‘PERSONAL NGA PAGSUSI’--Mismong si Sarangani Vice Gov. Steve Solon ang misusi sa mga partisipante sa ginapahigayon nga Search and Rescue Training sa Sarangani Province suldo sa biente diyas. (kuha ni bon quiño/pbanat caption)
*8888888
ESTUDYANTE SA MARINE ENGINEERING PATAY SA BANGGA-MOTOR
GENERAL SANTOS CITY---Igo na lamang gideklarang dead on arrival sa mga doktor sa usa ka balay tambalanan sa siyudad ang usa ka estudyante sa kursong Marine Engineering sa Mindanao Polytechnic College human kini nadisgrasya pinaagi sa pagkabangga sa gisakyang motorsiklo niini ngadto sa laing motor niadtong milabay nga adlaw.
Sa report nga nakuha, naila ang biktima nga usa ka John Preach Saburnido, 16 anyos, ug residente sa barangay Calumpang ning siyudad. Sa inisyal nga imbestigasyon sa kapulisan, gimaneho ni Saburnido ang motorsiklo niini ug mopauli na unta kini sa ilang panimalay, apan sa pagliko niini sa may Purok Estrella, nagkabangga ang gimaneho niining motor sa usa pod ka motorsiklo nga gimaneho sa usa ka Cloyd John Alipyon.
Dali nga gisapupo ang duha ka mga drayber apan, paghidangat sa ospital, si Saburnido, nakabsan na gyud sa iyang hinulamang kinabuhi. Hangtod sa pagsulat ning maong balita, padayon pa gihapon nga ginahimo ang imbestigasyon sa maong insidente. (pbanat news desk/vert castro)
*8888888
PULIS NGA KA-TEXTMATE ANG MINYO, GIPUSPOSAN UG GILUBA
MALALAG, DAVAO DEL SUR---Patay gyud ang usa ka sakop sa PNP-Malalag human kini nga gipusposan ug giluba sa duha ka mga suspetsado niadtong milabay nga adlaw.
Sa balita nga nakuha, naila ang biktima nga usa ka SPO1 Alexander Traya ug nadestino sa Malalag Police Station. Sa inisyal nga imbestigasyon, usa ka tawag ang nadawat sa maong biktima nga matod pa adunay kagubot nga nahitabo sa barangay New Baclayon, Malalag ug milakaw kini aron moresponde. Wala masayod ang maong pulis nga may nag-atang na diay ngadto kaniya ug didto gibunalan kini sa usa ka kahoy nga may usa ka metro ang gitas-on dayon dunggab sa biktima.
Pag-abot sa mga kaubanan niini nga mga pulis, nakuha pa sa crime scene diin kini nabawi-an sa iyang kinabuhi ang usa ka XRM Honda nga motorsiklo, ang kahoy nga posibleng gigamit sa krimen, ang kaugalingong pusil niini nga 9MM nga anaa lamang gihapon sa iyang hawak ug usa ka pares sa tsinelas.
Gitudlo usab sa report sa kapulisan nga ang mga suspek nailhan nga sila Nicasio Villamiro ug Gomersindo Kinsianos, puro mga residente sa New Baclayon.
Sa gihimong follow-up operations, wala gyud madakpi ang mga suspek ug may mga dili kumpirmado nga mga taho nga matod pa usa sa mga suspek mao ang bana sa usa ka babaye nga ka-text mate matod pa ni SPO1 Traya.
Dako ang pagtuo sa kapulisan nga ang cellphone sa babaye nailog sa bana niini ug mao ang nakig-text ngadto sa biktimang pulis. Nagpaka arung-ingnon kini nga may kagubot sa maong dapit hinungdan nga miresponde ang pulis nga biktima. Wala niini masayri nga igo lamang kining gihimong la-ang aron mahitabo ang maong krimen. Padayon pa gihapon nga ginahimo ang makuting imbestigasyon may kalabotan ning maong kaso. (pbanat news desk/vert castro)
*88888
2 KA SUNDALO SAMDAN SA ATAKE SA MGA REBELDE
CENTRAL MINDANAO - Duha ka mga sundalo ang nasamdan sa pag-atake sa mga rebelde mga alas 9:40 sa gabii, niadtong Lunes, didto sa probinsiya sa Cotabato.
Ang kapulisan nag-ila sa mga biktima nga sila Private First Class (PFC) Rodolfo Sansano ug Corporal (CPL) Jemar Palencio,mga sakop sa 40th Infantry Battalion sa Philippine Army. Base sa nahagpat nga taho gikan sa 602nd Brigade nasuta nga kalit lamang mibutho ang mga armadong kalalakin-an nga gikatuohang mga miyembro sa lawless Moro Islamic Liberation Front (MILF) group og gipabuthan ang detachment sa militar sa Sitio Hill Side, Barangay Langayen, Pikit. Dali kining nabantayan sa mga sundalo nga mibalos sab sa pagpabuto sa ilang mga armas,hinungdan nga miatras ang mga rebelde. Resulta sa pagka-angol sa mga biktima nga naigo sa mga shrapnel sa 60 mm mortar nga mituasik sa nagkadaiyang parte sa ilang lawas samtang dili sab matino ngadto sa mga rebelde. Sila Sansona ug Palencio ang dali nga gipangdala sa ilang mga kaubanan sa Camp Siongco Hospital og luwas na sa makuyaw nga kahimtang. Gumikan niini mas gipalig-on pa sa militar ang pagbantay sa posibling pagsung pa usab sa LMG ngadto sa ilang posisyon. (gikan sa report sa bombo radyo)
*8888888
Natug gidunggab patay sa Cotabato Ctiy
CENTRAL MINDANAO - Patay ang usa ka ulitawo human siya gidunggab sa alas 3:00 sa kadlawon, Disyembre 14, didto sa siyudad sa Cotabato.
Nailhan sa kapulisan ang biktima nga si Jun Biongon, 27, minyo og molupyo sa Barangay Pantac, South Upi, Maguindanao.
Sa nahagpat nga taho gikan sa Cotabato City Police Office, nga sa sobrang kahubog nakatulog ang biktima sa lingkuranan sa City Plaza sa diha nga giduol siya sa usa ka wala mailhing suspetsado og gidunggab gamit ang mahait nga kutsilyo.
Dali sab nga misibat ang mamumuno sa diha nga iyang nakit-an si Biongon nga naligo na sa iyang kaugalingong dugo.
Gisapupo ang biktima sa mga nagrespondeng pulis og gidala sa Cotabato Redgional and Medical Center apan gidiklara kini sa mga attending physician nga dead on arrival.
Si Biongon ang naka-angkon og samad dinunggaban sa iyang tiyan ug dughan nga nagresulta sa iyang hinanaling kamatayon.
Nagtuo si Cotabato City Police Director, SSupt Willie Dangane, nga pagpanulis ang motibo sa mipatay sa biktima gumikan gikuha ang iyang cellphone ug pitaka nga dunay sulod P1,500.
Ang kapulisan ang padayong nag-imbestiga sa maong hitabo aron mailhan ug madakpan ang suspetsado. (Bombo Garry Fuerzas)
*88888888
MGA BOMBA NGA NAKIT-AN SA MAGUINDANAO, GINA-IMBESTIGAHAN NA
CENTRAL MINDANAO - Duha ka bomba ang nadepyos sa otoridad alas 3:30 sa hapon, niadtong Lunes, didto sa probinsiya sa Maguindanao.
Sigun sa taho gikan sa tactical Command Post sa 6th Infantry (Kampilan) Division Philippine Army, nasayran nga nasiplatan sa mga magtutudlo sa Midtimbang Elementary School, kilid sa kalsada sa Barangay Poblacion, Talayan, ang duha ka improvised explosive device (IED) nga hinimo sa duha ka bala sa 81 mm Mortar. Hinungdan nga nagkatibulaag ang mga sibilyan ug mga magtutungha sa pagpanagan paingon sa luwas nga dapit sa posibling pagbusikad sa bomba. Temporaryo nga gisirad-an sulod sa usa ka oras ang Maguindanao-General Santos City highway samtang gidepyos sa 6th Explosive Ordnance Disposal Team sa Philippine Army uban ang mga bomb expert sa PNP.
Gi-abrihan sab ang kalsada sa diha nga na-siguro na sa otoridad ang seguridad sa katawhan, ilabina kadtong mga commuters. Dunay mga sibilyan ang nagsulti nga duha ka wala mailhing tawo nga sakay sa usa ka motorsiklo ang ilang nakit-an nga dunay gibilin duol sa kalsada apan wala lang nila tagda sa pagtuo nga basura. Dunay nagtuo nga posibling target sa pagbutang og bomba ang convoy ni Maguindanao Governor Esmael "Toto" Mangudadatu, nga bisita sa anibersaryo sa munisipyo sa North Upi. Gumikan niini nagkahiusa ang militar ug kapulisan nga palig-unon pa ang seguridad didto sa Central Mindanao gumikan sa hulgang pagpamomba. (gikan sa report sa bombo radyo)
*88888888
MIYEMBRO SA MILF GIPASAKAAN NA UG KASO
GENERAL SANTOS CITY---Pormal na nga gipasakaan ug kasong criminal ang usa ka suspetsadong miyembro sa Lawless Moro Islamic Liberation Front (MILF) niadtong milabay nga adlaw.
Sa report nga nakuha sa Periodico-Banat, giduso ang pagpasaka ug kasong Illegal Possession of Firearms and Explosives ngadto sa Sarangani Prosecutors’ Office.
Ang report usab sa kapulisan nagtug-an nga ang suspek nga si Mando Leonsili, nga niadtong milabay nga semana nakuhaan ug usa ka home-made rocket propelled grenade sa panimalay niini, tulo ka mga buhing bala sa RPG ug usa ka Palestinian automatic rifle ang gisagpa sa Sarangani Police Provincial Office sa maong mga kaso. Sa intelligence report sa Sarangani PNP, nasuta nga miyembro sa MILF ang maong suspek nga naka-ipsot atol sa gihimong raid sa panimalay niini sa Katubao, Kiamba. Nahibaloan usab nga nag-atubang na daan ug kasong destructive arson ug murder si Leonsili. (pbanat news desk/vert castro)
*8888888
No comments:
Post a Comment