‘GIPAMINAW’---Seryosong gipaminaw dinhi sa mga miyembro sa Committee on Environment ug Legal Matters sa Sangguniang Panlalawigan sa South Cotabato ang mga sugyot ug mulo sa mga supak sa Environment Code ug naghandum ug review kagahapong adlawa sulod mismo sa session hall atol sa gipahigayon Special Joint Committee hearing. Sila si Committee Chairman, Board Member, Atty. Ernesto Catedral (duol sa mikropono), Board Member, kanhing Heneral, Agustin Dema-ala (pinakatuo) ug Board Member Joe Madangit (pinakatumoy sa wala) ug Board Member Ervin Luntao (sunod kay Madangit) ang abtik gyud nga naminaw sa mga presentasyon sa kontra sa Envi Code. (pbanat caption/kuha ni jong gorgonio)
*88888888
INSIDENTE SA PAGPAMUSIL SA GENSAN 3 NA
GENERAL SANTOS CITY---Pipila pa lamang ka adlaw sa tuig 2011, misaka gilayon ang insidente sa pagpamusil-patay sa siyudad.
Niadtong milabay nga adlaw lamang, usa ka Michael Crisostomo, 30 anyos, ulitawo ug usa ka residente sa Davao City ug temporaryong nanimuyo sa Esma Compound, barangay San Isidro ang nahimong biktima sa pagpamusil-patay sa duha ka mga wala pa mailhing mga suspek sakay sa motorsiklo. Ang biktima nga igo lang mopalit sa Minute Burger sa may dalang Aparente ang kalit nga gihunungan sa mga suspek dayon pusil. Wala gilayon ma-igo ang biktima ug nakadagan pa kini apan gigukod lamang gihapon sa mga suspek ug didto nakorner dayon pusil sa tiyan, abaga ug ulo niini nga mingresulta sa iyang kamatayon.
Nakuha sa mga sakop sa SOCO ang napulo ka mga empty shells sa .45 nga pistol ug tulo ka mga nalumping nga mga bala sa crime scene.
Samtang sa susamang balita, pipila lamang ka minuto ang milabay sa pagpamusil kang Crisostomo, laing tawag ang nadawat sa Police Station 4 gikan sa guwaridya sa Mindanao Medical Center ug ming-report nga usa ka biktima sa pagpamusil ang anaa sa maong balay tambalanan.
Matod sa report, usa ka Jake Lupo, 19 anyos ug estudyante sa Mindanao Polytechnic College ang kalit lamang gipusil sulod mismo sa Lupo General Merchandise nga gipanag-iyahan sa ginikanan sa biktima didto sa barangay Mabuhay.
Naigo sa tuo nga dughan ang biktima ug kasamtangan na karong gideklarar sa mga doktor nga luwas na sa makuyaw nga kahimtang.
Pipila na ka adlaw ang milabay, nahimong biktima usab sa pagpamusil sa siyudad ang kanhing kapitan sa barangay Tinoto, Maasim, Sarangani Province sa may dalang P. Acharon Boulevard corner Pioneer Avenue. Hangtod karon ang tulo ka mga kaso wala pa gihapon nadakpan nga mga suspetsado ug padayon lamang nga gina-imbestigahan sa kapulisan. (pbanat news desk/vert castro)
*8888888
KORONADAL CITY, SOUTH COTABATO---Nagpadayag sa ilang kalipay ug pagyukmo ang higanteng kompanya sa mina nga Sagittarius Mines, Inc (SMI) human nga usa ka special hearing alang sa posibleng pag-review sa kontrobersyal nga balaonon nga Environment Code sa South Cotabato ang gipahigayon kagahapong adlawa didto sa Sangguniang Panlalawigan.
Matod ni Mark Williams, ang General Manager sa SMI, ang ilang nakitang todo nga suporta sa mga stakeholders partikular mente sa mga miyembro sa Lumad alang sa ilang proyekto usa gyud ka pag-ila nga daghan gyud ang interesado ug nakasabot sa ilang proyekto nga dili lamang gilantaw nga makahatag ug kalamboan kundili lakip na usab ang siguradong asenso ug progreso sa katawhan.
“SMI appreciated the significant show of support by host tribal communities and local government units for the Tampakan Project at today’s special hearing…We share their belief that a project of this magnitude undertaken by a company that is committed to the highest standards of sustainable development offers unprecedented opportunities for the region,” matod sa mensahe ni Williams.
Nanghinaut pa si Williams nga pinaagi sa makabungog nga suporta sa bagang duot sa katawhansa Davao del Sur sa proyektong pagmina sa SMI, mapadayon ang himuon nga mga panaghisgut ug dayalogo tali sa mga stakeholders ug mismong sa kompanya, aron maresolba ug mahatagan ug solusyon ang tanan nga mga problema.
“Since the passage of the Code, a wide range of stakeholders have called for a review of this legislation and we are hopeful that through continuing dialogue and
engagement with all parties involved there will be a timely resolution regarding this matter…While the Tampakan Project is not immediately impacted by the ban on open pit mining given it is still in the exploration phase, we continue to monitor this issue closely and engage with all stakeholders regarding the proposed development of the project,” panapos pa sa labaw sa SMI. (smi pr/jag)
*8888888
GENERAL SANTOS CITY---Nakumpirma karon sa General Santos City Police Office nga may mga daan ng mga kaso ang pipila sa mga nadakpang miyembro sa Mayangkang Saguille Kidnap For Ransom Group.
Sa report nga nakuha, bisan si Cotabato City PNP Director, PSSUPT, Willie Dangane ang labaw sa City Director sa maong dapit nagkupirma nga ang mga nadakpang suspek naglihokan usab didto sa Central Mindanao ug duha dinhi nag-atubang ug mga kasong criminal.
Dugang pa, ang suspek nga si Datu Sultan Tongal adunay kasong murder ug frustrated murder nga posibleng ibalhin didto sa Cotabato City pipila ka mga adlaw gikan karon. Bisan ang usa ka Abdullah Salidatu alyas Kindat LTO mao ang gitudlong responsable sa pagdagit sa sais anyos nga batang si John Kyle Tiongson niadtong Hunyo 20, 2009. (pbanat news desk/vert castro)
*888888888
KORONADAL CITY--- Nakurat ang tanan human nga nakit-an ang mga karaan nga bala sulod sa compound sa University of Southern Mindanao (USM) sa lungsod sa Kabacan, North Cotabato niadtong milabay nga adlaw.
Matod sa report, nakit-an ang mga karaan nga bala sa College of Agriculture. Apan, dako na lamang ang katingala sa mga awtoridad nganong wala gilayon kini gireport sa Kabacan PNP. Hangtod karon, padayon pa gihapon nga gina-ila kung unsang matang sa armas ang mogamit sa maong mga bala nga nawala na pod ug gidudahang gibaligya na sa mga junk shops. Padayon pa gihapon ang gianhimong imbestigasyon may kalabotan ning maong kaso. (pbanat news desk/crispen chavez)
*888888
PIKIT, NORTH COTABATO---Laing pagbusikad na pod sa usa ka granada ang nahitabo sa lalawigan sa North Cotabato niadtong milabay nga gabii.
Sa report nga naka-abot sa Periodico-Banat, gikan sa Cotabato Police Provincial Office nga duha duha ka wala mailhing mga suspek sakay sa usa ka motor ang kalit na lamang nga milabay ug granada sa usa ka tindahan nga gipanag-iyahan sa usa ka Saidona Lintungan sa Apollo St., Poblacion, Pikit Cotabato.
Maayo na lamang kay dugay nga nakabuto ang granada ug wala kini maka-angol ug mga sibilyan.
Mipahigayon gilayon ug usa ka manhunt operation ang kapulisan ug sundalo ug nasuta nga didto padulong sa Liguasan Marsh ang mga suspetsado. Dako ang pagtuo sa tag-iya sa maong tindahan nga pagpangilkil ang tuyo sa mga suspek human sa mga insidente sa wala pa nahitabo ang paglabay sa bomba. Ginapahigayon na ang makuting imbestigasyon sa pinakabag-ong insidente sa pagpamomba. (pbanat news desk/crispen chavez)
*88888888
MIDSAYAP, NORTH COTABATO---Patay diha-diha dayon ang usa ka 66-anyos nga lolo human kini nga nadasmagan sa usa ka pampasaherong bus didto sa Sadaan, Midsayap niadtong milabay nga adlaw.
Matod sa Cotabato Police Provincial Office, ang biktima nailang usa ka Jovito del Rosario ug residente sa maong dapit.
Sa inisyal nga imbestigasyon, kalit na lamang nga mitabok ang biktima sa may dalang Quezon Ave., Poblacion 5, Midsayap ug wala kini namatikdan sa drayber sa maong bus nga nailangsi Ricky Toledo. Maayong pagkasulod sa ilawom sa bus de pasahero ang biktima nga naka-angkon ug mga bali ug samad sa iyang kalawadan nga nagresulta sa iyang hinanaling kamatayon. Tungod niini, igo na lamang nga nagkasabot ang pamilya sa biktima ug sa kompanya sa bus ilabi na ang pagpalubong ug mga galastuson niini. (pbanat news desk/jun castro)
*888888888
CENTRAL MINDANAO - Ang Moro Islamic Liberation Front (MILF) nagkomperma nga ila na nga nasuta ang gitaguan sa mga kidnaper nga maoy midagit sa negusiyanteng Tsinoy sa Cotabato nga si Elojeo Yu.
Gibutyag ni MILF Civil Military Affairs, Chief, Eid Kabalu nga gitago nila sa publiko ang maong taho aron dili maapektuhan ang operasyon sa otoridad. Gidugang ni Kabalu nga nagpagawas na og direktiba si MILF Chairman Aljads Murad Ibrahim ngadto sa ilang mga ground commanders nga mugamit sa ilang pwersa kon ugaling makasulod sa ilang mga kontroladong dapit ang mga KFRG nga midagit kang Ading Yu. Kahinumduman nga namahayag si Murad nga andam silang mutabang sa militar ug kapulisan aron maluwas ang biktima.
Hugtanon sab nga gipanghimakak ni Kabalu ang akusasyon nga si Toks Saguile, nga maoy nangulo sa pagdagit kang Yu miyembro sa MILF, kini dakong sayop gumikan si Toks igsuon ni Kumander Mayangkang Saguile sa Moro National Liberation Front (MNLF) nga nalambigit sa sunod-sunod nga pagpangidnap didto sa South-Central Mindanao. Apan sa giluhatan ni Maguindanao Police Provincial Director, S/Supt Marcelo Pintac, nga posibling gidala sa mga kidnaper si Yu sulod sa Liguasan Marsh og gipasa na sa Pintagon Kidnap Gang. Hangtud karon nagpadayon ang rescue operation sa otoridad ug dunay mga lugar na silang gisuhid nga gitaguan sa mga suspetsado.
*888888
GENERAL SANTOS CITY---Nagpahigayon na karon ug usa ka imbestigasyon ang kapulisan human nga usa ka fetus o bata nga wala pa nahimugos ang nadiskubrehan sa ti-ilan sa rebulto sa Birheng Maria didto sa simbahan sa barangay Calumpang ning dakbayan kagahapong adlawa.
Sa report sa kapulisan, nasuta nga anaa sa duha hangtod tulo ka bulan ang fetus nga gibilin sa ubos sa rebulto ni Maria sa Holy Cross Parish.
Igo na lamang nga gibendisyonan ni Father Vic Supranes ang bata nga igo lang giputos ug kalendaryo sulod sa karton nga wala nay kinabuhi. Kasamtangan na karong gibutang sa punerarya ang maong fetus samtang padayon usab nga gi-ila sa kapulisan ang inahan sa maong bata. (pbanat news desk/jun castro)
*888888
GENERAL SANTOS CITY---Dili lamang ang mga siyudad sa Luzon ang adunay mga traffic enforcers nga magsayaw-sayaw samtang nagmentinar sa trapiko, kundili lakip na pod dinhi sa General Santos City.
Kini ang gipamahayag karon ni Assistant City Administrator for Operations, Glennville Franis Gonzales sa lokal nga media. Matod ni Gonzales, andam ng ihatag ngadto sa mga enforcers ang dose ka mga MP3 players para mamati ug mga lingaw nga kanta samtang nagbantay sa dagan sa trapiko. Nasayran pa gikan kang Gonzales nga mga kanta sa anhing King of Pop nga si Michael Jackson ang gamiton sa mga dancing enforcers.
Dako ang kumpiyansa ni Gonzales nga may positibong epekto gyudsa trapiko sa siyudad ang mga dancing traffic enforcers diin namatud-an na sa ubang mga siyudad sa Pilipinas. (pbanat news desk/vert castro)
*8888888
No comments:
Post a Comment