periodicobanat (agosto 11, 2009)

DISGRASYA--Mao kini ang nahitabo sa tulo ka mga biktima nga nagsakay sa usa ka motorsiklo ug mibangga sa usa ka bus de pasahero nga iya sa Yellow Bus Lines didto sa Malungon, Sarangani Province niadtong milabay nga adlaw. Gidimalas gyud kay nakabsan sa ilang mga kinabuhi ang tulo ka mga biktima. (kuha ni jojo gocotano/malungon info office/pbanat caption) *8888888

3 KA KOMPANYANG LANGYAW MAG-NEGOSYO SA REHIYON 12

GENERAL SANTOS CITY---Tulo ka mga langyaw nga kompanya ang nagpadayag karon sa ilang dakong interes nga mobubo ug puhunan sa rehiyon 12.

Kini matod ni Muslim Affairs Executive Director ug Undersecretary, Datu Ali Sangki sa pakighinabi sa lokal nga media niadtong milabay nga adlaw. Matod ni Sangki, mibisita bag-ohay pa lamang sa rehiyon ang tulo ka mga kompanya ug mibutyag nga may intensyon sila nga mobubo ug puhunan sa Mindanao. Nasayran pa nga gibisita sa mga negosyante ang lalawigan sa Sultan Kudarat ug gitan-aw ang dakong posibilidad sa pagtukod sa ilang mga negosyo. Ang mga kompanya sa Royal Family sa nasod Kuwait, Sami Labs Ltd ug laing usa pa ang mibisita sa rehiyon nga nagpadayag nga magtukod ug mga pharmaceutical ug nutritional industries sa rehiyon 12 panahon nga ila na kining madesisyonan. (pbanat news desk/jimboy villar)

*8888888

DUHA KA MGA SUSPEK SA KIDNAPPING SA COTABATO DAKPAN

GENERAL SANTOS CITY—Duha ka mga suspek nga mag-amahan ang gidakop niadtong milabay nga adlaw sa mga elemento sa Cotabato City PNP human nga gitudlong mga suspek sa nahitabong pagdagit sa usa ka dalagita nga estudyante sa STI-Cotabato.

Sa report nga gipaabot sa PNP 12 nganhi sa Periodico-Banat, naila ang mga suspek nga usa ka Ahmad Dibaratun, 44 anyos, minyo ug residente sa Barangay Katuli, Sultan Kudarat, Maguindanao Province ug ang anak niini nga usa ka JOmali Dibaratun.

Sa inisyal nga imbestigasyon sa kapulisan, nadakpan ang tigulang nga Dibaratun human sa gipahigayong entrapment operations sa usa ka kan-anan sa Cotabato. Nakigkita matod pa ang suspek sa inahan sa biktimang si Joyce Bag-ao aron papirmahon sa usa ka dokumento nga nagbutyag nga wala gidagit ug gikidnap ang anak niining si Joyce kundili igo lamang nakigtaban sai yang anak nga si Jomali.

Apan, ang laing imbestigasyon sa mga pulis nagtug-an nga giti-onan ug armas ang babayeng biktima ug gipugos nga pagpasakay sa usa ka sakyanan human gidala didto sa Sultan Naga, Dimaporo, Lanao del Norte.

Tungod sa mga impormasyong nahipos gikan sa pamilya sa biktima, gidakop si Ahmad sa maong kan-anan ug didto nakuha kaniya ang impormasyon kung asa gitago-an ang dalagang si Joyce.

Malampusong nakuha sa mga awtoridad ang biktima samtang ang duha ka mga suspek ang gipasakaan na karon ug kasong kidnapping with serious illegal detention sa korte sa Cotabato. (pbanat news desk/jimboy villar)

*8888888

BALAOD SA TRAPIKO SA GENSAN APRUBADO NA

GENERAL SANTOS CITY---Aprubado na gyud ug andam ng ipatuman ang usa ka balaodnon nga napanday sa Sangguniang Panlungsod sa syudad may kalabotan sa trapiko ug mga bag-ong muntar nga mga traffic light systems sa Gensan.

Mao kini ang gibutyag ni Gensan City Mayor Pedro Acharon Jr., sa lokal nga media niadtong milabay nga adlaw. Matod ni Acharon, panahon nga ma-implementar na ang City Ordinance No. 7, ang balaodnon nga nagtumong sa pagpatunhay sa maayong dagan sa trapiko ug mga bayolasyon sa mga katawhan panahon nga molapas niini.

Kung kaniadto, wala’y igong silot ang mga nag-jay walking nga mga pedestrian apan pinaagi sa maong ordinansa may mga ipahamtang na kini nga mga silot.

Sa maong balaodnon usab nasayran nga adunay P100 nga multa ngadto sa mga tawo nga molapas sa jay walking nga bayolasyon ug ipailawom kini sa seminar. May multa usab ang kontrobersyal nga No Right Turn on Red Light nga nagkantidad ug P1,000 alang ngadto sa mga motorista.

Hinuon, aminado ang alkalde nga dili kini mahingpit nga mapatuman panahon nga dili kini mamantala sa mga lokal nga pamantalaan sa syudad. (pbanat news desk/boni santillan)

*88888888

8 ANYOS PATAY HUMAN GIBUNGGO SA TRAK ANG GISAKYANG MOTOR

GENERAL SANTOS CITY---Nakabsan sa iyang hinulamang kinabuhi ang usa ka otso anyos nga batang babaye niadtong milabay nga adlaw lakip na usab ang nagmaneho ug usa ka backride niini human nga gibanggaan sa usa ka trak de karga niadtong milabay nga adlaw.

Sa report nga nakuha, naila ang biktima nga usa ka Diana Rose Vertuso, residente sa San Lorenzo Village, Apopong ning dakbayan.

Matod ni SPO4 Wilfredo Santaniez sa Traffic Control Division, gibanggaan sa usa ka trak nga gimaneho sa usa ka Mario Booc nga residente sa South Cotabato ang gisakyang motorsiklo sa biktima. Gidali pa ug hatod sa Doctors’ Hospital ang mga biktima apan ang batang otso anyos, gideklarang dead on arrival.

Kasamtangan karong gikustodiya sa Pendatun PNP ang drayber sa maong trak samtang ang mga kaubanan sa batang biktima anaa pa gihapon sa kritikal nga kondisyon. (pbanat news desk/rare colas)

*888888

11^TH TUNA CONGRESS KARONG AGOSTO NA

GENERAL SANTOS CITY---Karong katapusang semana na sa bulan sa Agosto ang 11^th Tuna Congress nga ipahigayon dinhi sa syudad.

Kini ang gibutyag ni Marfenio Tan, presidente sa SOCSARGEN Federation of Fishing and Allied Industries Inc (SFFAII) sa lokal nga media niadtong milabay nga adlaw. Matod ni Tan, himuon ang Tuna Congress karong umaabot nga Agosto 27-29, 2009 didto sa Lagao Gymnasium.

Batbat pa sa iladong negosyante sa tuna nga ang maong panagtigom sa mga nalambigit sa industriya sa tuna adunay mahinungdanong tumong nga mao usab ang maghisgot sa kasamtangang problemang gisag-ubang sa tuna industry.

Ang Tuna Congress mao usab ang mohan-ay sa himuon nga solusyon sa mga negosyante sa tuna may kalabotan sa ilang mga problema ilabi na ang pagdumili sa nasod Indonesia nga makakuha ang Pilipinas sa mga isda niini. Usa usab nga hisgutan mao ang territorial waters boundary sa mga nasod sa Pilipinas, Indonesia, China, Vietnam, Singapore, Malaysia ug uban pa.

Nagbitbit ug temang, “Changing Mindsets to Sustainable Fisheries,” ang umaabot nga panagtigom sa mga nagpaluyo sa tuna industry. (pbanat news desk/popoy contreras)

*8888888888

TUNGOD SA DAGHANG NOBYO, DALAGITA NAGPAKAMATAY

GENERAL SANTOS CITY---Patay na nga nahidangat ang usa ka 16 anyos nga dalagita nga residente sa barangay Dalisay, Tampakan, South Cotabato niadtong milabay nga adlaw human nga matod pa mi-inom kini ug herbicide tungod sa problema sa mga nobyo niini.

Sa report nga nahipatik sa Bombo Radyo South Cotabato, usa ka alyas Inday, 16 anyos ang gidala pa sa iyang mga kabanay sa balay tambalanan apan wala na kini maka-abot pa ug nakabsan sa iyang kinabuhi. Sa usa ka pamahayag sa amahan niini, naglibog matod pa ang iyang anak kung kinsa ang pili-on sa lima ka mga nobyo niini nga hurot nagmahal ngadto kaniya.

Dason pa sa kabanay sa biktima nga gikapoy na kini nga mopili kinsa gyud ang pinakatimbang sa iyang dughan. Hangtod sa pagsulat ning maong balita, ang patay nga lawas sa biktima anaa pa gihapon sa South Cotabato Provincial Hospital. (pbanat news desk/popoy contreras)

*8888888

22 GIPATAY SA MGA PAGBAHA SA REHIYON 12

GENERAL SANTOS CITY—Mi-abot ngadto sa 22 ka mga tawo ang nakabsan sa ilang mga kinabuhi human nga kalit nga gi-atake sa mga pagbaha ang tibuok rehiyon 12 niadtong milabay nga semana.

Sa report gikan sa Department of Social Welfare and Development Office (DSWD) Regional Office 12, unom ang namatay sa lalawigan sa Sarangani, duha sa North Cotabato ug laing onse pa sa probinsya sa Maguindanao.

Ang buhatan usab sa National Disaster Coordinating Council (NDCC) nagbutyag nga sa singkuwenta ka mga lungsod ug upat ka mga syudad, miabot sa 505,102 ka mga indibidwal ang naapektohan o 106,635 ka mga pamilya ang apektado sa mga pagbaha.

Nasuta usab nga mi-abot ngadto sa P1.146 bilyones ang kinatibuk-ang danyos sa mga pagbaha diin P299.5 milyones niini ang naguba sa mga imprastraktura ug laing P846.32 milyones sa natad sa agrikultura.

Hangtod karon may mga pamilyang apektado pa gihapon sa baha nga nagpabilin sa mga evacuation centers sa Sultan Kudarat ug Cotabato nga miabot ngadto sa 3,204 ka mga pamilya. (pbanat news desk/jong gorgonio)

*888888888

MAG-UUMA NGA ASSET SA MILITAR GIPUSIL-PATAY

GENERAL SANTOS CITY---Patay ang usa ka mag-uuma sa probinsya sa Sultan Kudarat niadtong milabay nga adlaw human nga gipusil-patay gamit ang usa ka M1 Garrand Rifle sa mga wala pa mailhing mga suspek.

Matod sa report sa Sultan Kudarat Police Provincial Office, ang biktima nailang usa ka Humberto Tacan, 40 anyos, minyo ug residente sa barangay Tran, Lebak, Sultan Kudarat. Dugang sa report, igo lamang mikuha si Tacan sa iyang buhing karabaw ug mopauli na unta apan kalit na lamang kining gibabagan sa mga armado. Matod sa usa ka Alvino Rojales, nga kuyog sa biktima niadtong tungora paspas kaayo ang panghitabo hinungdan nga wala niya maila ang mga hitsura sa mga mamumuno. Maayong pagka-igo sa iyang ulo ang biktima nga mingresulta sa iyang kamatayon.

May mga balita pa nga miabot nga si Tacan matod pa usa sa mga asset sa mga sundalo hinungdan nga gibalikan kini ug gipatay. Hangtod sa pagsulat ning maong balita, padayon pa gihapon ang ginahimong imbestigasyon ning maong insidente. (pbanat news desk/rare colas)

*888888

BFP-12 MOBALHIN NA SA KORONADAL CITY

GENERAL SANTOS CITY—Ibalhin na ang Regional Office sa Bureau of Fire Protection gikan sa General Santos City padulong sa Koronadal City, South Cotabato.

Mao kini ang migawas nga report gikan sa maong buhatan ug nasayran usab nga karong petsa kinse sa Agosto, pormal na nga imuntar ang Regional Office sa mga bumbero didto sa Rendon Street, Barrio 1, Koronadal City.

Ang pagbalhin sa regional office sa BFP-12 nahisubay sa kamandoan ni presidente Gloria Arroyo nga ang tanan nga mga regional offices angayan nga mobalhin sa Seat of Regional Center sa rehiyon 12, pinasikad sa Executive Order 304.

Pipila sa mga ahensya nga mibalhin na sa Koronadal ang DepEd, NBI, DSWD, PAG-IBIG, SSS, LTO ug uban pa. (pbanat news desk/boni santillan)

*8888888