periodicobanat (nobyembre 8, 2008)

SULTAN KUDARAT—Ito ang ipinagmamalaking kapitolyo ng lalawigan ng Sultan Kudarat. Makikita rito ang higanteng estatwa ni Sultan Kudarat na kilala bilang isang mapagkakatiwalaan, matapang at patas na pangulo. Ang kapitolyo ng Sultan Kudarat ay sinasabing isa sa pinaka-grandyosong bahay-pamahalaan sa Pilipinas na ginastosan ng mahigit sa P300 milyong piso. Hindi rin nabalewala ang pagod at hirap ng mga opisyales ng Sultan Kudarat na sina Congressman Datu Pax Mangudadatu at Gobernador Suharto ‘Teng’ Mangudadatu dahil ang kanilang kapitolyo ay isang tourist attraction na rin. (kuha ni poldo bernaldez/pbanat caption) *88888888 HEADLINER: Milagrosong tubig gikan sa nitso gidugok sa Surallah! Dakong balita na usab ang mi-ulbo karong semanaha dinhi sa SOCSKSARGEN human nga matod pa adunay milagrosong tubig nga nagtubod gikan sa usa ka nitso sa sementeryo sa lungsod Surallah, South Cotabato. Ang report nga nakaabot sa Periodico-Banat nagbutyag nga nagsugod ang matod pa pagtubod ug milagrosong tubig nga makatambal kuno ug mga sakit ug balati-an sa lawas sa tawo niadtong Nobyembre 2 human nga giselebrar ang pista minatay. Pag-abot sa mga kabanay sa tawo nga nakalubong sa maong nitso dako na lamang ang ilang katingala nga adunay tubig nga nagtubod gikan sa sulod sa maong nitso ug ilang gisulayan kini sa paghaplas ug presto, nawagtang gyud ang ilang mga pamaol ug sakit-sakit sa lawas. Tungod niini, paspas gilayon nga mikalat ang balita may kalabotan sa milagrosong tubig hinungdan nga nagpanon gyud ang mga tawo. Apan, bisan pa nga daghan na ang nagtuo sa ka-epektibo sa matod pa milagrosong tubig, hugot nga gi-alkontra kini sa mga opisyales sa Surallah. Matod ni Dr. Neil Crespo, ang Municipal Health Officer sa Surallah, sa gigikanan pa lang sa tubig klaro kaayo nga maghatod kini ug kadaut sa panglawas sa tawo panahon nga kini imnon o dili ba kaha ipahid. Nagtuo ang doktor nga tungod kay gikan sa sulod sa nitso ang maong tubig dako ang posibilidad nga kontaminado na kini ug mga kagaw gikan sa nadunot na nga lawas sa nakalubong sa maong nitso. Sumpay pa ni Crespo nga possible pod nga nakontamina ug kemikal nga Formalin nga sagad ginagamit sa pagbalsamar sa mga patay nga lawas ang maong tubig. Dili sumbanan matod pa sa doktor ang kapin sa 30 anyos na nga paglubong sa tawo sa ilalom sa maong nitso. Nasuta usab nga cancer ang gikamatyan sa tawong nakalubong sa nitso diin nag-gikan ang matod pa milagrosong tubig. Sa iyang bahin, gilayon nga mimando si Surallah Mayor, Romulo Solivio nga serad-an ang maong nitso ug gihangyo ang pamilya sa nakalubong nga ilang ayohon ang maong nitso. Matod ni Solivio nga kung kinsa kadtong mga interesado nga taga laing dapit, dili na lang mo-adto sa Surallah aron lamang makakuha ug tubig gikan sa nitso. ‘Nanawagan tayo na huwag nang magpunta dito sa Surallah para magkuha ng tubig galing sa puntod,’ pamahayag ni Solivio sa ABSCBN Gensan. (pbanat news desk/jong gorgonio) *88888 TIRES-PISTON abli sa P1 nga rollback sa tricycle Abli ang hugpong sa TIRES-PISTON alang sa piso nga rollback sa pamahasahe sa mga tricycle dinhi sa dakbayan. Mao kini karon ang gipamahayag ni Larry Villegas ang labaw sa maong militanteng grupo apan bisan pa man sa ilang pagpadayag nga andam nilang dawaton ang piso nga rollback may mga kondisyones gihapon kini nga gilatag. Buot lamang mahitabo sa militanteng hugpong sa TIRES-PISTON nga kinahanglan nga ablihan pag-usab sa kagamhanang lokal sa Gensan ang hisgutanan sa pagbanhaw sa Motorized Tricycle Franchising and Regulatory Board (MTFRB) nga walo na ka tuig nga gipapha. Matod ni Villegas kinahanglan gyud nga panahon nga mabuhi ang MTFRB aduna gyud sakto nga mga representante gikan sa nagkadaiyang sektor sa mga estudyante, tricycle drivers, operators, lokal nga kagamhanan ug mga pribadong indibidwal aron sa hingpit adunay eksakto nga lakang ang mahimo sa MTFRB. ‘Abli ang sektor sa rollback,’ sulti pa ni Villegas. Gibutyag pa niini nga ang kaniadto nga tag-P6 nga plitehan sa tricycle puwede gihapon nga mahibalik bisan pa man nga dakong kasayuran nga ang presyo sa gasolina kaniadto anaa pa sa tag P35-36 kada litro. (pbanat news desk/jong gorgonio) *88888888 Mga guba nga dalan sa Gensan may pondo na! Gikumpirma karon ni City Councilor Vivencio Dinopol ang chairman sa komitiba sa imprastraktura sa konseho sa syudad nga sa dili madugay mahatagan na gyud ug alibyo ang mga guba ug lubak-lubak nga kadalanan sa dakbayan. Matod ni Dinopol, migahin na ug P30 milyones ang syudad alang sa maintenance and repair sa mga guba nga dalan sa Gensan sama sa Nursery Road sa Barangay Lagao ug Ventilacion St., padulong sa General Santos City Emergency Hospital nga anaa gihapon sa Lagao. Hinuon gitin-aw ni Dinopol nga malagmit dili karong tuiga ma-implementar ang mga pagmentinar ug pag-ayo sa mga guba nga dalan kundili posible kining sugdan karong unang bulan sa Enero 2009. (pbanat news desk/jong gorgonio) *88888888 Guba nga banyo sa Gensan Airport nakaabot sa konseho Nakaabot na gyud ang reklamo sa pipila ka mga pasahero sa General Santos City International Airport may kalabotan sa guba ug dili maayo nga pagmentinar sa mga banyo niini. Niadtong milabay nga adlaw atol sa sesyon nga gihimo sa mga konsehal sa syudad, gipatawag gyud si Air Transportation Office Manager, Nathaniel Nazareno aron mahibaw-an ang tinuod nga estado sa gireklamo nga mga banyo sulod sa Gensan Airport. Matod ni Nazareno, aduna na sila’y gi-andam nga pondo alang sa pag-ayo sa mga banyo sa airport ug gilauman nga isubay kini sa mga nindot nga banyo sa mga airport sa Manila, Cebu ug Davao. Wala hinuon gitakdan ni Nazareno ang eksaktong petsa sa pag-ayo sa mga gireklamo nga banyo sa airport. (pbanat news desk) *88888888 Sunog sa SSS-Koronadal wala pay klarong hinungdan Hangtod karon wala pa gihapon klaro nga hinungdan sa sunog nga nahitabo sa buhatan sa Social Security System (SSS) sa dakbayan sa Koronadal. Matod ni PSI Milo Manlabo ang City Fire Marshall sa Koronadal City, ila na karon giwagtang ang anggulo sa faulty electrical wiring sanglit wala sila’y nakita nga basehan nga gikan sa wiring sa mga kuryente ang nahitabo nga sunog nga nagsugod sa buhatan sa manager niini nga si Jose Catoto. Kahinumduman nga kalit lamang nasunog ang SSS-Koronadal niadtong katapusan sa Oktubre bisan nga wala’y tawo nga nahabilin sulod sa maong buhatan ala-una sa buntag. Kapin gyud sa P700 mil ang nahimong danyos sa maong insidente. Gisulti na lamang sa opisyal sa Bureau of Fire nga ilang ipadayon pa gihapon ang ilang imbestigasyon may kalabotan sa maong insidente. (pbanat news desk/jong gorgonio) *8888888888 Resolusyon nga nagsuporta sa Alabel Cityhood Movement giduso na sa Gensan Council Pormal na nga giduso ang usa ka resolusyon sa Sangguniang Panlungsod sa dakbayan nga nagpadayag ug suporta sa gihimong lakang karon sa lungsod sa Alabel, Sarangani Province nga mamahimo na kining usa ka syudad. Niadtong milabay nga adlaw mismo ang mga konsehal sa dakbayan ang mipasar sa ilang resolusyon nga nagsuporta sa lakang sa Alabel. Apan, bisan pa man nga suportado sa mga konsehal sa syudad ang lakang sa Alabel, gipahimangno-an gihapon ni Konsehal Jong Gonzales ang mga taga-Alabel nga siguradohon gyud nga mi-abot sa sobra P100 milyones ang income sa Alabel bag-o kini moduso nga mamahimong syudad. Gitin-aw hinuon ni Alabel Municipal Councilor Rommel Espanola, ang Focal Person sa Alabel Cityhood Movement nga sobra gyud sa usa ka gatos milyones ang ilang abot matag tuig. Ang Alabel mao ang sentro sa lalawigan sa Sarangani Province nga gilangkuban ug pito ka mga lungsod nga adunay usa lamang ka distrito sa kongreso. (pbanat news desk/jong gorgonio) *888888888