinhi sa dakbayan ang nagpanikad na nga mopahibalo sa ilang mga interes nga modagan pag-usab sa umaabot nga 2010 National and Local elections.

Sa pakisusi sa Periodico-Banat, nahibalo-an nga mismong si last-termer congresswoman, Darlene Antonino-Custodio nagpadayag na gyud sa iyang dakong interes nga mopapili isip mayor sa dakbayan hulip kang last termer Gensan City Mayor Pedro Acharon, Jr. Matod sa mga balita, andam gyud nga atubangon ni kongresista Antonino-Custodio ang responsibilidad nga mahimong mayora sa Gensan panahon nga moabot ang pinili-ay.

Apan, luyo sa tinguha ni kongresista Darlene Antonino-Custodio nga magpapili isip alkalde sa syudad, nagpahibalo usab sa iyang dakong pangandoy ug interes ang last-termer nga bise mayor sa dakbayan nga si Florentina Congson. Sa pakighinabi sa lokal nga media ngadto kang Congson, gisulti gyud niini nga andam siyang modagan ug mohulip sa mabakanteng posisyon ni Mayor Jun Acharon karong 2010.

Matod ni Congson, isip usa ka pulitiko nga hanas na kaayo sa eksperensya sa pagpadagan sa syudad, may katakos gyud kini nga mamahimong inahan sa dakbayan.

Kahibaloan nga si Congson ug si Antonino-Custodio dugay na nga magka-alyado ug magka-uban sa partido nga Achievement With Integrity Movement (AIM) diin ang amahan sa kongresista mao ang nagtukod nga si former Gensan City Mayor, Adelbert Antonio nga karon sakop na usab sa bag-ong peace panel sa Mindanao nga maoy nangita ug solusyon nga ma-undang ang kagubot sa Mindanao tali sa mga sundalo ug rebeldeng Moro Islamic Liberation Front (MILF).

Sa pamahayag ni Congson, gisulti niini nga adunay mahitabo nga caucus sa grupo sa AIM nga maoy mamahimong basehan sa pagpili kung kinsa ang mamahimong standard bearer sa AIM alang sa posisyon nga mayor sa Gensan. Pero, gipunting na sa babayeng bise mayor nga andam kining modagan bisan tuod nga dili makadaug sa konsultasyon ug caucus sa ilang partido. Ang AIM Convention nga sagad maoy sungbanan sa mga miyembro niini kung kinsa ang ituboy sa ilang partido sa usa ka partikular nga posisyon sa gobyerno mao usab ang basehan kung aduna ba gyud katakos ang usa ka kandidato nga mopilde ug mohatod ug kadaugan batok sa mga kaatbang niini.

Wala hinuon gisulti sa bise mayora kung andam ba kining mopapugong kung isugyot kaniya sa partido sa AIM ug sa liderato sa AIM nga gipangulohan ni Adel Antonino ug Darlene Antonino-Custodio nga dili na lamang ipadayon ang iyang interes nga magmayor.

Apan, sa paglibot sa Periodico-Banat sa dakbayan kagahapong adlawa, daghang mga lokal nga residente ang nagpadayag sa ilang mga opinsyon ug komento may kalabotan sa posibleng pagbangga-anay sa mga miyembro sa partido sa AIM karong 2010 elections. Matod sa mga nahinabi sa Periodico-Banat, nabalaka sila tungod posibleng maapektohan gyud ang klima sa pulitika ug kalambo-an sa syudad panahon nga magbulag-bulag ang mga dagkong lider sa AIM.

Una na pod nga migawas ang mga hungihong nga matod pa andam mo-atbang ang pipila ka mga iladong personalidad sa pamilyang Acharon batok sa mga Antonino. (pbanat news desk/jong gorgonio)

*8888888888

MAYOR FALGUI GISIGURO DILI MOBIYA ISIP MAYOR SA KIAMBA

Gipaniguro ni Mayor Rommel Falgui sa lungsod sa Kiamba, Sarangani Province nga dili gyud kini mobiya isip alkalde sa maong lungsod sa umaabot nga piniliay karong 2010.

Sa usa ka pamahayag ni Falgui sa lokal nga media, gibutyag niini nga dili pa kini mobiya isip mayor sanglit anaa pa lamang kini sa unang termino. Gisulti usab ni Falgui nga pag-abot sa 2010 elections, mayor lamang gihapon ang iyang daganan bisan kinsa pa man ang mamahimo niining kaatbang.

Sa pagmonitor sa Periodico-Banat, migawas ang pangalan sa kanhing bokal sa lalawigan sa Sarangani ug lumad nga taga-Kiamba nga si board member Danny Martinez ang posibleng mamahimong kontra ni Mayor Falgui sa umaabot nga 2010 elections. Si Martinez nga iladong ka-alyado ug suod nga higala ni WBC Lightweight Champion ug Pound for Pound King, Manny Pacquiao, mao usab ang gihugun-hugonan nga i-atbang sa kasamtangang mayor nga si Falgui.

Si Falgui nga iladong amigo ug kaalyado usab ni Sarangani Province, Governor Miguel Rene Dominguez ug Congressman Erwin Chiongbian una ng nagkanayon nga ipadayon gyud niini ang mga programa nga iyang nasugdan sa iyang administrasyon sa pagpangalagad sa Kiamba.

Kasamtangan karon nga gimugna ang usa ka Municipal Fishport Complex sa Kiamba isip tubag sa nagkataas nga sugyot sa kadaghanan nga Kiambans nga makabaton ug unay nga fishport complex.

Wala pa hinuon mibungat ug mihatag sa iyang pamahayag si former board member Danny Martinez may kalabotan sa sugyot ni Falgui. (pbanat news desk/jong gorgonio)

*8888888888

MGA RESIDENTE SA MAITUM, NAGREKLAMO SA DTI-SARANGANI

Mi-alma ug nagreklamo karon ang mga residente sa lungsod sa Maitum, Sarangani Province human matod pa wala’y aksyon nga gihimo ang ahensya sa Department of Trade and Industry-Sarangani (DTI-Sarangani) may kalabotan sa grabeng pagpatuyang sa pagsaka sa presyo sa mga pamaliton sama sa bugas ug uban pa sa maong dapit.

Sa usa ka text message nga nahiabot sa Periodico-Banat SOCSKSARGEN kagahapong adlawa, usa ka texter ang nagbutyag nga hangtod karon wala pa gihapon gilantaw sa DTI-Sarangani ang kahimtang sa taas nga mga presyo sa pamaliton sa ilang dapit ilabi na sa Maitum ug Kiamba. Matod sa maong texter nga mihangyo nga itago lamang ang iyang cellphone number, dili gyud maayo ug dili makatarungan nga dili mahatagan ug igong pagtagad sa maong ahensya sa kagamhanan ang ilang mga mulo sanglit dako ang ilang kabalaka nga basin pag-abot sa panahon grabeng pag-antos ug kalisod na ang matagamtaman sa katawhan sa Maitum ug Kiamba tungod sa way puas nga pagsaka sa presyo sa mga nag-unang palaliton.

‘Good pm po sir..Wala pong aksyon na ginawa ang mga DTI dito sa Sarangani. Lalong-lalo na dito sa Maitum.Kailan po ba sila gagawa ng aksyon kung may mamamatay na ng dahil sa gutom? Mahal pa rin po ang presyo ng mga bilihin,’ matod sa text message nga gipa-abot nganhi sa Periodico-Banat.

Ang maong mulo sa mga taga-Maitum paningkamutan nga ipaabot sa Periodico-Banat ngadto sa ahensya sa DTI-Sarangani aron mahatagan ug solusyon ug kasulbaran ang maong problema. Sunod adlaw, atong ipatubag ug ipatik ang tubag sa DTI-Sarangani alang sa tanan nga mga residente sa Maitum ug Kiamba, Sarangani Province. Hatagan usab sa Periodico-Banat ang DTI ug tsansa aron matubag ang mga pasangil nga matod pa walay aksyon nga ginahimo ang ilang ahensya sa pagbantay ug pagsusi sa presyo sa mga palaliton sa Sarangani Province. (pbanat news desk/jong gorgonio)

*88888888