‘NAGTAPOK’---Mga dagkong lideres sa Rehiyon 12 atol sa gihimong Seminar/Training on Crisis Management sa Sydney Hotel Gensan nga gipangunahan ni DILG Sec. Jesse Robredo. Ang maong panagtapok, mao usab ang higayon diin gibarugan sa DILG partikular mente ni Kalihim Robredo ang gipakanaug nga Memorandum niini nga nagsugo sa South Cotabato Government nga i-suspenso ang implementasyon sa kontrobersyal nga Environment Code. (kuha ni vert castro/pbanat caption)
*8888888
DILG SEC MISULTI NA
‘ATONG SUNDON ANG BALAOD, DILI KINI HISGUTANAN SA PRO UG ANTI-MINING’
GENERAL SANTOS CITY---Mipalanog na karon sa iyang pamahayag si Department of Interior and Local Government (DILG) Secretary, Jesse Robredo, may kalabotan sa kontrobersyal nga pagpakanaug niini ug usa ka memorandum nga nag-mando sa kagmahanang probinsyal sa South Cotabato nga i-suspenso una ang implementasyon sa Environment Code sa probinsya ug gilayon nga mohimo ug pag-review niini.
Kagahapong adlawa, si Robredo mao ang nahimong bisita sa gipahigayong Seminar and Training on Crisis Intervention and Management didto sa Sydney Hotel, diin gitambongan sa mga gobernador, mayores ug uban pang mga opisyales sa kagamhanan.
Matod ni Robredo, dili Pro-Mining ug Anti-Mining ang tinuod nga isyu sa iyang pagpakanaug sa Memorandm nga nagsugo kang Gobernador Arthur Pingoy sa South Cotabato nga ihunong ang implementasyon sa kontrobersyal nga Environment Code.
Gibutyag pa sa opisyalsa DILG nga anaa ang ilang ahensya aron lamang sa pagsiguro nga ang mga nasyunal ug lokal nga balaodnon adunay ginatawag nga ‘consistencies’ ug sigurohon usab nga dili na molapas sa ilang gahum ang mga Local Government Units (LGU).
‘DILG is not Pro-Mining or Ant-Mining…We are here just to make sure that national laws and local laws are consistent and ensure LGUs will not exceed their authority,’ butyag ni Robredo.
Gipunting pa sa Kalihim nga dili gyud isyu ang mina sa South Cotabato kundili ang paglapas sa awtoridad sa Local Government Unit sa South Cotabato—diin wala gyud kini gitugutan sa balaod sa Pilipinas.
‘Palagay ko ang issue is rule of law, hindi naman talaga mining..Hindi puwede ang batas na yan dahil lagpas na sa kapangyarihan ng LGU,’ saysay pa sa Kalihim.
Gipasabot usab ni Robredo ngadto sa mga mitambong sa maong panagtigom nga polisiya sa kagamhanang nasyunal ang pagpahigayon ug usa ka responsableng pagmina ug dili ang pagpa-undang niini.
‘Ang national policy is responsible mining hindi total mining ban…I do support the intent of the South Cotabato government that we shall protect the environment..Yung lahat ng nais niyo, yun din ang nais ko,’ punting pa sa DILG Secretary.
Gipangusgan usab ni Robredo nga trabaho niini nga ipahinumdum sa mga lokal nga kagamhanan nga basin milapas na sila sa ilang gahum nga dili man gyud kini puwede ilabi na nga tibuok nasod nagsubay sa nasyunal nga balaodnon.
Kampante pa nga gipaniguro ni Robredo nga bisan tuod nga ang panglantaw sa uban nga usa ka mining issue ang pagmando niini ngadto sa gobyerno sa South Cotabato sa pagsuspenso sa implementasyon sa Environment Code—pero sa kamatuoran usa lamang kini nga simpleng klase sa pagpatunhay sa tinuod nga balaod.
‘It may turn out a mining issue…But in our case it will be just simple case of ensuring we follow the rule of law,’ lig-on nga sulti ni Robredo.
Aminado usab ang Kalihim nga panahon nga walay panaghi-usa ang mga balaod sa nasyunal ug lokal nga mga panggamhanan, siguradong mo-angal gyud ang mga magpapatigayon ug mobatikos pa nga wala gihapon silbi ang nasyunal nga polisiya tungod wala kini makahi-usa sa mga lokal nga balaodnon.
‘Dapat yung national and local should sit down together and agree otherwise it will be contrary to both of their interest,’ dason sa maong opisyal.
Kasayuran na nga niadtong milabay nga Hunyo 29 ning tuiga, gipasa ni outgoing South Cotabato Governor, ug karon Congresswoman, Daisy Fuentes ang Environment Code of South Cotabato diin dili lamang ang mga magpapatigayon sa maong probinsya ug mga kasikbit nga dapit ang nagpadayag sa ilang pagbabag kundili lakip na usab ang mga sakop sa netibo nga misaysay pa nga gibalewala sa kagamhanan ang ilang tawhanong katungod.
Bisan ang Regional Development Council, gilantaw nga ang industriya sa mina mao gyud ang mohatag ug siguradong kalamboan ug malungtarong solusyon sa nagkapit-os nga ekonomiya sa rehiyon 12.
Ang Enviroment Code sa South Cotabato pinaagi sa usa sa mga probisyon niini, nagdumili sa pagpahigayon ug open pit mining apan mismong ang Republic Act 7942 o Philippine Mining Act of 1995 wala magsupak ug mibabag niini, ilabi na kung usa ka iladong responsable ug may katakos nga kompanya ang manguna niini.
Ang Tampakan Copper-Gold Project (TCGP) sa Sagittarius Mines, Inc (SMI) maoy naghupot karon sa Financial and Technical Assistance Agreement (FTAA) sa kabukiran sa Tampakan, South Cotabato ug mga kasikbit nga dapit niini. Gibana-bana nga moabot ngadto sa $5.9 bilyones dolyares nga pondo ang ibubo sa SMI alang sa maong proyekto nga nasuta nga maoy pinakadako ug pinakalapad nga deposito sa copper ug gold sa tibuok Southeast Asia.
‘Were not pro-mining, were not anti mining we just follow the rule of law,’ panapos ni Robredo. (pbanat news desk/jong gorgonio)
*888888
BOB ARUM UG FREDDIE ROACH MOTAMBONG SA BDAY NI PACMAN
GENERAL SANTOS CITY - Nang apud-apod ug pinaskuhan si Congressman Manny Pacquiao sa probinsya ng Sarangani.
Nasayran nga ning adlawa mihimo ug outreach program ang Manny Pacquiao Foundation kon asa nanghatag ug mga bugas, noodles ug canned goods sa tibuok probinsya. Samtang ugmang adlawa, i-turn-over ni Congressman Pacquiao ngadto sa Department of Education sa probinsya ang 40 footer nga van nga napuno ug hardbound nga libro nga gikan sa Amerika ug sa negosyanteng si Henry Sy. Samtang gikumpirma ni Leanne Omega- business manager sa Pacquiao Group of Companies nga muabot sa birthday party ni Pacman si Top Rank promoter Bob Arum ug Coach Freddie Roach lakip ang mga kongresista ug pipila ka mga artista. Gilaumang muabot sa 1500 ang mamahimong bisita kon asa ang tema sa okasyon mao ang musical pound-for-pound nga matigayon sa KCC Convention Center.
*8888888
LAING MAG-UUMA GILUTHANG PATAY
CENTRAL MINDANAO - Usa ka mag-uuma ang gipusil patay sa mga armadong grupo sa alas 8:00 sa gabii,niadtong Martes,didto sa probinsiya sa Cotabato.
Nailhan sa kapulisan ang biktima nga si Ernesto Balawig, 36, minyo og molupyo sa Barangay Pisan, Kabacan. Sa nahagpat nga taho gikan sa Cotabato Police Provincial Office, nasuta nga samtang naglingkod ang biktima atbang sa iyang pinuy-anan, kalit lamang mibutho ang mga armadong kalalakin-an og gipusil siya gamit ang kalibre .45 nga pistola. Patay gilayon si Balawig nga naigo sa iyang ulo ug dughan nga parte sa lawas samtang ang mga suspetsado ang dali nga misibat paingon sa wala matino nga direksyon. Si Kabacan chief of police Supt Joseph Samellano, nagsulti nga bag-o gitipi ang mag-uuma dunay naka-away kining grupo gumikan lamang sa bingkil sa yuta nga ilang gi-ugmad. Apan ang pamilya sa biktima namugos nga mga rebelde ang mipatay sa biktima gumikan naalaan siya nga asset sa militar gumikan dunay mga barkada kining sundalo sa ilang dapit. Padayon pa ang imbestigasyon sa kapulisan aron ika-istablisar ang tinuod nga hinungdan sa kamatayon sa biktima. (gikan sa report sa bombo radyo)
*8888888
SEKYU GIBUGHA PATAY
CENTRAL MINDANAO - Patay ang usa ka security officer human kini gipusil mga alas 7:40 sa gabii, niadtong Martes, didto sa probinsiya sa Maguindanao.
Giila ang biktima nga mao si Bajunaid Salindato, 44, minyo, liason Officer sa Tiger Security Agency og molupyo sa Barangay Salimbao, Sultan Kudarat. Base sa taho gikan sa Maguindanao Police Provincial Office,nga samtang sakay ang biktima sa iyahang XRM nga motorsiklo, bag-uhay lamang naghatud sa iyang asawa sa bay niini pabalik na unta siya sa siyudad sa Cotabato. Sa diha nga giatngan kini sa wala mailhing suspetsado og gipusil gamit ang kalibre .45 nga pistola. Dali sab nga miiskapo ang mga mamumuno sakay sa usa ka motorsiklo paingon sa wala matino nga direksyon. Ang biktima ang dali nga gisapupo sa mga sakop sa 38th IB ug Philippine marines og gidala sa Notre Dame Hospital apan gidiklara sa mga attending physician nga dead on arrival gumikan sa grabeng samad pinusilan sa iyang tangkogo ug kili-kili nga parte sa lawas. Gikanayon ni Maguindanao police provincial director S/Supt. Marcelo Pintac, nga duha ka anggulo ang ilang gisundan sa ilang imbestigasyon sa pagpatay sa biktima, una silos sa posisyon ug personal nga atraso. (gikan sa report sa bombo radyo)
*8888888
No comments:
Post a Comment