periodicobanat (enero 18, 2011)

Photo – Hugot ang pagtuo sa Mindanao State University ilawom sa pagdumala ni Chancellor Atty. Abdulrrachan Canacan nga duna silay kapasidad sa pagdumala o pagkupot sa kalilangan festival ning umaabot sa pebrero human gibakwi sa gobyerno ang kalilangan council nga gihuptan nila Orman Manansala. (Cpio/Paul bernaldez)

*88888888

MGA DANCING TRAFFIC ENFORCERS MISAYAW NA SA KADALANAN

GENERAL SANTOS CITY—Nagsugod na gyud kagahapong adlawa ang mga dancing traffic enforcers sa dakbayan.

Kagahapon, daw nalingaw gyud ang mga motorista sa siyudad human nga nagpakita ug gilas sa pagsayaw ang mga sakop sa Ciy Traffic Management ubos kang Assistant City Administrator, Glennville Gonzales.

Gipamutang ang mga dancing traffic enforcers sa tulo ka mga dapit diin adunay mga traffic lights sa siyudad. Mga bandang alas siyete sa buntag gisugdan na sa pagsayaw sa kadalanan nga nakapa-alerto ug maayo sa motorista.  (pbanat news desk/crispen chavez)

*8888888

SEKYU NAGPAKAMATAY GAMIT ANG SHOTGUN

GENERAL SANTOS CITY---Usa ka sekyu sa gasolinahan sa barangay Lagao, ang mitapos sa kaugalingon niini gamit ang gi-isyu nga shotgun.

Matod sa report sa Lagao PNP, ang biktima nailang usa ka Ricardo Cabaluna, 31 anyos, minyo ug residente sa Sitio Toning, Lagao ning siyudad.

Sa inisyal nga imbestigasyon sa Lagao PNP, bandang alas singko sa hapon nga misulod ang sekyu sa iyang trabaho ug nasige ug istorya sa mga kaubanan sa gasolinahan nga aduna kini bug-at nga problea ug nag-away matod pa sila sa iyang asawa.

Igo na lamang nasaksihan sa mga kaubanan niini nga nagpabuto sa iyang shotgun ang maong guwardiya tumong sa taas. Pagkahuman, gipusil sa biktima ang iyang kaugalingon ug naigo sa tiyan na niini.

Gidali pa ug hatod sa balay tambalanan ang biktima ug gilayon nga gi-operahan apan sa tunga-tunga sa operasyon, namatay kini. (pbanat news desk/vert castro)

*8888888

AWTORIDAD: TAMPAKAN MAY ILLEGAL MINING NA POD

TAMPAKAN, South Cotabato — Kumpirmadong nakasulod na sa Tampakan, South Cotabato ang illegal mining operations human ang sunod-sunod nga malampusong operasyon sa mga otoridad.

Kahinumdumang sa miaging tuig, duha ka managlahing operasyon ang gihimo sa mga otoridad kung asa toni-toniladang mga pinalusot nga copper ores ang nabakwi nga gitoohang ilegal nga gikutkot sa kabukiran sa Tampakan.

Niadtong Agosto, dili muubos sa 100 metriko toneladang copper ores ang na-rekober sa mga tinugyanan sa balaod pinaagi sa serye sa mga raids nga gipahigayon sa utlanang bahin sa Tampakan ug Koronadal City, ang ulohang syudad sa probinsya sa South Cotabato. Kini maoy gikunsidera nga kinadakuan sa kasaysayan sa probinsya.

Paglabay sa usa ka bulan, laing walo ka toneladang copper ores na usab ang nabakwi sa mga otoridad.

Nasayrang gipangunahan sa Provincial Environment Management Office (PEMO) ang operasyon kontra illegal mining human makadawat ug taho mahitungod sa iligal nga pagkabkab sa kabukiran sa Tampakan sa mga wala pa mailhing grupo.

Matud ni PEMO chief Ramon Ponce de Leon, ginakuha ang nahisgutang copper ores nga walay permiso gikan sa gobyerno.

Gidugang nga dakong risgo sa tawo ug kinaiyahan ang maong iligal nga pamaagi sa pagmina (tunneling method) tungod kay ang mga minero wala gasunod sa gitakdang regulasyon sa balaod.

Ang Tampakan maoy usa sa mga gikunsiderang dakong minahan sa tumbaga (copper) ug bulawan (gold) sa Southeast Asia.

Pagbutyag ni Ponce de Leon, usa ka Taiwanese national nga nagpangalag Shien ang gikaalegar nga tig-finance sa pipila ka illegal mining operations sa Tampakan.

Segon sa report, pipila usab ka mga dagkong pangalan sa lokal nga politika ang nalambigit sa maong kalihukan.

Matud ni South Cotabato Gov. Arthur Pingoy, Jr. daghang inidbidwal ang gipasakaan na ug kaso tungod sa alegasyong pagkalambigit sa illegal mining activity sa maong lungsod.

Giplanuhan usab sa probinsya ang pag-deputize sa mga opisyales sa mga purok isip kabahin sa grupong gapahigayon ug checkpoint sa kadalanan.

Apan mga opsiyales sa probinsya nagduha-duha sa maong laraw tungod sa impormasyon nga kasagarang opisyales sa mga purok ang nalambigit usab sa illegal mining activities.

Giangkon usab ni Ponce de Leon nga naghitak karon ang “banlas mining” sa mining area sa Sagittarius Mines, Inc (SMI).

Ang “banlas mining” usa ka pamaagi sa pagmina kung asa ang yuta sa bukid ginalangkat pinaagi sa bulto ug kusog nga agas sa tubig nga gaagay sa usa ka artipisyal nga agianan (channel).

Ang yutang nabanlas sal-on sa kahong giplastar tumoy sa gihimong channel kung asa didto na pilion ang mga pino nga tipaka sa gitoohang bulawan.

Ang mga piniling tipaka tigomon sa usa ka sudlanan aron ulayon ginamit ang kemikal nga mercury. Kasagaran sa suba kini ginahimo.

Tungod niini, kontaminado na usab sa mercury ang tubig sa sapa hinungdan sa sakit ug kamatay sa mga tawo ug mananap.###

*88888888

13-ANYOS BIKTIMA

GANG RAPE NAUSO NA SA GENSAN?

GENERAL SANTOS CITY---Dili lang ang pagpamusil-patay ang uso dinhi sa dakbayan kundili lakip na pod ang gang rape.

Niadtong milabay nga adlaw lamang, usa ka 13-anyos nga dalagita ang nahimong biktima sa gang rape diin tulo ka mga suspetsado ang malampusong nadakpan sa mga sakop sa Police Statio 4 o San Isidro PNP.

Sa report nga nakuha sa Periodico-Banat, ang biktima nga nailang si alyas Ana gipulihi-pulihan sa paglugos sa tulo ka mga suspek nga gi-ila usab nga sila Benny Marsaga, Arnel Bedico ug George Billones.

Sa pamahayag ni PSI Lorenzo Henarez III, ang hepe sa San Isidro PNP, ang 13 anyos nga biktima unang gilugos sa nagpailang uyab niini nga mao si Marsaga samtang gitan-aw sa duha ka laing mga suspek. Pagkahuman ni Marsaga, mipuli gilayon ang duha ka mga suspek. Base mismo sa pamahayag sa biktima, ang tulo ka mga nadakpan mao gyud ang namanamastamas kaniya pinaagi sa pagpa-inom kaniya ug ilimnong makahubog.

Gidugang usab ni Henares nga nagpositibo ang biktima sa medico legal nga matod pa nahilabtan gyud kini. Kagahapong adlawa, pormal na nga gipasakaan ug kasong rape ang mga suspek nga kasamtangan karong nagtingkagol sa selda sa Police Station 4. (pbanat news desk/vert castro)

*88888

1 GIDUNGGAB, 1 GIBUNALAN SA SAN ISIDRO

GENERAL SANTOS CITY---Lain insidente na usab sa pagpanunggab ug pagpamunal ang nahital sa Police Station 4 niadtong milabay nga gabii.

Sa report nga nakuha sa Periodico-Banat, naila ang biktima nga usa ka Zyrell Rombawa, hamtong ang pangidaron ug nahimong biktima sa pagpanunggab sa iyang likod nga bahin. Samtang ang kauban niini nga nailang si Charlie Colino, 18 anyos ug usa ka laborer ang gibunalan usab ug kahoy sa ulohan nga bahin.

Sa inisyal nga imbestigasyon sa kapulisan sa San Isidro PNP, nag-inom ang mga biktima sa usa ka videokehan sa may NLSA Road, barangay San Isidro unya mi-abot ang suspek nga nailang si alyas Nognog kuyog usab ang pipila ka mga wala pa mailhing mga suspek. Pipila lamang ka minuto ang nakalabay kalit nga gidunggab ni Nognog ang biktima u gang kauban niini nga si Charlie gibunalan gilayon sa kaubanan sa suspek.

Ang maong insidente, nasaksihan mismo sa uyoan ni Rombawa nga mao pod ang mihatod sa mga biktima sa balay tambalanan. Gilayon nga mi-ikyas ang mga suspek bitbit ang kutsilyo nga gigamit sa pagpanunggab samtang nagpadayon sa pagpa-alim ang mga biktima sulod sa balay tambalanan. Samtang gipangita karon sa kapulisan ang grupo ni Nognog aron sikupon ug pasakaan ug tukmang kasong kriminal. (pbanat news desk/vert castro)

*8888888