periodico banat (disyembre 09, 2010)

MAYOR SA MALUNGON NALIPAY SA GIHIMONG PUBLIC SCOPING

MALUNGON, SARANGANI PROVINCE---Nagpadayag sa iyang kalipay ug pasalamat si Malungon, Sarangani Mayor, Reynaldo Constantino human nga mipahigayon ang higanteng kompanya sa mina ug usa ka Off-Lease Linear Infrastructure Public Scoping kagahapong adlawa sulod sa Municipal Gym.

Sa pamahayag ni Constantino, iyang gisulti nga ang pagpahigayon sa Public Scoping sa Sagittarius Mines, Inc (SMI) usa ka pamaagi aron madungog ang mga gibati ug buot nga ipadayag sa katawhan sa Malungon alang sa multi-bilyones dolyares nga proyekto sa kompanya sa mina.

‘Thank you for making my municipality the venue of this scoping,’ matod sa alkalde. Ang mayor nagtuo usab nga pinaagi sa gihimong Public Scoping, matudlu-an ug mahibal-an sa katawhan kung unsa ang proyekto ug unsa ang mamahimong epekto niini sa komunidad, katawhan, kinaiyahan ug mismong sa panglawas ug ekonomiya.

Si Constantino misulti pa nga dapat timbangon ang tanan nga mga desisyon ug dili gilayon mo-kontra ug magkondenar sa usa ka butang kung wala pa nadungog ang pikas nga bahin. ‘Indi kita mag-diretso magkondenar,’ dason sa alkalde nga gitumong ngadto sa mga nagpadayag sa ilang pagsupak sa proyekto sa SMI.

Ang proyekto sa SMI pormal nga sugdan karong 2016 diin gilantaw na daan nga magkinahanglan gyud ug kapin sa 10 mil ka mga trabahante ang kinahanglanon niini atol sa konstruksyon niini. Laing duha pa ka libo usab nga mga empleyado ang kuhaon alang sa pagtukod sa pantalan ug power plant niini didto sa Davao del Sur.

Gikaingon nga ang tibuok nga proyekto sa SMI moabot ngadto sa $5.9 bilyones dolyares—ang pinakadako nga nag-inusarang patigayon sa Pilipinas. (pbanat news desk/popoy contreras)

*888888

MATOD SA MEDICO LEGAL

PIPILA KA MGA BIKTIMA SA MAGUINDANAO MASSACRE GI-RAPE

METRO MANILA---Gitug-an karon sa Medico Legal Officer sa PNP Crime Laboratoy nga mao ang mihiling sa mga biktima sa Maguindanao Massacre, nga kumpirmado gyud nga may pipila ka mga biktima ang gi-rape bag-o kini gipangpatay.

Sa pag-atubang ni PCI Dr. Dean Cabrera sakop sa PNP Crime Lab, didto sa Quezon City Regional Trial Court Branch 221 kagahapon, gitug-an niini nga sa iyang pag-eksamin sa 13 ka mga patay nga lawas niadtong Nobyembre 25, 2009 may usa ka biktimang babaye ang positibo nga gipanamastamasan bag-o pa man kini brutal nga gipatay.

Sa maong hearing wala na pod misipot ang mga suspetsado nga gipangunahan ni Datu Unsay, Maguindanao Mayor, Andal Ampatuan, Jr., ug bugtong mga abogado lamang niini ang mitambong. Tungod niini, igo lang gihatagan sa korte ang duha ka mga partidos nga mohimo ug mga pangutana ngadto sa testigo nga gikan sa PNP Crime Lab. (pbanat news desk/vert castro)

*888888

TAG-AS NGA KALIBRE SA ARMAS NADISKUBRE SA KIAMBA

GENERAL SANTOS CITY---Mga tag-as nga kalibre sa armas lakip pa ang mga bala niini ug RPG ang nadiskubre sa mga awtoridad sa Sarangani PNP human nga mipahigayon ug pag-ronda sa upat ka mga panimalay sa barangay Katubao, Kiamba, Sarangani Province niadtong milabay nga adlaw.

Sa report nga nakuha, gikumpirma ni Sarangani PNP Provincial Director, PSSUPT Florendo Quidilla nga usa sa upat ka mga panimalay nga ilang gi-ronda bitbit ang search warrant ang nagpositibo nga adunay mga gipangtago-an nga tag-as nga kalibre sa pusil.

Matod sa maong opisyal, ang panimalay nga gipanag-iyahan sa usa ka Mando Leonsili, miyembro sa Moro Islamic Liberation Front (MILF) ang nakuhaan ug usa ka home-made Rocket Propelled Grenade (RPG), nga may tulo ka buhing bala, tulo ka mga rifle grenade ug usa ka Palestinian Automatic Rifle. Kasamtangan na karon nga gikustodiya sa Sarangani PNP ang mga armas nga nasakmit gikan sa panimalay ni Leonsili, samtang ang maong suspek abtik usab nga naka-ipsot atol sa gihimong ronda sa mga pulis kuyog ang mga sakop sa 73^rd Infantry Battalion sa Philippine Army.

Nag-atubang na karon ug kasong Illegal Possession of Firearms and Explosives si Leonsili nga nagsuta usab nga may nauna ng kaso nga Destructive Arson ug Murder. Dako ang pagtuo sa mga awtoridad nga ang nahisgutang suspetsado kauban sa upat ka mga miyembro sa 13^th MILF Brigade nga nadakpan niadtong milabay nga semana. (pbanat news desk/jong gorgonio)

*8888888