MADE IN SARANGANI—Kining mga sako-sako sa uling nga kahoy nga permanenteng makit-an sa mga highway sa lalawigan sa Sarangani nagpamatuod lamang nga ang illegal nga pagpamutol sa kahoy pinaagi sa kaingin padayon lamang gihapon. Tinuod bisan ginagmay ang uling-uling, pero kung managhan mohatod gyud ug seguradong kadaut sa kinaiyahan. Unsa kaha ang gibuhat sa buhatan ni Gobernador Migs Dominguez ug sa DENR-PENRO? Kini klaro gyud nga Made in Sarangani. (kuha ni poldo bernaldez/pbanat caption)
*888888888
Gatosan ka mga taga-Pigcawayan, namakwet!
Grupo ni Umbra Kato, mi-atake, 1 patay
Gatosan na pod ka pamilya sa lungsod sa Pigcawayan, Cotabato Province ang puwersahang namakwet kagahapong adlawa human nga kalit misulong ang dul-an sa dos cientos ka mga sakop sa 105th Base Command sa Moro Islamic Liberation Front (MILF) nga gipangunahan ni Kumander Ameril Umbra Kato.
Matod ni Pigcawayan Mayor, Jun Garcesa usa gyud ka sakop sa CAFGU ang nakabsan sa iyang kinabuhi apan wala gibutyag ang tinuod nga pagka-ila sa biktima.
Dali dayon nga mi-ikyas ang grupo sa mga suspek pagkahuman sa ilang pagpangatake. Sa pagkakaron, padayon gihapon ang hot pursuit operations sa mga sundalo ug pulis batok sa grupo ni Kumander Kato.
Sa susamang balita usab, usa ka Improvised Explosives Device (IED) ang nakaplagan sa mga sundalo sa Datu Piang Maguindanao Province kagahapong adlawa gihapon ug dako ang pagtuo sa mga awtoridad nga gitanom kini sa mga miyembro sa Moro Islamic Liberation Front (MILF).
Hangtod sa pagsulat ning maong balita, wala pa mahtino ang tinuod nga hinungdan sa pag-atake sa grupo ni Kato sa Pigcawayan. Gilayon mihimo ug usa ka evacuation center ang lokal nga kagamhanan alang sa mga apektadong residente. (pbanat news desk)
*8888888
HEADLINER:
Cong. Pax, dili gusto pasudlan ug sundalo ang Kalamansig
Namahayag karon ang kongresista sa unang distrito sa lalawigan sa Sultan Kudarat nga si Honorable Datu Pax Mangudadatu nga dili kinahanglan ug mga militar ug pulis ang duha ka mga barangay sa Sangay ug Paril sa Kalamansig aron ma-undang ang kagubot nga nagsugod niadtong kaadlawon sa Sabado.
Sa usa ka report nga gipagawas sa ABSCBN, mismong gisugyot sa kongresista nga daghan pang mga pamaagi nga mahibalik ang kalinaw sa duha ka mga barangay ug kinahanglan nga dili usa mogamit ug puwersa ang kagamhanan sanglit puwede pa mopahigayon ug negosasyon sa mga nagkabangi nga grupo.
Dason pa ni Mangudadatu nga mas mo-grabe lamang ang tensyon sa Sangay ug Paril panahon nga mo-entra na ang mga sundalo ug pulis.
Kagahapong adlawa usab, mi-abot ang dugang nga puwersa sa Regional Mobile Group ug Special Action Force sa PNP-12 sa lungsod sa Kalamansig aron mosuporta sa Provincial Mobile Group nga kasamtangang atua karon sa Barangay Sangay.
Tungod sa pag-abot sa kongresista kagahapon sa Kalamansig, usa ka panagtigom ang gipatigayon ug ang tanang mga lideres sa lungsod gipatawag aron mahibaw-an ang aktwal nga sitwasyon sa palibot.
Human sa miting, gisulti gyud ni Mangudadatu nga dili una pasudlan sa puwersa sa gobyerno ang duha ka mga barangay aron dili gyud magkagubot.
Apan, ang sugyot sa kongresista gisupakan sa daghang mga residente nga namakwet ug anaa karon nanimuyo sa mga evacuation centers sa Poblacion sa Kalamansig. Matod sa mga apektadong residente lisod kaayo nga dili dayon maundang ang kagubot sa duha ka mga barangay tungod kay apektado na kaayo ang ilang panginabuhian. Buot lamang sa mga residente nga maabog ang mga armadong grupo nga anaa karon nga nagpalibot-libot sa ilang mga komunidad.
Kahinumduman, niadtong milabay nga Sabado, kalit lamang nga misulong ug namusil ang dul-an sa dos cientos ka mga gidudahang sakop sa Moro Islamic Liberation Front (MILF) nga mingresulta sa kamatayon sa upat ka mga biktima ug naka-angol ug laing tulo pa.
Ang maong insidente nakapa-aghat gyud sa dul-an 6,000 ka mga residente nga mobakwet ug modagan ngadto sa mga evacuation centers sa poblacion. Ang Barangay Sangay ug Paril biyahe-on ug kapin sa usa ka oras pinaagi sa pumpboat.
Hangtod sa pagsulat ning maong balita, dili pa usab kumpirmado kung nakasulod na ba sa Sangay ug Paril ang mga sakop sa Regional Mobile Group ug Special Action Force isip reinforcement sa mga tropa sa pulis nga atua na sa duha ka mga barangay.
Sa pag-abot usab ni Kongresista Pax Mangudadatu namahayag kini nga mogahin ug dos cientos ka mga sakong bugas nga iapod-apod ngadto sa mga Muslim ug Kristiyanos nga namakwet tungod sa maong gubot.
Gikumpirma sa mga pulis nga atua sa duha ka mga barangay nga anaa lamang sa daplin-daplin ang mga suspek nga mi-atake niadtong milabay nga Sabado. (pbanat news desk)
*888888888
73rd IB, palayason sa Sarangani---Bayan
Gustong palayason sa militanteng grupo sa Bagong Alyansang Makabayan (BAYAN) ang tropa sa 73rd Infantry Battalion sa Philippine nga nadestino karon sa lalawigan sa Sarangani.
Mao kini ang gipamahayag sa tigpamaba sa BAYAN-SOCSKSARGEN nga si Edward Flores sa lokal nga media. Matod ni Flores, ilado na kaayo ang 73rd IB sa mga bayolasyon niini sa tawhanong katungod ilabi na nga nadestino pa kini sa lalawigan sa Davao del Norte. Saysay ni Flores klaro kaayong gigamit lamang sa mga ma-impluwensyang pamilya nga nanag-iya ug mga halapad nga plantasyon ang 73rd IB alang sa ilang kaugalingong interes.
‘Ginamit nila yung 73rd IB para i-clear yung area ng mga armed groups daw,’ sulti pa ni Flores. Ang pagpadala sa 73rd IB sa Sarangani matod ni Flores susama gihapon ang tumong nga ilogon sa mga dagko ug adunahan nga mga maimpluwensyadong pamilya ang mga yuta alang sa ilang mga negosyo.
Gimakmak usab ni Flores ang pag-abot sa mga sundalong Amerikano sa Sarangani nga mihimo ug usa ka civic mission diin mipahigayon kini ug mga medical/dental check-ups sa mga residente ilabi na ang mga naapektuhan sa kagubot nga hatod sa mga Lawless MILF Groups (LMG). Usa lamang ka pagpakitang-tao base kang Flores ang gihimong aksyon sa mga sundlaong Amerikano.
‘Mga pangtabon lamang doon sa totoong interes ng US na kuhain yung mga likas na yaman ng Pilipinas,’ dugang ni Flores.
Gi-awhag pa ni Flores ang katawhan nga dili gyud magpadala sa bakak ug palabas sa Amerika nga ang tinuod nga tumong niini mao ang pagkuha sa mga bahandi sa Mindanao. (pbanat news desk)
*88888888
Pagsidlak sa adlaw sulod sa 36 oras karong Biyernes?
Naukay na usab karon ang dakbayan sa mga gipakatag nga text messages nga nag-ingon nga ang pagsidlak sa adlaw karong umaabot nga Biyernes, Oktubre 17 moabot ngadto sa 36 oras o usa ug tunga sa adlaw.
Apan ang maong balita paspas gilayon nga gipanghimakak sa Philippine Atmospheric Geophysical and Astronomical Services Administration (PAGASA) dinhi sa Gensan.
Matod ni Dante Ariola, ang Officer In Charge sa PAGASA, wala’y kamatuoran ang gipakatag nga mga text messages nga mo-awop ang Haring Adlaw pagkahuman sa 36 oras. Sulti ni Ariola nga base sa ilang SUNRISE/SUNSET TABLE, dose oras lamang nga mohayag ang adlaw karong umaabot nga Oktubre 17.
Ang mga gipakatag nga text messages nagbutyag pa nga tungod kay mamahimong 36 oras ang pagsidlak sa adlaw sa tibuok Asya, moabot usab ug 36 ang kangitngit sa ubang mga parte sa kalibotan. Dugang usab sa text messages nga mahitabo lamang ang maong phenomenon kada 2400 tuig.
Midason pa ang PAGASA nga dili angay nga tuohan ang mga maong text messages sanglit wala kini basehan nga siyentipiko. Ang PAGASA adunay suod kaayo nga koneksyon sa ubang mga weather bureaus sa kalibotan ug mismo sa National Aeronautics Space Administration (NASA) sa nasod Amerika.
Gihangyo ni Ariola ang katawhan nga dili mabalaka sa maong mga gipakatag nga mensahe tungod kay wala kini kamatuoran ug walay basehan. (pbanat news desk)
*8888888
PNP Director sa SulKud, bag-o na!
Bag-o na ang labaw sa Police Provincial Office sa lalawigan sa Sultan Kudarat.
Niadtong milabay nga adlaw, mismong si PNP-12 Regional Director, PCSUPT Felizardo Serapio, Jr., kuyog si Isulan Mayor Dado Pallasigue ang mitambong sa Turn-Over of Command tali nila outgoing PD PSSUPT Teng Tocao ug bag-ong PNP Sultan Kudarat Director, PSSUPT Benhur Bongao.
Ang pagsulod karon ni PSSUPT Bongao sa Sultan Kudarat usa gyud ka dakong hagit sa iyang liderato ilabi na nga usa sa mga lungsod sa maong lalawigan ang naa karon sa kaguliyang tungod ang duha ka mga barangay niini, gi-atake sa mga gidudahang mga sakop sa MILF diin upat na ka mga sibilyan ang nakabsan sa ilang kinabuhi ug laing tulo pa ang na-angol.
Ang lungsod sa Kalamansig mao ang nahimong sentro karon sa kagubot sa Sultan Kudarat diin kapin sa dos cientos ka mga armadong grupo ang misulod sa mga barangay sa Sangay ug Paril niadtong milabay nga Sabado.
Sa iyang mensahe, malaumon hinuon si General Serapio nga mahatagan gilayon ug hinanaling aksyon ni Bongao ang problema sa Kalamansig. (pbanat news desk)
*888888888886,000 ka mga tawo, namakwet tungod sa gubot sa Kalamansig
Gikumpirma karon sa bise mayor sa lungsod sa Kalamansig, Sultan Kudarat nga adunay kapin sa 6,000 ka mga tawo ang namakwet tungod sa kabalaka ug kakuyaw nga gidangatan human sa pag-atake sa dul-an 200 ka mga Lawless MILF Groups (LMG) sa duha ka mga barangay sa Sangay ug Paril niadtong kaadlawon sa Sabado.
Sa usa ka pamahayag ni Kalamansig vice mayor, Joaquin Cancho sa ABSCBN, gisulti gyud niini nga sa kasamtangan adunay kapin sa 6,000 ka mga tawo nga gikan sa duha ka mga barangay ang nahidangat karon samga evacuation centers sa Poblacion Kalamansig tungod sa kahadlok nga maipit sa engkuwentro.
Saysay pa ni Cancho nga bisan tuod nga linaw na ang duha ka mga barangay human sa insidente niadtong milabay nga Sabado, nagpabilin gihapon ang mga residente sa mga evacuation centers hangtod nga wala pay gihatag nga go signal alang sa ilang pagbalik. ‘Halos wala ng katao-tao doon, karamihan mga kalalakihan na lamang,’ saysay pa sa bise alkalde.
Gikumpirma usab ni Cancho nga niabot gyud ang usa ka kompanya saBravo sa 64th Infantry Battalion sa Philippine Army ug gikorehe niini ang mga nahiunang report nga usa ka batalyon ang miabot nga mga sundalo. Gipaniguro usab sa maong opisyal nga wala gyud pasagdi sa kagamhanang lokal ang mga namakwet ug padayon kining gihatagan ug ayuda sa Kalamansig pinaagi sa paghatag ug mga bugas, sud-an ug uban pang panginahanglanon. Gitug-an pa ni Cancho nga adunay mga regular medical check-up ang gihimo sa medical team sa Kalamansig ngadto sa mga apektadong residente.
Sa pamahayag usab ni Cancho gikumpirma niini nga aduna gyud komplikto sa yuta didto sa Sangay ug Paril apan wala niini gikumpirma kung ang mga pamilya sa napatay nga Datu ang hinungdan sa pagsulong sa Sangay.
Si Cancho sa iyang mensahe nagpasalamat sa mga hinabang ug suporta sa mga opisyales sa probinsya sa Sultan Kudarat pinaagi ni Gobernador Teng Mangudadatu.
Una ng namahayag ang gobernador nga iyang tutokan ang problema nga nahitabo sa Sangay ug Paril. (pbanat news desk)
*888888
Principal gipusil sa na-kickout nga estudyante patay!
Nakabsan gyud sa iyang hinulamang kinabuhi ang usa ka 57 anyos nga principal sa Surallah National Highschool niadtong milabay nga adlaw human kini gi-unay ug pusil sa usa ka estudyante nga na-kickout tungod sa mga salaod nga nahimo.
Sa report nga nakuha sa Surallah PNP, naila ang biktima nga usa ka Ricardo dela Cruz ug mao ang kasamtangang high school principal sa maong tunghaan. Dugang sa inisyal nga imbestigasyon, gipusil ug tulo ka beses ang biktima sa estudyante nga nahukmang i-kickout na lamang tungod sa mga sala niini human nga gipamu-ak ang mga bintana sa usa ka classroom sa eskwelahan. Naila ang suspek nga usa ka Leomer Pillado, 18 anyos ug usa ka third year high school student. Matod sa kapulisan, daghan gyud ang nakakita sa pagpusil sa suspek ngadto sa biktima sanglit pasulod pa lamang unta sa eskwelahan ang biktima apan gi-atngan na kini sa may gate pa lamang. Wala gyud hinuon nahimo ang guwardiya sa maong tunghaan tungod kay wala kini dala nga pusil samtang ang suspek nagbitbit ug .45 nga pistola.
Gidali ug dala sa balay tambalanan ang biktima apan nakabsan na kini sa iyang kinabuhi.
Ang imbestigasyon nagtug-an nga grabe ang kalagot sa suspek ngadto sa biktima tungod kay gi-kickout kini ug napasanginlan nga mao ang mikuha sa cellphone sa usa sa mga classmates niini. Sa grabeng kalagot nga ang suspek gipasanginlan nga maoy nikuha sa cellphone, nag-wild kini ug gipamuak ang mga bintana sa ilang classroom. Ang iyang pagpamuak mao ang hinungdan sa iyang pagka-kickout o pagkalagpot sa Surallah National Highschool. Matod sa mga pulis wala siguro madawat sa suspek nga taktakon na kini sa iyang tunghaan hinungdan nga nahimo niini ang krimen.
Apan ang pamilya sa biktima desidido gyud nga gukdon ug iatubang sa sabakan sa balaod ang suspek ug basolan ang iyang gihimong pagpusil-patay sa principal.
Kasong murder ang gisang-at karon sa mga awtoridad samtang padayon pang gipangita ang suspek nga dali dayong mikalagiw human sa maong insidente. (pbanat news desk)
*8888888
12 anyos gisugo nga mangawat sa kaugalingong inahan
Pagka way puangod gyud nga inahan! Usa ka 12 anyos nga batang lalaki ang anaa karon sa kustodiya sa kapulisan human kini nadakpan sa akto nga misulay ug kawat sa usa ka cellphone sa usa ka manager sa Jollibee Pioneer Avenue, niadtong milabay nga gabii.
Sa report nga nakuha sa Periodico-Banat, mismong ang inahan gyud niini ang mi-angkon ngadto sa mga pulis nga iyang gisugo ang iyang anak nga mangawat aron lamang adua silay ipalit ug pagkaon. Tinuod man nga buotan ang anak niini ug gituman ang iyang inahan apan nakapait lang kay daghan ang nakakita sa gibuhat sa bata ug nadakpan kini human sa ginukdanay.
Matod sa kapulisan, dili buot pasabot nga gi-angkon sa inahan sa bata ang maong salaod makagawas na ang 12 anyos sa ilang kustodiya. Base sa balaod, ibutang gilayon ang batang nakasala sa usa ka center sa DSWD aron hatagan ug counseling ug mga lecture aron makamatngon sa sayop nga gibuhat niini. Ang usa ka menor de edad nga nag-edad ug 9 ngadto sa 12 anyos, dili gyud puwedeng presohon panahon nga makasala apan ibutang lamang kini sa pagdumala sa DSWD. Gipapa-uli na lamang sa mga pulis ang inahan niini nga gikan pa sa Tacurong City. (pbanat news desk)
*88888
Insidente sa ransak sa Gensan, misaka na pod!
Uso-uso gyud diay ang mga krimen nga nahitabo dinhi sa dakbayan.
Niadtong milabay nga adlaw lamang, sunod-sunod nga nagpatala sa mga kuwerpo sa kapulisan ang mga nahimong biktima sa pagpangransak sa ilang mga panimalay ug opisina.
Unang nabiktima ang buhatan ni Attorney Dominador Lagare sa may dalang J. Catolico. Matod sa abogado bisan tuod nga didto siya natulog sa iyang buhatan wala gyud niya mamatngoni ang pagsulod sa mga kawatan. Malampusong nakuha gyud ang cellphone sa sikat nga abogado. Samtang sa Las Villas de Dadiangas, sa Barangay City Hghts., ning syudad, usa ka panimalay ang nawad-an gyud ug usa ka bag-ong videocam recorder nga nagkantidad ug kapin sa P90,000. Wala ang mga tag-iya sa pagsulod sa mga kawatan sa panimalay niini sanglit nang-grocery pa.
Sa usa ka pamahayag ni Gensan City PNP Director, PSSUPT Robert Po, ang mga responsable sa pagpangawat partikular na sa mga dapit sa City Heights, San Isidro ug Malakas ila na kining nailhan ug padayon pang gi-imbestigahan.
Nagpahimangno na lamang ang opisyal nga kinahanglan nga magbantay gyud aron dili mamahimong biktima sa mga balahibuon ug kamot. Gipunting pod ni Po nga posibleng ang nagkaduol nga panahon sa Pasko ang usa sa mga rason sa kalit nga pagsaka sa krimen nga kawat. (pbanat news desk)
*888888888
No comments:
Post a Comment