periodicobanat (enero 17, 2011)

PATAY NA POD--Daw nagsunod-sunod na gyud ang mga insidente sa pagpamusil-patay sa dakbayan sa Gensan. Kining tawhana mao ni ang pinaka-ulahi nga nahitalang kaso sa mga insidente sa pagpamusil. Hangtod karon nagpabilin pa gihapon nga blangko ang kapulisan kung kinsa ang mga responsable niini. (kuha ni vert castro/pbanat caption)

*8888888

KARONG BULAN SA ENERO 2011 LAMANG

GIPUSIL SA GENSAN LIMA NA!

GENERAL SANTOS CITY---Daw dili na gyud maundang ang pagpamusil sa dakbayan.

Sulod lamang sa bulan sa Enero karong tuiga, igo lamang sa pagtala ug himo ug police blotter ang kapulisan sa Gensan human ang ika-upat ug ikalima nga biktima sa pagpamusil sa siyudad nahitala niadtong milabay nga mga adlaw.

Sa report nga nakuha sa Periodico-Banat, usa ka biktima nga nailang si Mark Anthony Binas, 24 anyos, ang kalit na lamang nga gipusil sa dalang Magsaysay Avenue atubangan mismo sa Vaquero Bar. Igo lamang sa pagpunit sa bala gikan sa .45 nga pistol ang nahimo sa kapulisan. Sa inisyal nga imbestigasyon nasayran nga ang gipusil nga biktima, naigo sa tutunlan niini ug matod pa nalambigit usab ang gipusil sa mga kawat nga nahitabo sulod sa merkado publiko sa Gensan. Hangtod karon, padayon pa gihapon ang ginahimong imbestigasyon sa kapulisan samtang ang biktima anaa karon sa Gensan District Hospital.

Sa susamang balita gihapon, nahimong ikalimang biktima sa pagpamusil ang usa ka wala pa mailhi nga lalaki sulod mismo sa Laray Public Market, sa dalang Alunan St., niadtong milabay nga adlaw usab. Gidimalas hinuon ang maong biktima human nga nakabsan kini sa iyang kinabuhi. May igo sa iyang likod sa liog nga milapas sa iyang agtang ang nahisgutang lalaki. Dako usab ang duda sa kapulisan nga nalambigit sa mga insidente sa kawat ang gipusil nga lalaki.

Hangtod sa pagsulat ning maong balita, wala gihapon maka-establisar ang kapulisan sa dakbayan kung kinsa ang mga responsable sa sunod-sunod na nga pagpamusil.

Niadtong milabay nga semana usab, usa ka panagtigom sa mga lideres sa kapulisan sa rehiyon nga mismong gipangulohan ni PNP-12 Director, PCSUPT, Atty. Gil Meneses ang gilusad aron tuki-on ang mga insidente sa pagpamusil sa rehiyon. (pbanat news desk/vert castro)

*8888888

30 KA PAMILYA GIBAHA SA SOCOT

KORONADAL CITY---Miabot ngadto sa 30 ka pamilya ang nahimong apektado sa kalit nga pagbaha sa usa ka barangay sa lungsod sa Tupi, South Cotabato niadtong milabay nga adlaw.

Sa report nga nakuha, tungod sa kalit nga pag-ulan, ang barangay Linan, Tupi, South Cotabato nakasinati gyud ug flashfloods diin 30 ka mga pamilya niini ang diriyot nga naapektohan.

Nasayran pa nga tulo ka mga tulay, usa ka panimalay, ug usa ka classroom ang nangaguba Hinuon, mihatag ug hinanaling aksyon ang buhatan sa Municipal Social Welfare and Development kauban ang Provincial Social Development Welfare pinaagi sa pagpanghatag ug bugas, mga de lata ug uban pang mga kinahanglanon sa mga naapektohang residente.  (pbanat news desk/crispen chavez)

*88888888

GOB TOTO NALIPAY SA PLUNDER VERSUS AMPATUANS

KORONADAL CITY---Gikalipay ni Maguindanao Governor, Toto Mangudadatu ang giduso nga kasong plunder batok sa primary suspect nga si Andal Ampatuan Jr., ug laing 24 pa ka mga paryente niini.

Dason pa ni Mangudadatu nga ang kasong plunder usa ka pamaagi aron mahibalan sa katawhan kung gi-unsa pag-gamit sa pondo sa probinsya sa Maguindanao sa panahon sa administasyon sa mga Ampatuan.

Matod ni Mangudadatu, miabot ngadto sa P2 bilyones ang matod pa pondo sa lalawigan sa Maguindanao nga gibulsa sa pamilya Ampatuan nga gikan sa kagamhanang nasyunal.

Gikuwestiyon pa niini nga ang gasolinahan lamang sa mga Ampatuan ang iyang nahibal-an nga negosyo ug dapat gyud imbestigahan sa gobyerno kung asa gikan ang kuwarta sa impluwensyadong pamilya. Gitug-an pa sa gobernador nga malagmit karong sunod bulan sa Pebrero o Marso mahibal-an na ang report sa Commission on Audit (COA) may kalabotan sa imbestigasyon sa pondo sa Provincial Government sa Maguindanao. (pbanat news desk/popoy contreras)

*8888888

MISTER GIPAAK NI MISIS MOPASAKA UG KASO

GENERAL SANTOS CITY---Pagkadakong pagka-unsaa dinhi sa dakbayan sa Gensan niadtong milabay nga adlaw.

Sa report nga nakuha sa Periodico-Banat, usa ka bana ang personal nga midangop sa Bula Police Station aron ireklamo ang gihimong pagpama-ak kaniya sa iyang kaugalingong asawa.

Ang nagreklamo naila nga usa ka Ferdinand Calumpang, hamtong ang pangidaron ug residente sa Gensanville Subdivision, Bula samtang ang gireklamo mao ang asawa niini nga nailang si Genobie Calumpang, 44 anyos ug residente sa maong dapit.

Sa inisyal nga imbestigasyon sa kapulisan, mi-una sa pagpatala ang asawang si Genobie human matod pa gikulata kini sa iyang bana ug gisumbag ang ulo hinungdan nga nagkadugo kini.

Apan, sa pamahayag sa bana nga si Ferdinand, iyang nahimo ang ingon sa iyang asawa human kini gipaak sa iyang dughan nga grabeng pagdulot sa ngipon sa asawa. Nasuko matod pa ang asawa niini tungod kay adlaw na kini nga naka-uli.

Igo na lamang nga mitambag ang mga pulis nga hisgutan na lamang sa magti-ayon ang ilang problema aron mahatagan kini ug solusyon. Pero ang banang si Ferdinand desidido gyud nga mopasaka ug kaso human kini gipaak sa iyang pinalanggang asawa. (pbanat news desk/vert castro)

*888888