periodico banat (nobyembre 26, 2010)

HOSPITAL, PITO KA AMBULANSYA GIBIDA NI PACMAN SA MGA SARANGAN

ALABEL, SARANGANI PROVINCE----Gibida karon ni Pound for Pound King ug Sarangani Congressman, Manny Pacquiao ang iyang mga gibitbit nga mga maayong balita alang sa mga Sarangan, atol sa pag-abot niini kagahapong adlawa gikan sa kaulohang Manila ug sa away niini batok sa Mexicanong si Antonio Margarito. Sa pag-abot ni Pacman sa Sarangani ug General Santos City, gisugat kini ug engrandeng hero’s welcome diin migamit pa ug mga helicopter ang Sarangani aron lamang ibubo ang mga confetti ug may mga gigunitan pa nga mga banderitas ang mga estudyante ug mga supporters niini nga nag-atang sa kadalanan. Si Cong. Pacman sa iyang pamahayag sa atubangan sa libo-libo ka mga Sarangan nga misugat kaniya sa Sarangani Provincial Capitol mihatod gilayon sa maayong balita nga matod pa niini usa ka katumanan sa iyang mga pasalig sa nakalabay nga eleksyon. “Binigyan po tayo ng P200 million para sa ating hospital. At sinabi po niya (Presidente Aquino) na isasali niya ito sa budget ngayong 2011,” sulti ni Pacquiao atubangan sa mga taga-Sarangani. Gidugang pa sa Pambansang Kamao ug karon representante sa Sarangani didto sa hawanan sa kongreso nga misugot kini nga mamahimong endorser sa Philippine Charity Sweepstakes Office (PCSO) nga wala’y bayad apan kinahanglan nga adunay pito ka mga bag-ong ambulansya nga ihatag alang sa iyang distrito. Ang pito ka mga ambulansya ipang apod-apod sa pito ka lungsod sa Sarangani nga mao ang Alabel, Malapatan, Glan, Malungon, Maasim, Kiamba ug Maitum. Sa pag-abot usab niini, mipadayag kini ug pasalamat ngadto sa mga Sarangan tungod sa grabe nga suporta nga gihatag kaniya dili lamang sa nakalabay nga pinili-ay kundili sa tanan nga mga engkuwentro niini ibabaw sa ring. Ang pag-abot usab ni Pacman nahitunong sa pag-abli sa 8th MunaTo Festival ug 18th Foundation Anniversary sa lalawigan sa Sarangani. Mismong sila si Gobernador Miguel Dominguez, Vice Governor Steve Solon, mga Provincial Board Members ug ang pito ka mga alkalde sa pito ka mga lungsod sa Sarangani ang personal nga misugat kang Pacquiao. Kahinumduman, sa nakalabay nga eleksyon, gibandilyo ni Pacquiao isip nag-unang plataporma de gobyerno niini nga mopatukod kini ug usa ka balay tambalanan nga bugtong moserbisyo lamang sa mga Sarangan. Matod ni Pacquiao nga kinahanglan na gyud sa Sarangani nga magbaton ug kaugalingong ospital alang sa mga kabus niini nga mga residente. Buot ni Pacquiao nga mahatagan ug igong atensyon ang panglawas sa iyang mga ginsakpan inay nga magpabilin nga sunod nga prayoridad sa mga tambalanan sa General Santos City. (pbanat news desk/jong gorgonio)

DIONESIA PACQUIAO MIHANGYO SA IGSOON NGA NAKAPUSIL NGA MOPAKITA NA

ALABEL, SARANGANI PROVINCE----Gihangyo karon sa inahan ni Pound for Pound King ug Sarangani Congressman, Manny Pacquiao nga mao si Dionesia ang igsoon niining taga-Polomolok, South Cotabato nga motahan na sa kaugalingon ug mopakita aron mahatagan ug solusyon ang matod pa pagkalambigit niini sa insidente sa pagpamusil sa maong lungsod niadtong milabay nga mga adlaw. Sa usa ka pamahayag ni Dionesia, gisulti niini nga walay kamatuoran nga ang ilang pamilya nagtago sa igsoon niining si Bernardito Dapidran nga maoy gitudlong responsable sa pagpusil-patay sa silingan niini tungod lamang sa iro. Matod ni Nanay Dionesia, bisan siya natingala nga sa iyang pag-abot gikan sa Amerika wala niini makit-i ang igsoon nga unta iyang hatagan ug pasalubong. Nanghinaut na lang hinuon ang inahan sa Pambansang Kamao nga mopakita ang igsoon niini aron mahatagan ug katin-awan ang problema nga gisag-ubang niini. (pbanat news desk/jimboy villar)


GOB MIGS, NALIPAY SA BITBIT NI PACMAN NGA HOSPITAL UG AMBULANSYA

ALABEL, SARANGANI PROVINCE----Mismong si Sarangani Governor, Miguel Rene Alcantara Dominguez mipadayag sa iyang kalipay ug pagmaya sa hatod nga maayong balita ni Pound for Pound King ug Sarangani Congressman Manny Pacquiao atol sa pag-abot niini kagahapong adlawa sa Sarangani Province. Sa pag-abot ni Pacquiao, gibida dayon niini nga ang presidenteng si Noynoy Aquino mipasalig na ngadto kaniya nga mohatag ug P200 milyones isip badyet sa itukod nga hospital sa Sarangani. Dugang pa niini, gipasi-atab usab ni Pacman ang pagdawat niini ug libreng endorsement ngadto sa Philippine Charity Sweepstakes Office (PCSO) baylo ang pito ka mga bag-ong ambulansya alang sa pito ka mga lungsod sa Sarangani. Matod ni Dominguez, dili na kinahanglan istoryahan pa ang nakalabay na sa pulitika ug kinahanglan ang tanan nga mga lideres sa Sarangani magkahi-usa alang sa kalamboan sa mga Sarangan. Si Dominguez nga iladong ka-atbang ug partido ni Peoples’ Champ, Manny Pacquiao mitug-an pa nga ang panaghi-usa maoy nag-unang ehemplo aron mahatod ngadto sa mga Sarangan ang mga nag-unang serbisyo publiko sama sa panglawas, edukasyon, hapsay ug kalinaw ug imprastraktura. (pbanat news desk/jong gorgonio) *88888888

19 ANYOS NGA BABAYE NAGHIKOG-PATAY

GENERAL SANTOS CITY---Patay ang usa ka 19-anyos nga babaye ug gituohang buntis ug duha ka bulan didto sa Lote, Calumpang ning dakbayan kagahapong adlawa. Sa report nga nakuha sa Police Station 5, naila ang biktima nga usa ka alyas Ginalyn Avenido, 19 anyos ug kalive-in partner sa usa ka Gino Santiago. Sa inisyal nga imbestigasyon, nakit-an na lamang matod pa sa live-in partner niining si Gino nga nagbitay ang iyang kapuyo sulod sa ilang lawak pipila ka mga minute nga mibiya kini sa ilang gipuy-an. Gitug-an pa ni Gino nga adunay gamay nga panaglalis nga nahitabo ngadto kanila apan migawas na lamang kini aron motrabaho. Tungod kay na-late na sa iyang trabaho, igo na lamang kining mibalik sa ilang gipuy-an ug didto iyang nadiskubre nga nagbitay na ang iyang kapuyo. Nangayo pa ug tabang sa mga silingan si alyas Gino aron madali pagdala sa balay-tambalanan ang biktima apan nakabsan gihapon kini sa iyang kinabuhi. Apan, daghan karon ang nagduda nga matod pa adunay foul play nga nahitabo sa maong insidente. Hinuon gipasalig ni PCI Elmer Yago, ang hepe sa Police Station 5 nga mopahigayon sila ug makuting imbestigasyon sa maong insidente. Pero, karon pa lamang gitin-aw na sa kapuyo niini nga wala niya gipatay o gihilibtan ang iyang kapuyo ug matod niini nga siya pa mismo ang mipatala sa kapulisan may kalabotan sa maong insidente. (pbanat news desk/vert castro) *88888888

SA TANANG MGA KOMPANYA SA MINA

SMI GITUDLONG PINAKADAGHANG KAHOY NGA GITANOM

BAGUIO CITY----Nakuha na usab sa higanteng kompanya sa mina nga nanag-iya sa Tampakan Copper-Gold Project ang prestihiyosong 2010 Best Mining Forest Program sa bag-ohay pa lamang natapos nga 57th Annual National Mine Safety and Environment Conference didto sa Baguio City. Matod ni Department of Environment and Natural Resources (DENR) Secretary, Ramon Paje, sa kinatibuk-an ang tanang mga aktibong kompanya sa mina sa nasod nakatanom na ug kapin sa 10 milyones ka mga punoan apan ang nanguna dinhi mao ang Sagittarius Mines, Inc (SMI) ang nanag-iya sa Tampakan Copper-Gold Project sa kabukiran sa Tampakan, South Cotabato. Ang SMI, base sa national steering committee gi-ila tungod sa maayong nursery management program niini nga matod pa maoy pinaka-una sa tibuok nasod sa tanang mga kompanya sa mina. Ang programa nga Male Tu Kayo (Magtanom Kita) nga gikan sa lengwahe sa tribung B’laan gi-ila usab nga usa ka malungtarong programa diin seryosong mi-implementar sa pagpananom ug mga lumad nga mga punoan sa kabukiran sa South Cotabato. Sa kasamtangan, ang SMI adunay duha ka mga dagkong plant nurseries nga nagproduksyon ug mga endemic nga mga punoan ug tag-as nga kaledad nga mga punoan sa prutas. Ang duha ka mga nurseries adunay kapasidad nga moabot ug 230,000 ka mga seedlings matag tuig. Sa usa ka pamahayag, gitug-an ni Mark Williams, ang SMI General Manager nga nahimong malampuson ang programa sa reforestation tungod usab sa suporta sa mga stakeholders ug mismong sa mga komunidad niini diin naglihokan ang maong kompanya. “Our reforestation program is a product of committed partnership between SMI and the host communities,” matod ni Williams. Sukad pa niadtong 2005, pinaagi sa suporta ug tabang sa mga community volunteers, nakapang apod-apod na ang SMI ug kapin sa 500,000 ka mga semilya sa punoan alang reforestation program niini. Aduna usab karon ginahimo nga buffer zone plan alang sa Tampakan Project nga giduyogan sa University of Queensland (UQ) School of Integrative Studies ug sa Visayas State University (VSU) College of Forestry and Natural Resources. (pbanat news desk/popoy contreras/smi pr) *8888888

MAESTRA NANUNGGAB UG BALLPEN SA MGA ESTUDYANTE?

GENERAL SANTOS CITY---Laing kontrobersya na usab karon ang mi-igo sa Department of Education human matod pa usa sa mga sakop niining magtutudlo sa Grade 4, didto sa Kindat Elementary School ang matod pa nanunggab gamit ang ballpen sa duha ka mga estudyante niini. Sa report nga nakuha sa Periodico Banat, gipatala sa Makar Police Station ang usa ka magtutudlo nga nailang si Nida Oliveros, maestra sa Grade 4 sa Kindat Elementary School sa duha ka mga estudyante nga nailang sila si Alfatah Omar ug Dante Ali, puro 12 anyos ang pangidaron. Sa maong pulis report, gisulti sa duha ka mga estudyante nga gidunggab matod pa sila gamit ang ballpen sa maong magtutudlo ug nanga-igo sa ilang mga bukton. Wala hinuon gibutyag sa report kung unsa ang rason nganong giduggab matod pa ang duha ka mga estudyante sa ilang maestra. Matod usab sa buhatan sa DepEd nga ilang ipatawag ang maong maestra aron makuha ang bahin niini sa maong isyu. Ang Periodico-Banat abli sa kanunay sa gi-akusahang maestra may kalabotan sa maong insidente aron ipasibaw ang iyang reaksyon ug komento. (pbanat news desk/vert castro) *8888888